ສາກແບດເຕີລີມືຖືຫລືໂນດບຸກໃນຫ້ອງນອນອາດເຮັດໃຫ້ຕຸ້ຍໂດຍບໍ່ຮູ້ໂຕຜູ້ຊ່ຽວຊານແນະນຳໃຫ້ຫລີກລ້ຽງພຶດຕິກຳກະຕຸ້ນຕ່ອມຕຸ້ຍໂດຍດ່ວນ
ຫລິ້ນມືຖືມາໝົດມື້ຮອດແລງມາແບດເຕີລີກໍໃກ້ຈະໝົດພໍດີກໍ່ຕ້ອງສຽບສາກແບດໃນຂະນະທີ່ເຮົານອນຫລັບຫລືບາງຄົນສາກໄປນໍາຫລິ້ນໄປນໍາຈົນໃນທີ່ສຸດກໍຫລັບຄາໂທລະສັບທັງທີ່ກໍສຽບສາຍສາກຢູ່ຊຶ່ງພຶດຕິກຳແບບນີ້ຕ້ອງເຕືອນເລີຍວ່າອາດເຮັດໃຫ້ນ້ຳໜັກຂຶ້ນໄດ້ຢ່າງບໍ່ຮູ້ໂຕລວມທັງຄົົນທີ່ມັກສາກໂນດບຸກໃນຫ້ອງນອນນໍາອີກ
ຫລາຍຄົນມີຄຳຖາມວ່າພຽງແຕ່ສາກແບດມືຖືຫລືໂນດບຸກຈະພາໃຫ້ນ້ຳໜັກຂຶ້ນໄດ້ຈັ່ງໃດ ຜົນວິໄຈທີ່ຖືກຕີພິມໃນDaily Mailຊ່ວຍຕອບໄດ້ວ່າແສງໄຟທີ່ສ່ອງສະຫວ່າງຈາກອຸປະກອນໄອທີໃນຂະນະທີ່ຖືກສາກໄຟສາມາດລົບກວນການຜະລິດຮໍໂມນເມລາໂທນິນ ຊຶ່ງເປັນຮໍໂມນສຳຄັນຂອງການນອນຫລັບແລະພໍຮ່າງກາຍພັກຜ່ອນບໍ່ພຽງພໍບາດນີ້ກໍເຖິງຄິວຮໍໂມນຄອລຕິຊອນໂຕການທີ່ເຮັດໃຫ້ຮູ້ສຶກຢາກເລື້ອຍໆ,ອອກອາລະວາດບວກກັບການເຮັດວຽກງານຂອງລະບົບເຜົາຜານກໍຈະອ່ອນແລ້ວແບບນີ້ຈະບໍ່ໃຫ້ໂຕຕຸ້ຍອືດແບບໃດ
ທັງນີ້ດຣ ໄຊມອນ ໄຄ ຜູ້ຊ່ຽວຊານດ້ານສາດການນອນຫລັບຈາກມະຫາວິທະຍາໄລແມນເຊດເຕີຍັງໃຫ້ຂໍ້ມູນເພີ່ມເຕີມມາວ່າແສງສີຟ້າຈາກອຸປະກອນໄອທີກໍ່ຄືສະມາດໂຟນແລະໂນດບຸກເປັນແສງໄຟທີ່ສາມາດບັ່ນທອນການນອນຫລັບແລະຊະລໍລະບົບເຜົາຜານຂອງຮ່າງກາຍລວມທັງຍັງກະຕຸ້ນໃຫ້ສະຫມອງຕື່ນໂຕຂຶ້ນໄດ້ນໍາອີກ
ນອກຈາກນີ້ຜົນການສຶກສາຂອງມະຫາວິທະຍາໄລເກນາດາປະເທດແອັດສະປາຍທີ່ທົດລອງສີດຮໍໂມນເມລາໂທນິນໃຫ້ໜູກໍພົບວ່າເມື່ອຮ່າງກາຍມີຮໍໂມນເມລາໂທນິນເພີ່ມຂຶ້ນ ອັດຕາຄວາມສ່ຽງພະຍາດຕຸ້ຍແລະເບົາຫວານຈະຫລຸດລົງຊຶ່ງສອດຄ້ອງກັບຜົນການສຶກສາຂອງມະຫາວິທະຍາໄລແມນເຊດເຕີທີ່ເປີດເຜີຍວ່າການນອນຫລັບຢ່າງພຽງພໍຈະຊ່ວຍຕ້ານຄວາມສ່ຽງພະຍາດເບົາຫວານໄດ້ນໍາອີກທາງໜຶ່ງ
ເລື່ອງຫຍັງເຮົາຈະເພີ່ມອັດຕາຄວາມຕຸ້ຍໃຫ້ຕົນເອງແບບບໍ່ຮູ້ໂຕກັນສະນັ້ນດຣໄຊມອນ ໄຄເລີຍແນະນຳໃຫ້ປິດອຸປະກອນໄອທີທຸກຊະນິດກ່ອນເຂົ້ານອນເກືອບ2ຊົ່ວໂມງເປັນຢ່າງຕ່ຳປ້ອງກັນຕົນເອງໄວ້ກ່ອນ