ໂຮງຮຽນ​ນານາ​ຊາດ​ປັນຍາ​ທິບ ໄດ້​ຖືກ​ເຊື້ອ​ເຊີນ​ເຂົ້າ​ຮ່ວມງານ​ທາງ​ດ້ານ​ການ​ສຶກ​ສາ ​ທີ່​ເປັນຊັ້ນ​ນຳ​ໃນ​ພາກ​ພື້ນ​ອາຊີ ຢູ່​ຮົງ​ກົງ (The Asia Partnership Leadership Summit in Hong Kong) ວັນ​ທີ 18-20 ມີນາ 2015 ໂດຍ​ມີ​ທ່ານ Eddie Ng Hak-kim ເລຂາທິການ​ດ້ານ​ການ​ສຶກ​ສາ​ຮົງ​ກົງ ທ່ານ ​ສຈ.​ດຣ. ກອງ​ສີ ແສງ​ມະນີ ລັດຖະມົນຕີຊ່ວຍ​ວ່າການ​ກະຊວງ​ສຶກ​ສາ​ທິການ ແລະ ກີລາ ທ່ານນາງ ປາດ​ຖະ​ໜາ ປັນຍາ​ທິບ ຜູ້​ອຳນວຍ​ການ​ໂຮງຮຽນ​ນານາ​ຊາດປັນຍາ​ທິບ ພ້ອມ​ດ້ວຍ​ຄະນະ​ບໍລິ​ຫານ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ​ສຈ.​ດຣ. ກອງ​ສີ ແສງ​ມະນີ ໄດ້​ຖືກ​ເຊີນ​ເປັນ​ວິ​ທະຍາ​ກອນ ​ເຊິ່ງ​ໄດ້​ກ່າວ​ກ່ຽວ​ກັບການ​ເຝິກອົບຮົມ​ວິຊາ​ຊີບ​ທັງ​ດ້ານສ່ວນ​ບຸກຄົນ ແລະ ສ່ວນ​ລວມ ພ້ອມ​ນີ້ ທ່ານ John Gwyn Jones ຮອງ​ຜູ້ອຳນວຍການ​ໂຮງຮຽນ​ນານາ​ຊາດ​ປັນຍາ​ທິບ ກໍ່​ໄດ້ກ່າວ​ກ່ຽວ​ກັບ​ການ​ຮ່ວມ​ມື​ຂ້າມຊາຍ​ແດນ ແລະ ການ​ຮ່ວມ​ມື​ລະຫວ່າງ​ໂຮງຮຽນ​ຈາກ​ຫຼາຍໆ​ປະເທດ​ທີ່​ແຕກ​ຕ່າງ​ກັນ ເຊິ່ງ​ທ່ານ​ໄດ້ໃຫ້ການ​ສະໜັບສະໜູນ​ໂຮງຮຽນ ວິທະຍາໄລ ແລະ ຂະແໜງການສຶກ​ສາ​ຕ່າງໆ​ຂອງ​ລັດຖະບານ ເພື່ອ​ພັດທະນາ​ຄວາມ​ສຳພັນ​ກັບໂຮງຮຽນ​ຕ່າງໆ​ໃນ​ປະເທດ​ລາວ ໃຫ້​ແໜ້ນ​ແຟ້ນ​ຍິ່ງ​ຂຶ້ນ ພ້ອມ​ນີ້ ທ່ານ​ຍັງ​ເວົ້າ​ເຖິງ​ການ​ພັດທະນາຄວາມ​ສຳພັນ​ຂອງ​ໂຮງຮຽນ​ນານາ​ຊາດ​ປັນຍາ​ທິບ ຕໍ່​ໂຮງຮຽນນານາ​ຊາດ​ແຫ່ງ​ອື່ນໆ​ໃນ​ພາກພື້ນ​ອາຊີ ແລະ ແບ່ງປັນ​ປະສົບການ​ທີ່​ໄດ້​ເກີດ​ຂຶ້ນ​ໃນ​ມໍ່ໆ​ນີ້ນັ້ນ ກໍ່​ແມ່ນ​ນັກຮຽນ 4 ຄົນຂອງ​ໂຮງຮຽນ​ນານາ​ຊາດ​ປັນຍາ​ທິບ​ໄດ້​ໄປແລກປ່ຽນ​ຄວາມ​ຮູ້ ແລະ ປະສົບການ​ຢູ່​ໂຮງຮຽນ Prince of Wales Island International School ປະເທດ​ມາ​ເລ​ເຊຍ 3 ອາທິດ ແລະ ໃນ​ປີ​ນີ້​ໂຮງຮຽນດັ່ງກ່າວ​ ກໍ່​ຈະ​ມີ​ການ​ສົ່ງ​ນັກຮຽນຈຳນວນ​ໜຶ່ງ​ມາ​ປະເທດ​ລາວ ເພື່ອ​ດຳເນີນ​ການ​ດ້ານ​ການ​ບໍ​ລິການ​ຊຸມ​ຊົນ ​ກັບ​ໂຮງຮຽນ​ທີ່ຢູ່​ໃນເຂດ​ຫ່າງ​ໄກ​ສອກຫຼີກ.

ການ​ເຂົ້າ​ຮ່ວມ​ງານ​ຄັ້ງ​ນີ້ ​ໂຮງຮຽນ​ນານາ​ຊາດ​ປັນຍາ​ທິບ ຍັງໄດ້​ຮັບ​ລາງວັນ Leadership Partnership Award ເຊິ່ງເປັນ​ລາງວັນ​ອັນ​ຊົງ​ກຽດ ມອບໂດຍ​ທ່ານ ນາງ Julia Gillard ນາຍົກລັດຖະມົນຕີ​ຍິງ​ຄົນ​ທຳ​ອິດ ຂອງ​ປະເທດ​ອົດ​ສະ​ຕຣາ​ລີ ແລະ ຮັບ​ໂດຍ​ທ່ານ John Gwyn Jones.

ແຫລ່ງ​ຂ່າວ: ວຽງ​ຈັນ​ໃໝ່