ກອງ​ປະຊຸມ​ໃຫຍ່​ຄັ້ງ​ທີ I ຂອງອົງຄະ​ນະ​ພັກ ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ໄດ້​ໄຂຂຶ້ນ​ໃນ​ລະຫວ່າງ​ວັນ​ທີ 09-10 ເມສາ 2015 ທີ່​ຫໍ​ປະຊຸມ​ແຫ່ງ​ຊາດ ນະຄອນຫຼວງ​ວຽງ​ຈັນ ໂດຍ​ການເປັນ​ປະທານ​ຂອງ​ສະຫາຍ ບັນດິດ.​ສຈ. ບໍ່​ວຽງ​ຄຳ ວົງ​ດາລາ ເລຂາ​ຄະນະ​ພັກ​ກະຊວງ ລັດ​ຖະ​ມົນຕີ​ວ່າການ ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ປະທານ​ວິ​ທະຍາ​ສາດ​ແຫ່ງ​ຊາດ ມີ​ບັນດາ​ສະຫາຍ​ຮອງ​ເລຂາ​ຄະນະ​ພັກ​ກະຊວງ ແຂກ​ຖືກ​ເຊີນ ສະຫາຍ​ສະມາ​ຊິກ​ພັກອ້ອມ​ຂ້າງ​ກະຊວງ ເຂົ້າ​ຮ່ວມກອງ​ປະຊຸມ​ຄັ້ງ​ນີ້ ຍັງໄດ້​ເປັນ​ກຽດ​ຕ້ອນຮັບສະຫາຍ ສົມ​ສະຫວາດ ເລັ່ງ​ສະ​ຫວັດ ກຳມະ​ການ​ກົມ​ການເມືອງ​ສູນ​ກາງພັກ ຮອງ​ນາຍົກລັດຖະມົນຕີ ຜູ້​ຊີ້​ນຳ​ວຽກ​ເສດຖະກິດ ການ​ຜະລິດ ແລະ ຈໍ​ລະ​ຈອນ ໃຫ້​ກຽດເຂົ້າ​ຮ່ວມ​ກອງ​ປະຊຸມ​ໃນ​ຄັ້ງ​ນີ້.

ທີ່​ປະຊຸມ​ໄດ້​ຮັບ​ຟັງ​ບົດ​ລາຍງານ​ການເມືອງ​ທັງ​ສອງ​ພາກ ຈາກ​ສະຫາຍ​ເລຂາ​ພັກ​ກະຊວງ ກ່ຽວ​ກັບ​ການຈັດຕັ້ງ​ປະຕິບັດວຽກ​ງານ​ໃນ​ໄລຍະ​ຜ່ານ​ມາ ແຕ່ 2011-2015 ແລະ ທິດ​ທາງ​ໃນຕໍ່ໜ້າ 2015-2020 ເພື່ອ​ພ້ອມກັນ​ຄົ້ນຄວ້າ​ປະກອບ​ຄຳ​ຄິດຄຳເຫັນ ຕີ​ລາຄາ​ຜົນງານ​ໄລຍະ​ຜ່ານມາ ແລະ ບັນຫາ​ຂໍ້ຄົງຄ້າງ​ທີ່​ຈະຕ້ອງ​ປັບປຸງ​ແກ້​ໄຂ ເພື່ອ​ເຮັດ​ໃຫ້ວຽກ​ງານ​ການ​ນຳພາ​ໃນ​ຂົງເຂດວິທະຍາສາດ ເຕັກ​ໂນ​ໂລ​ຊີ ທີ່ພວມ​ມີ​ບາດກ້າວ​ຂະຫຍາຍຕົວ​ຢູ່ແລ້ວ ໃຫ້​ໄດ້​ຮັບ​ການ​ເສີມ​ຂະຫຍາຍ​ຢ່າງ​ບໍ່​ຢຸດ​ຢັ້ງ.

ຕະຫຼອດ​ໄລຍະ 4 ປີຜ່ານມາ ເຊິ່ງ​ເປັນ​ໄລຍະ​ແຫ່ງ​ການ​ປັບປຸງຢ່າງ​ໃຫຍ່​ຫຼວງ ​ຮອບດ້ານ​ ແບບກ້າວ​ກະໂດດ ແລະ ມີ​ລັກສະນະບຸກ​ທະລຸຂອງ​ຂະແໜງ​ວິທະຍາສາດ ແລະ ເຕັກ​ໂນ​ໂລ​ຊີຂອງ​ປະເທດ​ເຮົາ ເຊິ່ງ​ໄລຍະ​ຜ່ານ​ມາ​ ພັກ-ລັດຖະບານ ແມ່ນ​ໄດ້​ເອົາໃຈໃສ່​ຕໍ່ວຽກ​ງານ​ດັ່ງກ່າວ ໄດ້​ສ້າງຕັ້ງ​ສະພາ​ວິທະຍາສາດ-ເຕັກນິກຂຶ້ນ​ໃນປີ 1987 ມີ​ການ​ປັບປຸງ​ສ້າງຕັ້ງເປັນ​ສະພາ​ວິທະຍາສາດ​ແຫ່ງຊາດ ໃນ​ປີ 2003 ໄດ້​ສ້າງຕັ້ງ​ອົງການ​ວິທະຍາສາດເຕັກ​ໂນ​ໂລ​ຊີ ແລະ ສິ່ງແວດລ້ອມຂຶ້ນ ໃນ​ປີ 1999 ເຊິ່ງ​ຫຼັງ​ມາ​ໄດ້​ມີ​ການ​ປັບປຸງ​ສັບ​ຊ້ອນ​ກົງຈັກ ເປັນ​ອົງການວິທະຍາສາດ ແລະ ເຕັກ​ໂນ​ໂລ​ຊີ ໃນ​ປີ 2007 ຈົນ​ມາ​ເຖິງ​ປີ 2011 ຍ້ອນ​ວ່າ​ເປັນ​ອົງຄະ​ນະ​ພັກສ້າງຕັ້ງ​ຂຶ້ນ​ໃໝ່ ແລະ ຄະນະ​ພັກ​ໄດ້​ຮັບການ​ແຕ່ງຕັ້ງ​ບົ່ງ​ຕົວ ສະນັ້ນ ຈຶ່ງ​ບໍ່ໄດ້​ເປີດ​ກອງ​ປະຊຸມ​ໃຫຍ່ ແຕ່​ກໍ່​ໄດ້ອີງໃສ່​ມະຕິ​ກອງ​ປະຊຸມ​ໃຫຍ່​ຄັ້ງ​ທີ IX ຂອງ​ພັກ ເພື່ອ​ຜັນ​ຂະຫຍາຍ ແລະ ຈັດ​ຕັ້ງ​ປະຕິບັດ​ໃນ​ການເຄື່ອນ​ໄຫວ​ຊີ້​ນຳໆ​ພາ​ຕົວ​ຈິງ ໄດ້​ມີການ​ຄົ້ນຄວ້າຊີ້​ນຳ​ຢ່າງ​ຈົດຈໍ່ ໄດ້​ມີ​ການ​ປັບປຸງ​ທາງ​ດ້ານ​ນິຕິ​ກຳທີ່​ກ່ຽວຂ້ອງ ຜັນ​ຂະຫຍາຍ​ເນື້ອ​ໃນ 4 ບຸກ​ທະລຸ ເຂົ້າ​ໃນ 6 ແຜນ​ຍຸດທະ​ສາດ​ການ​ພັດທະນາ​ວິທະຍາສາດ ແລະ ເຕັກ​ໂນ​ໂລ​ຊີຂອງ​ປະເທດ​ເຮົາ ​ໃນ​ໄລຍະປີ 2016-2025 ແລະ ວິໄສ​ທັດ ຮອດ​ປີ 2030.

ຜ່ານ​ການ​ປະຕິບັດ​ວຽກ​ງານຕົວ​ຈິງ ສາມາດ​ສ້າງ​ຜົນງານ​ໄດ້ຫຼາຍ​ດ້ານ ໂດຍ​ສະເພາະ ຜົນງານ​ທາງ​ດ້ານ​ກໍ່ສ້າງ​ພະນັກງານ ໄລຍະ 2011-2014 ໄດ້​ນຳພາ​ໜ່ວຍ​ພັກ​ຮາກ​ຖານ ເຄື່ອນໄຫວ​ປັບປຸງ​ກໍ່ສ້າງ​ພັກ ຈົນ​ສາມາດ​ຂະຫຍາຍ​ສະມາຊິກ​ພັກ ຈາກ 52 ສະຫາຍ ເພີ່ມ​ຂຶ້ນ​ເປັນ 123 ສະຫາຍ ສາມາດ​ຂະຫຍາຍໜ່ວຍ​ພັກ​ຈາກ 7 ໜ່ວຍ ເປັນ 13 ໜ່ວຍ​ພັກ ໄດ້​ມີ​ການ​ປັບປຸງ​ໃຫ້​ມີ 13 ໜ່ວຍ​ງານ​ລະດັບ​ກົມ ຄື: ຫ້ອງການ​ກະຊວງ 3 ກົມ​ເສນາ​ທິການ 5 ກົມ​ວິຊາ​ການ 3 ສະ​ຖາບັນ ແລະ ສຳເລັດ​ການ​ສ້າງຕັ້ງພະ​ແນກ​ວິທະຍາສາດ ແລະ ເຕັກໂນ​ໂລ​ຊີ ໃນ 18 ແຂວງທົ່ວ​ປະເທດ ແລະ ຫ້ອງການ​ວິທະຍາສາດ ແລະ ເຕັກ​ໂນ​ໂລ​ຊີຂັ້ນເມືອງ ໃນ 48 ເມືອງ 3 ສ້າງ ແລະ ຜົນງານ​ອື່ນໆ​ອີກເປັນ​ຈຳນວນ​ຫຼວງຫຼາຍ.

ສະເພາະ​ຄາດໝາຍ​ສູ້​ຊົນ​ໃນຕໍ່ໜ້າ ຈະ​ໄດ້​ສືບຕໍ່​ໂຄສະນາ​ເຜີຍແຜ່ ແລະ ເຊື່ອມ​ຊຶມ​ແນວທາງນະໂຍບາຍ​ຂອງ​ພັກ ໂດຍ​ສະເພາະ ແນວ​ຄິດ​ທິດ​ສະ​ດີ ແລະ ພຶດຕິ​ກຳ​ຂອງ​ພັກ ຈະ​ສ້າງ​ໜ່ວຍພັກ​ແຂງ​ຮູ້​ນຳພາ​ຮອບດ້ານ ຢ່າງໜ້ອຍ​ໃຫ້​ໄດ້ 70% ສ້າງ​ພະນັກງານ​ຄຸ້ມ​ຄອງທີ່​ມີ​ທັດສະນະ​ການເມືອງ​ໜັກ​ແໜ້ນ ຂັ້ນ​ກົມ​ໃຫ້​ໄດ້ຜ່ານ​ການ​ຍົກ​ລະດັບ​ທິດ​ສະ​ດີການເມືອງ​ຊັ້ນ​ສູງ ເພີ່ມ​ຂຶ້ນ​ຢ່າງໜ້ອຍ 20 ສະຫາຍ ຊັ້ນ​ກາງ​ຢ່າງໜ້ອຍ 100 ສະຫາຍ ຂະຫຍາຍ ແລະ ຮັບ​ສະມາຊິກ​ພັກ ແລະ ຮັບເອົາ​ມະຫາຊົນ​ຜູ້​ກ້າວໜ້າ​ທີ່​ມີຄຸນະພາບ ເຂົ້າ​ເປັນ​ສະມາຊິກ​ພັກ ໃຫ້​ມີ​ຈຳນວນ​ເພີ່ມ​ຂຶ້ນ ຢ່າງ​ໜ້ອຍ 250 ສະຫາຍ ທັງ​ໝົດ​ນີ້ ແມ່ນເພື່ອ​ແນໃສ່​ບຸກ​ທະລຸ ກຳລັງ​ການຜະລິດ​ຂອງ​ປະເທດ ຍົກ​ປະ​ສິດທິພາບ​ຂອງ​ການ​ຜະລິດ ແລະ ຄວາມ​ອາດ​ສາມາດ​ແຂ່ງຂັນຂອງ​ພາຍ​ໃນ ປະກອບສ່ວນ​ຢ່າງໜັກ​ແໜ້ນ ເຂົ້າ​ໃນ​ການ​ພັດ​ທະນາ​ເສດຖະກິດ-ສັງຄົມຂອງ​ປະເທດ.

ແຫລ່ງ​ຂ່າວ: ວຽງ​ຈັນ​ໃໝ່