ເພື່ອເປັນການສ້າງໂອກາດໃຫ້ກັບນັກຮຽນ ໄດ້ສະແດງອອກທາງດ້ານພອນສະຫວັນ ດ້ານຄວາມຮູ້ ຄວາມສາມາດ ຫົວຄິດປະດິດສ້າງຂອງຕົນເອງ ສົ່ງເສີມການຮຽນ-ການສອນ ໃນໂຮງຮຽນໃຫ້ມີບັນຍາກາດ ສ້າງໂອກາດເຂົ້າຮ່ວມການແຂ່ງຂັນ ແລະ ມີມາດຕະຖານຄວາມຮູ້ໃຫ້ຫຍັບເຂົ້າໃກ້ໃນລະດັບພາກພື້ນ ແລະ ສາກົນ ເປັນການທົບທວນກວດສອບການສິດສອນຮ່ຳຮຽນຂອງນັກຮຽນ ແລະ ຄູ-ອາຈານ ອີກທັງເປັນການເປີດໂອກາດໃຫ້ນັກຮຽນທີ່ແຂ່ງຂັນໄດ້ອັນດັບທີ 1 ທີ 2 ແລະ 3 ໄດ້ຮັບການສະໜັບສະໜູນໃນລະດັບສູງຕໍ່ໄປ.
ການສອບເສັງແຂ່ງຂັນນັກຮຽນເກັ່ງລະດັບຊາດ ໄດ້ຈັດຂຶ້ນໃນລະຫວ່າງວັນທີ 21-24 ເມສາ 2015 ໂດຍການເປັນປະທານຂອງທ່ານ ລີຕູ້ ບົວປາວ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກີລາ ທ່ານຫົວໜ້າກົມ ຫົວໜ້າຫ້ອງການ ພະແນກການ ພະນັກງານຄູ-ອາຈານ ພໍ່ແມ່ຜູ້ປົກຄອງຂອງນັກຮຽນເຂົ້າຮ່ວມເປັນກຳລັງໃຈ ສູນສອບເສັງແຂ່ງຂັນນັກຮຽນຂັ້ນ ປ5 ແມ່ນຈັດຢູ່ສະຖານບັນຄົ້ນຄວ້າວິທະຍາສາດການສຶກສາ ສ່ວນຂັ້ນ ມ4 ແລະ ມ7 ຈັດຢູ່ສະໂມສອນ ມະຫາວິທະຍາໄລແຫ່ງຊາດ.
ສະເພາະຂັ້ນ ປ5 ສອບເສັງ 3 ວິຊາຄື: ວິສາພາສາລາວ ຄະນິດສາດ ແລະ ວິຊາໂລກອ້ອມຕົວ ສະເພາະໃນສົກຮຽນ 2014-2015 ແມ່ນຈັດຂຶ້ນເປັນຄັ້ງທີ 6 ມີຕົວແທນນັກຮຽນເກັ່ງຂອງ 17 ແຂວງ 1 ນະຄອນຫຼວງວຽງຈັນ ເຂົ້າຮ່ວມການສອບເສັງວິຊາລະ 1 ຄົນ ມີຜູ້ເຂົ້າຮ່ວມການສອບເສັງທັງໝົດ 54 ຄົນ ຍິງ 37 ຄົນ ສ່ວນ ມ4 ແລະ ມ7 ສອບເສັງ 4 ວິຊາຄື: ວິຊາພາສາລາວ-ວັນນະຄະດີ ຄະນິດສາດ ຟີຊິກສາດ ແລະ ວິຊາເຄມີສາດ ລວມຜູ້ເຂົ້າສອບເສັງ ມ4 ແລະ ມ7 ມີທັງໝົດ 156 ຄົນ ຍິງ 52 ຄົນ ໃນນັ້ນ ຂັ້ນ ມ4 ມີ 72 ຄົນ 29 ຄົນ ຂັ້ນ ມ7 ມີທັງໝົດ 84 ຄົນ ຍິງ 24 ຄົນ.
ມາພ້ອມກັນຮ່ວມເປັນກຳລັງໃຈໃຫ້ກັບບັນດາຕົວແທນນັກຮຽນເກັ່ງ ທີ່ເຂົ້າຮ່ວມສອບເສັງແຂ່ງຂັນນັກຮຽນເກັ່ງລະດັບຊາດ ປະຈຳສົກຮຽນ 2014-2015 ວ່ານັກຮຽນໂຮງຮຽນໃດ ແລະ ແຂວງໃດ ຈະສາມາດຮັກສາມູນເຊື້ອ ແລະ ສ້າງສະຖິຕິໃໝ່ໃຫ້ກັບແຂວງຂອງຕົນ.
ແຫລ່ງຂ່າວ: ວຽງຈັນໃໝ່