ນ້ຳຖືເປັນປັດໄຈສຳຄັນ ໃນການຊຸກຍູ້-ສົ່ງເສີມການຜະລິດກະສິກຳຂອງພໍ່ແມ່ປະຊາຊົນ ໃຫ້ໄດ້ຮັບຜົນຜະລິດທີ່ມີຄຸນະພາບ ແລະ ປະລິມານທີ່ສົມບູນຂອງຜະລິດກະສິກຳ ກໍ່ໄດ້ຈາກການສະໜອງນ້ຳທີ່ເໝາະສົມ ເຊິ່ງໃນສົກປີ 2014-2015 ອຳນາດການປົກຄອງເມືອງປາກງື່ມ ນະຄອນຫຼວງວຽງຈັນ (ນວ) ໄດ້ເອົາໃຈໃສ່ຢ່າງຕັ້ງໜ້າ ເຂົ້າໃນການສະໜອງນ້ຳເຂົ້າໃນການຜະລິດຂອງປະຊາຊົນ ຄຽງຄູ່ກັບການປັບປຸງ ແລະ ສ້ອມແປງຈັກສູບນ້ຳປະຕູນ້ຳ ໃຫ້ມີຄວາມພ້ອມນຳໃຊ້ຕະຫຼອດເວລາ ເຊິ່ງໄດ້ສ້ອມແປງ 6 ສະຖານີສູບນ້ຳ ມູນຄ່າຫຼາຍກວ່າ 450 ລ້ານກີບ.
ເພື່ອແນໃສ່ຊຸກຍູ້ການຜະລິດກະສິກຳຂອງປະຊາຊົນ ໃຫ້ຕອບສະໜອງໄດ້ຄວາມຮຽກຮ້ອງຕ້ອງການຂອງສັງຄົມ ກໍ່ຄືສົ່ງເສີມການຜະລິດກະສິກຳໃຫ້ກາຍເປັນສິນຄ້າຫຼາຍຂຶ້ນ ວັນທີ 23 ເມສາ 2015 ຜ່ານມານີ້ ທ່ານ ຮສ.ດຣ. ລິນຄຳ ດວງສະຫວັນ ຫົວໜ້າພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ພ້ອມຄະນະ ໄດ້ລົງເຄື່ອນໄຫວຊຸກຍູ້ ແລະ ຕິດຕາມການສະໜອງນ້ຳ ແກ່ການຜະລິດກະສິກຳຂອງປະຊາຊົນເມືອງປາກງື່ມ ເຊິ່ງການເຄື່ອນໄຫວຄັ້ງນີ້ ຫົວໜ້າພະແນກກະສິກຳ ແລະ ປ່າໄມ້ ນວ ພ້ອມຄະນະ ໄດ້ຮ່ວມພົບປະກັບທ່ານ ວົງເດືອນ ບຸນຍະແສງ ເຈົ້າເມືອງປາກງື່ມ ແລະ ຮ່ວມກອງປະຊຸມປຶກສາຫາລື ກ່ຽວກັບວຽກງານສົ່ງເສີມການຜະລິດກະສິກຳກັບຫົວໜ້າ ແລະ ພະນັກງານ-ວິຊາການຫ້ອງການກະສິກຳ ແລະ ປ່າໄມ້ເມືອງດັ່ງກ່າວ.
ໂອກາດດັ່ງກ່າວທ່ານ ທົດສະກັນ ໄກສອນເພັດ ຫົວໜ້າຫ້ອງການກະສິກຳ ແລະ ປ່າໄມ້ເມືອງປາກງື່ມ ໄດ້ລາຍງານຫຍໍ້ກ່ຽວກັບການຈັດຕັ້ງປະຕິບັດ ວຽກງານສົ່ງເສີມການຜະລິດກະສິກຳທົ່ວເມືອງ ໃນປີ 2014 ເຊິ່ງເຫັນໄດ້ວ່າ: ເມືອງປາກງື່ມມີເນື້ອທີ່ການຜະລິດເຂົ້ານາປີ 12.660 ເຮັກຕາ ສະມັດທະພາບ 4,3 ໂຕນຕໍ່ເຮັກຕາ ຜົນຜະລິດໄດ້ 54.438 ໂຕນ ນາແຊງ 4.100 ເຮັກຕາ ສະມັດທະພາບ 4,5 ໂຕນຕໍ່ເຮັກຕາ ຜົນຜະລິດໄດ້ 22.714 ໂຕນ ລວມຜົນຜະລິດທັງສອງລະດູໄດ້ 73.279 ໂຕນ ການຜະລິດພືດຜັກລະດູແລ້ງເນື້ອທີ່ 400 ເຮັກຕາ ປະຕິບັດໄດ້ 402 ເຮັກຕາ ລື່ນແຜນ 2 ເຮັກຕາ ພືດອຸດສາຫະກຳ 2.650 ເຮັກຕາ ປະຕິບັດໄດ້ 690 ເຮັກຕາ ວຽກງານລ້ຽງສັດທົ່ວເມືອງ ມີຟາມໝູ 19 ແຫ່ງ ມີໝູ 18.600 ໂຕ ຟາມໄກ່ 10 ແຫ່ງ ແລະ ຟາມເປັດ 10 ແຫ່ງ ວຽກງານການປະມົງ ໄດ້ລົງຕິດຕາມກວດກາການລ້ຽງປາໃສ່ກະຊັງຂອງນັກລົງທຶນຈີນ ຈຳນວນ 33 ກະຊັງ ມີປາ 7.500 ໂຕ ສະຫຼຸບແລ້ວ 1 ປີຜ່ານມາ ເມືອງປາກງື່ມສາມາດສະໜອງທາດຊີ້ນໄດ້ທັງໝົດ 5.075,54 ໂຕນ ບໍລິໂພກພາຍໃນ 2.105 ໂຕນ ແລະ ເປັນສິນຄ້າສົ່ງອອກ 2.970,54 ໂຕນ.
ທ່ານ ຮສ.ດຣ. ລິນຄຳ ດວງສະຫວັນ ໄດ້ສະແດງຄວາມຍ້ອງຍໍ-ຊົມເຊີຍ ຕໍ່ອຳນາດການປົກຄອງກໍ່ຄືຫ້ອງການກະສິກຳ ແລະ ປ່າໄມ້ເມືອງ ທີ່ໄດ້ເອົາໃຈໃສ່ຢ່າງຫ້າວຫັນ ເຂົ້າໃນວຽກງານຕິດຕາມການຜະລິດກະສິກຳຂອງປະຊາຊົນ ອັນໄດ້ເຮັດໃຫ້ພືດຜັກທາງດ້ານກະສິກຳ ແລະ ການສະໜອງທາດຊິ້ນຂອງເມືອງປາກງື່ມ ພຽງພໍກັບຄວາມຮຽກຮ້ອງຕ້ອງການຂອງພາຍໃນເມືອງ ແລະ ເຫຼືອຂາຍເປັນສິນຄ້າແກ່ຜູ້ບໍລິໂພກຊາວ ນວ ແຕ່ເຖິງຢ່າງໃດກໍ່ຕາມ ຄຽງຄູ່ກັບຈຸດດີດັ່ງກ່າວ ເພື່ອຮັບປະກັນໄດ້ຄວາມຮຽກຮ້ອງຕ້ອງການຂອງວຽກງານ ພັດທະນາເສດຖະກິດ-ສັງຄົມໃນໄລຍະໃໝ່ ອຳນາດການປົກຄອງ ແລະ ປະຊາຊົນເມືອງປາກງື່ມ ຕ້ອງເອົາໃຈໃສ່ຕື່ມເຂົ້າໃນການຍູ້ແຮງການຜະລິດເປັນສິນຄ້າ ເປັນຕົ້ນແມ່ນການຫັນເອົາເຕັກນິກວິຊາການທັນສະໄໝ ເຂົ້າໃນການຍົກສູງຄຸນະພາບ ແລະ ປະລິມານຂອງຜົນຜະລິດໃຫ້ສູງຂຶ້ນ ຫັນການຜະລິດແບບຄອບຄົວໃຫ້ເປັນການຜະລິດເປັນກຸ່ມ ເພື່ອສ້າງຄວາມເຂັ້ມແຂງທາງດ້ານການຕະຫຼາດ ເຊິ່ງໃນຕໍ່ໜ້າຕ້ອງເພີ່ມທະວີ ເຂົ້າໃນການປູກພືດຜັກອຸດສາຫະກຳໃຫ້ຂະຫຍາຍຕົວຍິ່ງຂຶ້ນ ຄຽງຄູ່ກັນນັ້ນ ພາກສ່ວນກ່ຽວຂ້ອງຕ້ອງເປັນເຈົ້າການຄຸ້ມຄອງ ແລະ ສະໜອງນ້ຳເຂົ້າໃນການຜະລິດ ໃຫ້ພຽງພໍຕາມຄວາມຕ້ອງການຂອງປະຊາຊົນຍິ່ງຂຶ້ນຕື່ມອີກ.
ແຫລ່ງຂ່າວ: ວຽງຈັນໃໝ່