ໃນຕອນບ່າຍຂອງວັນທີ 30 ມີນາ 2015 ທ່ານ ຢຽນ ຕູນ ຮອງປະທານາທິບໍດີ ແຫ່ງ ສສ ມຽນມາ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງຢ້ຽມຢາມສັນຖະວະໄມຕີ ແລະ ເຮັດວຽກຢ່າງເປັນທາງການຢູ່ ສປປ ລາວ ຕາມຄຳເຊີນຂອງທ່ານ ບຸນຍັງ ວໍລະຈິດ ຮອງປະທານປະເທດ ແຫ່ງ ສປປ ລາວ ໃນລະຫວ່າງວັນທີ 30 ມີນາ ຫາ 01 ເມສາ 2015 ເພື່ອຮັດແໜ້ນສາຍພົວພັນມິດຕະພາບທີ່ມີມູນເຊື້ອ ແລະ ເສີມຂະຫຍາຍການຮ່ວມມືອັນດີງາມຂອງສອງປະເທດ ລາວ-ມຽນມາ ໃຫ້ແຕກດອກອອກຜົນຍິ່ງຂຶ້ນໄປ.
ພິທີຕ້ອນຮັບທ່ານຮອງປະທານາທິບໍດີ ແຫ່ງ ສສ ມຽນມາ ພ້ອມດ້ວຍພັນລະຍາ ແລະ ຄະນະຢ່າງເປັນທາງການ ໄດ້ຈັດຂຶ້ນຢ່າງສົມກຽດ ທີ່ທຳນຽບປະທານປະເທດ (ຫໍຄຳ) ໂດຍທ່ານ ບຸນຍັງ ວໍລະຈິດ ຮອງປະທານປະເທດ ແລະ ພັນລະຍາ ພ້ອມດ້ວຍບັນດາທ່ານໃນຄະນະລັດຖະບານ ແລະ ພະນັກງານຂັ້ນສູງຈາກຂະແໜງການຕ່າງໆເຂົ້າຮ່ວມ ຈາກນັ້ນກໍ່ມີການພົບປະລະຫວ່າງສອງຝ່າຍຢ່າງເປັນທາງການຂຶ້ນ ທີ່ທຳນຽບປະທານປະເທດ ຝ່າຍລາວນຳໂດຍທ່ານ ບຸນຍັງ ວໍລະຈິດ ຝ່າຍມຽນມານຳໂດຍທ່ານ ຢຽນ ຕູນ ເຊິ່ງການພົບປະໃນຄັ້ງນີ້ ທັງສອງຝ່າຍໄດ້ແຈ້ງໃຫ້ຊາບກ່ຽວກັບສະພາບການພົ້ນເດັ່ນ ພາຍໃນປະເທດຂອງຕົນ ແລກປ່ຽນທັດສະນະ ແລະ ຄຳຄິດຄຳເຫັນຕໍ່ກັບສະພາບການສາກົນ ແລະ ພາກພື້ນ ທີ່ຕ່າງຝ່າຍມີຄວາມສົນໃຈ.
ໂດຍສະເພາະ ທັງສອງຝ່າຍໄດ້ຊົມເຊີຍຜົນສຳເລັດຂອງກອງປະຊູມ ຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍ ລາວ-ມຽນມາ ມຽນມາ-ລາວ ຄັ້ງທີ 11 ໃນວັນທີ 2-3 ມີນາ 2015 ທີ່ນະຄອນຫຼວງເນປີດໍ ເຊິ່ງສາມາດຕົກລົງຮ່ວມມືກັນຫຼາຍດ້ານ ເວົ້າລວມ ແມ່ນກົນໄກການພົວພັນ ແລະ ຮ່ວມມື ໃນຂະແໜງຕ່າງໆ ພ້ອມທັງເຫັນດີ ຊຸກຍູ້ຂະແໜງການທີ່ກ່ຽວຂ້ອງຕ່າງໆ ໃຫ້ເພີ່ມທະວີຜັນຂະຫຍາຍເນື້ອໃນຈິດໃຈຂອງກອງປະຊຸມດັ່ງກ່າວ ໃຫ້ໄດ້ຮັບການຈັດຕັ້ງປະຕິບັດເປັນຮູບປະທຳ.
ພິເສດ ທັງສອງຝ່າຍຍັງໄດ້ຊົມເຊີຍຕໍ່ຜົນສຳເລັດ ໂຄງການກໍ່ສ້າງຂົວມິດຕະພາບຂ້າມແມ່ນ້ຳຂອງ ລາວ-ມຽນມາ ເຫັນວ່າມີຄວາມຄືບໜ້າ ແລະ ສຳເລັດເກືອບ 100% ເຊິ່ງຈະຈັດໃຫ້ມີພິທີເປີດນຳໃຊ້ຂົວຢ່າງເປັນທາງການ ໃນວັນທີ 8 ພຶດສະພາ 2015 ທີ່ຈະມາເຖິງນີ້ ຈາກນັ້ນ ທີ່ທຳນຽບປະທານປະເທດ ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ຢຽນ ຕູນ ຮອງປະທານາທິບໍດີ ແຫ່ງ ສສ ມຽນມາ ພ້ອມດ້ວຍຄະນະ ທີ່ເດີນທາງມາຢ້ຽມຢາມສັນຖະວະໄມຕີຢູ່ ສປປ ລາວ.
ໂອກາດດັ່ງກ່າວ ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ໄດ້ສະແດງຄວາມຕ້ອນຮັບດ້ວຍບັນຍາກາດຢ່າງອົບອຸ່ນ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນໃນການເພີ່ມພູນຄູນສ້າງ ສາຍພົວພັນຮ່ວມມືຂອງສອງປະເທດທີ່ມີມາແຕ່ດົນນານ ເປັນການຮັດແໜ້ນສາຍພົວພັນມິດຕະພາບອັນເປັນມູນເຊື້ອອັນດີງາມ ລະຫວ່າງປະຊາຊົນສອງຊາດ ການຮ່ວມມືອັນໃກ້ສິດຖານບ້ານໃກ້ເຮືອນຄຽງ ລະຫວ່າງ ສປປ ລາວ ແລະ ສສ ມຽນມາ ໃຫ້ແໜ້ນແຟ້ນ ແລະ ມີປະສິດທິຜົນສູງຂຶ້ນ.
ທ່ານ ຢຽນ ຕູນ ຮອງປະທານາທິບໍດີ ແຫ່ງ ສສ ມຽນມາ ໄດ້ສະແດງຄວາມຂອບໃຈ ຕໍ່ທ່ານປະທານປະເທດ ທີ່ໄດ້ເສຍສະຫຼະເວລາໃຫ້ການຕ້ອນຮັບອັນອົບອຸ່ນ ແລະ ການອຳນວຍຄວາມສະດວກໃນການເດີນທາງມາຢ້ຽມຢາມໃນຄັ້ງນີ້ ພ້ອມທັງຕີລາສູງຕໍ່ຜົນສຳເລັດອັນພົ້ນເດັ່ນທີ່ ສປປ ລາວ ຍາດມາໄດ້ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນຊຸມປີຜ່ານມາ ໂດຍສະເພາະ ຜົນສຳເລັດການຈັດຕັ້ງປະຕິບັດ ມະຕິກອງປະຊຸມໃຫຍ່ຂອງພັກ ຄັ້ງທີ 9 ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 7 ທີ່ໄດ້ຮັບໝາກຜົນອັນສຳຄັນຫຼາຍປະການ ຈົນປາກົດພົ້ນເດັ່ນໃນພາກພື້ນ ແລະ ສາກົນ.
ໃນເວລາຕໍ່ມາ ທາງຄະນະຜູ້ແທນດັ່ງກ່າວ ກໍ່ໄດ້ເດີນທາງໄປຫ້ອງວ່າການລັດຖະບານ ເພື່ອພົບປະຢ້ຽມຢາມ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ໃນໂອກາດທີ່ເດີນທາງມາຢ້ຽມຢາມໃນຄັ້ງນີ້ ອີກດ້ວຍ.
ໃນຕອນຄ່ຳຂອງວັນດຽວກັນ ທ່ານ ບຸນຍັງ ວໍລະຈິດ ພ້ອມດ້ວຍພັນລະຍາ ໄດ້ຈັດງານລ້ຽງຮັບຮອງເປັນກຽດຕ້ອນຮັບທ່ານ ຢຽນ ຕູນ ແລະ ພັນລະຍາ ພ້ອມດ້ວຍຄະນະ ທີ່ທຳນຽບປະທານປະເທດ ດ້ວຍບັນຍາກາດອັນສະໜິດສະໜົມ ອົບອຸ່ນ ຖານບ້ານໃກ້ເຮືອນຄຽງປະເທດເພື່ອນມິດ.
ແຫລ່ງຂ່າວ: ວຽງຈັນໃໝ່