ກົມ​ຄຸ້ມ​ຄອງ​ສຳມະໂນ​ຄົວ ແລະ ກໍ່ສ້າງ​ຮາກ​ຖານ​ກະຊວງ​ປ້ອງ​ກັນຄວາມ​ສະຫງົບ ໄດ້​ຮ່ວມ​ກັບ​ບໍ​ລິສັດ ​ຮົວ​ເວ້​ເຕັກ​ໂນ​ໂລ​ຢີ​ລາວ ​ຈຳກັດ​ຜູ້​ດຽວ ໄດ້​ຈັດ​ພິທີ​ເປີດ​ການອອກ​ບັດປະຈຳຕົວ​ແບບ​ທັນ​ສະໄໝ ​ຢ່າງ​ເປັນ​ທາງ​ການ​ຂຶ້ນ​ວັນ​ທີ 30 ມີນາ 2015 ນີ້​ທີ່​ກົມ​ດັ່ງກ່າວ ໂດຍ​ມີ​ທ່ານ ​ພົ.ວ ສິນ​ທະ​ວົງ ໄຊຍະ​ກອນ ລັດຖະມົນຕີ​ຊ່ວຍ​ວ່າການ ​ກະຊວງ​ປ້ອງ​ກັນ​ຄວາມ​ສະຫງົບ ມີ​ທູດ​ເສດຖະກິດຈີນ ປະຈຳ​ລາວ ຫົວໜ້າ​ກົມ​ຄຸ້ມ​ຄອງ​ສຳມະໂນ​ຄົວ ແລະ ກໍ່ສ້າງ​ຮາກ​ຖານຜູ້ອຳນວຍການ​ບໍລິສັດ ​ຮົວ​ເວ້ເຕັກ​ໂນ​ໂລ​ຢີ​ລາວ ​ຈຳກັດ​ຜູ້​ດຽວ ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ ເຂົ້າ​ຮ່ວມ.

ໂຄງການ​ຄຸ້ມ​ຄອງ​ພົນລະເມືອງດ້ວຍ​ລະບົບ​ທັນ​ສະໄໝ ​ຂອງ​ກະຊວງ​ປ້ອງ​ກັນ​ຄວາມ​ສະຫງົບ (E-ID) ແມ່ນ​ໂຄງການ​ເງິນ​ກູ້​ຢືມຂອງ​ລັດຖະບານ​ລາວຮ່ວມ​ມື​ກັນ ລະຫວ່າງ​ກະຊວງ ປກສ ແລະ ບໍລິສັດ​ ຮົວ​ເວ້​ເຕັກ​ໂນ​ໂລ​ຢີ​ລາວ ເປົ້າ​ໝາຍ​ຂອງ​ໂຄງການ​ແມ່ນການ​ອອກ​ບັດປະຈຳຕົວ​ ດ້ວຍ​ລະບົບ​ເອ​ເລັກ​ໂຕຣ​ນິກ ໃຫ້​ແກ່​ປະຊາຊົນ​ລາວ​ບັນດາເຜົ່າ​ໃນ​ທົ່ວ​ປະເທດ​ ກວມ​ເອົາ​ໜຶ່ງ​ສູນ​ຜະລິດ​ບັດສູນ​ເກັບ​ກຳ​ຂໍ້​ມູນ ແລະ 160 ສະຖາ​ນີ​ປ້ອນ​ຂໍ້​ມູນ ແລະ ຈະ​ໄດ້​ຈັດຂຶ້ນ ມີ 3 ໄລຍະຄື: ໄລຍະ​ທີ 1 ຢູ່ກົມ ແລະ ນະຄອນຫຼວງ​ວຽງ​ຈັນ ໄລຍະ​ທີ 2 ມີ 2 ຊຸດ ຊຸດ​ລະ 3 ແຂວງ ລວມ 6 ແຂວງ ຄື: ແຂວງ​ອຸດົມ​ໄຊ ຫຼວງ​ພະ​ບາງ ຊຽງ​ຂວາງ ວຽງ​ຈັນ ໄຊ​ສົມບູນ ສະຫວັນ​ນະ​ເຂດ ແລະ ແຂວງຈຳປາ​ສັກ ໄລຍະ​ທີ 3 ມີ 2 ຊຸດ ຊຸດ​ລະ 5 ແຂວງ ລວມ 10 ແຂວງ ຄື: ແຂວງ​ຜົ້ງ​ສາລີ ຫຼວງນ້ຳ​ທາ ບໍ່​ແກ້ວ ໄຊ​ຍະ​ບູ​ລີ ຫົວພັນ ບໍ​ລິ​ຄຳ​ໄຊ ຄຳ​ມ່ວນ ສາລະ​ວັນ ເຊ​ກອງ ແລະ ແຂວງ​ອັດ​ຕະ​ປື ການ​ນຳ​ໃຊ້​ຮາດ​ແວ ແລະ ຊອບແວ ເຫັນ​ວ່າມາ​ຮອດ​ປັດຈຸບັນ ເຄື່ອງພິມ​ບັດປະຈຳຕົວ ​ສາມາດພິມ​ໄດ້ 1 ຊົ່ວໂມງຕໍ່ 457 ບັດ ໃນ 6 ຊົ່ວໂມງ ຈະ​ສາມາດ​ພິມໄດ້ 2.000 ບັດ ລວມ​ມູນ​ຄ່າໂຄງການ​ທັງ​ໝົດ 37.500.000 ໂດ​ລາ​ສະຫະລັດ ນອກຈາກ​ນັ້ນ ໂຄງການ​ຄຸ້ມ​ຄອງ​ພົນລະເມືອງດ້ວຍ​ລະບົບ​ທັນ​ສະໄໝ (E-ID) ແລ້ວ ຍັງ​ມີ​ໂຄງການ​ສາຍດ່ວນ​ລັດຖະບານ ແລະ ໂຄງການ​ກອງ​ບັນຊາ​ການ​ຕຳຫຼວດທັນ​ສະໄໝ​ສອງ​ໂຄງການ​ດັ່ງກ່າວ​ນີ້ ແມ່ນ​ໄດ້​ສຳເລັດ​ການມອບ​ຮັບ​ເປັນ​ທີ່​ຮຽບ​ຮ້ອຍ​ແລ້ວ ແລະ ຈະ​ຈັດ​ພິທີ​ມອບ-ຮັບ​ເປັນທາງ​ການ​ໃນ​ໄວໆ​ນີ້.

ແຫລ່ງ​ຂ່າວ: ວຽງ​ຈັນ​ໃໝ່