ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ນະຄອນຫຼວງວຽງຈັນ ໄດ້ສ້າງຂະບວນການຄຳນັບຮັບຕ້ອນ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 60 ປີ 14 ເມສາ 1955-14 ເມສາ 2015 ຂຶ້ນໃນທ້າຍອາທິດທີ່ຜ່ານມາ ເປັນປະທານຂອງທ່ານ ບຸນຕາ ເທບພະວົງ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ນະຄອນຫຼວງວຽງຈັນ ເປັນກຽດເຂົ້າຮ່ວມຂອງທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ທ່ານ ດຣ. ວິໄລວົງ ບຸດດາຄຳ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ພ້ອມດ້ວຍທ່ານຮອງເຈົ້າຄອງ ເຈົ້າເມືອງ ເລຂາຄະນະບໍລິຫານງານຊາວໜຸ່ມເມືອງ ສະມາຊິກຊາວໜຸ່ມ ເຍົາວະຊົນຫຼາຍພັນຄົນ.
ທ່ານ ບຸນຕາ ເທບພະວົງ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ນະຄອນຫຼວງວຽງຈັນ ໄດ້ກ່າວວ່າ: ການຈັດງານໃນຄັ້ງນີ້ຂຶ້ນ ເພື່ອເປັນການເຕົ້າໂຮມຄວາມສາມັກຄີຮັກແພງອັນດູດດື່ມ ແລະ ເປັນການສ້າງຂະບວນການຊົມເຊີຍ ແລະ ກຽມສະເຫຼີມສະຫຼອງ 2 ວັນບຸນໃຫຍ່ປະຫວັດສາດຂອງຊາດ-ຂອງພັກ ຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ວັນສະຖາປະນາ ສປປ ລາວ ຄົບຮອບ 40 ປີ ແລະ ສິ່ງສຳຄັນທີ່ສຸດ ແມ່ນເພື່ອສ້າງຂະບວນການ ແລະ ກິດຈະກຳໃນການກະກຽມສະເຫຼີມສະຫຼອງວັນສ້າງຕັ້ງຊາວໜຸ່ມປະຊາຊົນ ປະຕິວັດລາວ ຄົບຮອບ 60 ປີ ເຊິ່ງປະກອບມີຫຼາຍກິດຈະກຳມະຫາສາມັກຄີ ອອກກຳລັງກາຍເພື່ອສຸຂະພາບພະລານາໄມ ເປັນຕົ້ນ ເຕັ້ນແອໂລບິດ ເພື່ອສຸຂະພາບ ແລະ ກີລາອື່ນໆ ລວມທັງຖາມ-ຕອບວິທະຍາສາດ ສ້າງຄວາມເບີກບານມ່ວນຊື່ນ ແລະ ເປັນຂະບວນຟົດຟື້ນ ເຊິ່ງງານໃນຄັ້ງນີ້ ເກີດຂຶ້ນໄດ້ຍ້ອນການຊີ້ນຳ-ນຳພາຢ່າງໃກ້ຊິດຂອງຄະນະປະຈຳພັກ ອົງການປົກຄອງນະຄອນຫຼວງວຽງຈັນ ສູນກາງຊາວໜຸ່ມປະຊາຊົນປະຕິວັດລາວ ແລະ ທຸກພາກສ່ວນ ທັງພາກລັດ ແລະ ເອກະຊົນ ທັງໄດ້ຮັບການສະໜັບສະໜູນ ໂດຍສະມາຄົມນັກທຸລະກິດໝຸ່ມ ນວ ນອກຈາກນີ້ ກິດຈະກຳສະເຫຼີມສະຫຼອງດັ່ງກ່າວແມ່ນ ຈະສືບຕໍ່ສ້າງຂະບວນການຢ່າງຕໍ່ເນື່ອງ ເພື່ອສ້າງຂະບວນການ ແລະ ສ້າງຄວາມຟົດຟື້ນມ່ວນຊື່ນຕ້ອນຮັບວັນດັ່ງກ່າວ.
ກຳລັງຊາວໜຸ່ມເປັນກຳລັງແຮງທີ່ໄວ້ເນື້ອເຊື່ອໃຈ ແລະ ຈົງຮັກພັກດີຂອງພັກປະຊາຊົນລາວ ແລະ ເປັນແກ່ນສານໃນການປະຈັນບານຮອບດ້ານ ຕາມແນວທາງນະໂຍບາຍຂອງພັກ ໂດຍການເສຍສະຫຼະເລືອດເນື້ອເຫື່ອແຮງ ແລະ ຊີວິດເພື່ອອຸທິດໃຫ້ແກ່ການປະຕິວັດຕະຫຼອດມາ ດັ່ງນັ້ນ ພັກປະຊາຊົນປະຕິວັດລາວ ຈິ່ງໄດ້ໃຫ້ນາມມະຍົດກັບຊາວໜຸ່ມ ໂດຍໃສ່ຊື່ດຽວກັນກັບພັກຄື: ຊາວໜຸ່ມປະຊາຊົນປະຕິວັດລາວ ນອກນັ້ນ ພັກຍັງຂະໜານນາມແກ່ຊາວໜຸ່ມວ່າເປັນແຂນຂວາຂອງພັກ ເປັນກະດູກສັນຫຼັງຂອງຊາດ ແລະ ປະທານ ໄກສອນ ພົມວິຫານ ອະດີດຜູ້ນຳທີ່ແສນເຄົາລົບຮັກ ກໍ່ໄດ້ຂະໜານນາມຕື່ມວ່າ “ຊາວໜຸ່ມປຽບສະເໝືອນນົກອິນຊີທີ່ບໍ່ຫວັ່ນກົວຕໍ່ພະຍຸລົມແດງ ເປັນສິນໄຊແຫ່ງຍຸກສະໄໝ ແລະ ໃນຄວາມເປັນຈິງແທ້ກໍ່ແມ່ນ”ບ່ອນໃດຍາກຊາວໜຸ່ມບຸກ-ບ່ອນໃດທຸກຊາວໜຸ່ມ ຜ່ານຜ່າ ບ່ອນໃດຊາດຕ້ອງການ ຊາວໜຸ່ມຂານອາສາຕະຫຼອດມາ.
ແຫລ່ງຂ່າວ: ວຽງຈັນໃໝ່