ປະທານາທິບໍດີມຽນມາ ເປັນປະທານກອງປະຊຸມລົງນາມຢຸດຍິງທົ່ວປະເທດ ເພື່ອກ້າວເຂົ້າສູ່ປະຊາຄົມເສດຖະກິດອາຊຽນ ຫລື AEC.
ສຳນັກຂ່າວຕ່າງປະເທດ ລາຍງານໃນວັນທີ 1 ເມສານີ້ວ່າ ທ່ານ ເທັນ ເຊັນ ປະທານາທິບໍດີແຫ່ງສາທາລະນະລັດແຫ່ງສະຫະພາບມຽນມາ ໄດ້ເດີນທາງມາເປັນປະທານປິດກອງປະຊຸມ ຮ່ວມກັບບັນດາຜູ້ນຳ ແລະ ຜູ້ແທນຂອງຊົນເຜົ່າກຸ່ມນ້ອຍຈາກທົ່ວປະເທດ ເພື່ອຮ່ວມກັນລົງນາມຢຸດຍິງ ແລະ ຢຸຕິການສູ້ຮົບຕາມແນວຊາຍແດນທຸກພື້ນທີ່ກັບຊົນກຸ່ມນ້ອຍ ເຊິ່ງຖືວ່າເປັນກອງປະຊຸມຄັ້ງທີ 7 ໃນປີ 2015 ນີ້ ລະຫວ່າງຄະນະກຳມະການເຈລະຈາ ເພື່ອສ້າງສັນຕິພາບແຫ່ງສະຫະພາບ (UPWC) ນຳໂດຍ ທ່ານ ອ່ອງ ມິນ ລັດຖະມົນຕີປະຈຳທຳນຽບລັດຖະບານມຽນມາ ໃນຖານະຮອງຫົວໜ້າ UPWC ເຊິ່ງໄດ້ປະຊຸມ ແລະ ເຈລະຈາຮ່ວມກັບຄະນະກຳມະການເຈລະຈາຢຸຕິການສູ້ຮົບ ທີ່ມາຈາກຊົນເຜົ່າກຸ່ມນ້ອຍໃນທົ່ວປະເທດ ຢູ່ຫ້ອງປະຊຸມສູນສ້າງສັນຕິພາບມຽນມາ ຫລື MPC ໃນມະຫາວິທະຍາໄລຢາງກຸ້ງ ນະຄອນຢາງກຸ້ງ.
ການລົງນາມຢຸດຍິງດັ່ງກ່າວນີ້ ຖືເປັນຜົນສຳເລັດອັນໃຫຍ່ຫລວງ ສຳລັບລັດຖະບານມຽນມາ ແລະ ເປັນຄວາມຫວັງໃໝ່ຂອງຊາວມຽນມາ ກໍຄືຊາວອາຊຽນ ເພື່ອກ້າວເຂົ້າສູ່ປະຊາຄົມເສດຖະກິດອາຊຽນ ຫລື AEC ຢ່າງເຕັມຕົວ.