ບໍລິສັດແອວຈີ ເອເລັກໂຕນິກ (LG) ຂອງເກົາຫລີໃຕ້ ເປີດຖານການຜະລິດແຫ່ງໃໝ່ໃນຫວຽດນາມ ເພື່ອຜະລິດສິນຄ້າສຳຄັນສຳລັບການສົ່ງອອກ.
ສຳນັກຂ່າວຕ່າງປະເທດ ລາຍງານໃນວັນທີ 30 ມີນາຜ່ານມານີ້ວ່າ ໃນມື້ວັນທີ 27 ມີນາ ໄດ້ມີພິທີເປີດຖານການຜະລິດແຫ່ງໃໝ່ ຂອງບໍລິສັດແອວຈີ ຢູ່ນະຄອນຮາຍຟອງ (Hai Phong) ທາງພາກເໜືອຂອງປະເທດຫວຽດນາມ ເທິງເນື້ອທີ່ 8 ແສນຕາແມັດ ເພື່ອຜະລິດສິນຄ້າເອເລັກໂຕນິກ ໃນລາຄາທີ່ສາມາດແຂ່ງຂັນໄດ້ ເຊິ່ງປະກອບມີໂທລະພາບ ແລະ ສະມາດໂຟນ ເພື່ອສົ່ງອອກຈຳໜ່າຍໃນທົ່ວໂລກ.
ບໍລິສັດ ແອວຈີ ໄດ້ວາງແຜນຈະລົງທຶນປະມານ 1,5 ຕື້ໂດລາສະຫະລັດ ຕໍ່ສູນການຜະລິດຄົບວົງຈອນຢູ່ນະຄອນຮາຍຟອງນີ້ ໄປຈົນເຖິງປີ 2028 ໂດຍປັດຈຸບັນ ບໍລິສັດແອວຈີ ມີໂຮງງານໃນຫວຽດນາມແລ້ວ 2 ແຫ່ງຄື ໂຮງງານໃນແຂວງຮຶງອຽນ (Hung Yen) ທີ່ສາມາດຜະລິດສະມາດໂຟນ ແລະ ໂທລະພາບ, ສ່ວນອີກໂຮງງານໜຶ່ງແມ່ນຢູ່ໃນນະຄອນຮາຍຟອງນີ້ ເຊິ່ງຜະລິດຈັກຊັກເຄື່ອງ, ເຄື່ອງປັບອາກາດ ແລະ ເຄື່ອງດູດຝຸ່ນ ເຊິ່ງທັງໝົດ 2 ໂຮງງານດັ່ງກ່າວ ແມ່ນມີແຜນຈະຖືກຍົກຍ້າຍເຂົ້າມາໄວ້ໃນສູນຜະລິດນະຄອນຮາຍຟອງບ່ອນດຽວ.
ບໍລິສັດແອວຈີ ເປັນຜູ້ຜະລິດໂທລະພາບລາຍໃຫຍ່ອັນດັບ 2 ຂອງໂລກ ເຊິ່ງມີແຜນຈະຍ້າຍສາຍການຜະລິດໂທລະພາບ ຈາກບໍລິສັດທີ່ຢູ່ພາຍໃນປະເທດໄທ ໄປຜະລິດຢູ່ຫວຽດນາມແທນ ເນື່ອງຈາກມີປະສິດທິພາບດ້ານການຈັດສົ່ງສິນຄ້າ ແລະ ຄ່າໃຊ້ຈ່າຍ ຕາມການລະບຸຂອງຜູ້ບໍລິຫານລະດັບສູງຢູ່ປະເທດໄທ, ໂດຍທາງກຸ່ມບໍລິສັດຕ້ອງການຈະມີຖານການຜະລິດ ທີ່ມີຄຸນນະພາບທຽບເທົ່າກັບໂຮງງານຢູ່ເກົາຫລີໃຕ້ ເຊິ່ງພິຈາລະນາແລ້ວເຫັນວ່າ ຢູ່ຫວຽດນາມເປັນສະຖານທີ່ທີ່ເໝາະສົມທີ່ສຸດ.