ພິທີສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ໄດ້ຈັດຂຶ້ນຢ່າງຍິ່ງໃຫຍ່ ໃນຕອນເຊົ້າວັນທີ 21 ມີນາ 2015 ເຊິ່ງເລີ່ມຈາກຄະນະບໍລິຫານງານສູນກາງພັກ ເຊິ່ງນຳໂດຍສະຫາຍ ບຸນຍັງ ວໍລະຈິດ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ເຂົ້າວາງພວງມາລາຢູ່ອະນຸສາວະລີນັກຮົບນິລະນາມ ແລະ ວາງກະຕ່າດອກໄມ້ທີ່ຮູບປັ້ນປະທານ ໄກສອນ ພົມວິຫານ ຢູ່ຫໍພິພິທະພັນ ໄກສອນ ພົມວິຫານ ເພື່ອສະແດງຄວາມເຄົາລົບຮັກ ຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ ນ້ຳໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງບັນພະບູລຸດລາວ ກໍ່ຄືບັນດານັກຮົບປະຕິວັດ ທີ່ເສຍສະຫຼະຊີວິດເລືອດເນື້ອເພື່ອປະເທດຊາດ ແລະ ປະຊາຊົນຢ່າງອົງອາດກ້າຫານ ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ຈົນໄດ້ຮັບໄຊຊະນະ ແລະ ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ເຊິ່ງຄຸນງາມຄວາມດີ ແລະ ຜົນງານອັນໃຫຍ່ຫຼວງດັ່ງກ່າວ ໄດ້ຖືກຈາລຶກໄວ້ໃນຊີວິດຈິດໃຈຂອງທົ່ວປວງຊົນລາວທັງຊາດ ຕະຫຼອດໄປ.
ຈາກນັ້ນ ກໍ່ໄດ້ມີພິທີໂຮມຊຸມນຸມໃຫຍ່ສະເຫຼີມສະຫຼອງ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ຢູ່ຫໍປະຊຸມແຫ່ງຊາດ ໂດຍມີພະເຖລານຸເຖລະ ສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ສະຫາຍ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ ອະດີດປະທານປະເທດ ພ້ອມດ້ວຍບັນດາສະຫາຍກຳມະການກົມການເມືອງສູນກາງພັກ ເລຂາທິການສູນກາງພັກ ກຳມະການສູນກາງພັກ ອະດີດການນຳວິລະຊົນແຫ່ງຊາດ ພະນັກງານອາວຸໂສບຳນານ ພະນັກງານຫຼັກແຫຼ່ງຈາກກະຊວງ ອົງການນະຄອນຫຼວງ ທະຫານ ຕຳຫຼວດ ນັກທຸລະກິດ ຊາວໜຸ່ມ ແລະ ພາກສ່ວນຕ່າງໆເຂົ້າຮ່ວມຢ່າງພ້ອມພຽງ.
ສະຫາຍ ຈູມມາລີ ໄຊຍະສອນ ໄດ້ກ່າວບາງຕອນສຳຄັນວ່າ: ກ່ອນໜ້ານີ້ 60 ປີ ຄືວັນທີ 22 ມີນາ 1955 ພັກປະຊາຊົນລາວ (ເຊິ່ງປັດຈຸບັນແມ່ນພັກປະຊາຊົນປະຕິວັດລາວ) ໄດ້ຮັບການສ້າງຕັ້ງຂຶ້ນ ໂດຍແມ່ນສະຫາຍ ໄກສອນ ພົມວິຫານ ເປັນຫົວໜ້າ ເພື່ອສືບທອດພາລະກິດອັນສະຫງ່າງາມຂອງພັກກອມມູນິດອິນດູຈີນ ໃນການນຳພາຂະບວນການປະຕິວັດຂອງປະເທດເຮົາໂດຍກົງ ການກຳເນີດເກີດຂຶ້ນຂອງພັກ ແມ່ນຂີດໝາຍ ແລະ ເປັນບາດລ້ຽວປະຫວັດສາດອັນສຳຄັນຍິ່ງ ໃນວິວັດທະນາການຂອງຊາດລາວເຮົາ ເຊິ່ງນັບແຕ່ນັ້ນມາ ຂະບວນການຮັກຊາດຂອງປະຊາຊົນ ໄດ້ກ້າວຂຶ້ນສູ່ຄຸນະພາບໃໝ່ແຫ່ງການຕໍ່ສູ້ປົດປ່ອຍປະເທດຊາດ ປົດປ່ອຍປະຊາຊົນ ທັງເປັນການເປີດເສັ້ນທາງອັນສະຫວ່າງສະໄຫວ ແຫ່ງການນຳພາຊາດລາວ ກ້າວໄປສູ່ຄວາມເປັນເອກະລາດ ແລະ ສ້າງສາບ້ານເມືອງໄປສູ່ຄວາມວັດທະນາຖາວອນ.
ເມື່ອທົບທວນຄືນເສັ້ນທາງແຫ່ງການຕໍ່ສູ້ອັນລະອິດລະອ້ຽວ ແລະ ມີໄຊສະຫງ່າງາມຂອງຊາດເຮົາ ປະຊາຊົນບັນດາເຜົ່າ ມີຄວາມເອກອ້າງທະນົງໃຈຢ່າງຫາອັນປຽບບໍ່ໄດ້ ທີ່ເຫັນວ່າ 60 ປີຜ່ານມາ ພັກໄດ້ນຳພາທົ່ວປວງຊົນບັນດາເຜົ່າ ດຳເນີນການຕໍ່ສູ້ຕ້ານການຮຸກຮານ ແລະ ແຊກແຊງຂອງພວກຈັກກະພັດລ່າເມືອງຂຶ້ນ ເຮັດສຳເລັດພາລະກິດປົດປ່ອຍຊາດ ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນ ແລະ ຍາດເອົາຜົນສຳເລັດໃນການຮຳບາດແຜສົງຄາມ ສ້າງສາພັດທະນາປະເທດຊາດຕາມແນວທາງປ່ຽນແປງໃໝ່ ເຮັດໃຫ້ປະເທດຊາດຂອງພວກເຮົາ ມີທີ່ຕັ້ງອັນສົມກຽດ ໃນວົງຄະນາຍາດສາກົນ.
ເພື່ອສືບຕໍ່ນຳເອົາການປະຕິວັດຂອງປະເທດເຮົາກ້າວຂຶ້ນຢ່າງບໍ່ຢຸດ ຢັ້ງ ພັກເຮົາໄດ້ຄົ້ນຄວ້າຊອກຫາເສັ້ນທາງເດີນ ທີ່ແທດເໝາະກັບຈຸດພິເສດຂອງປະເທດເຮົາໃນໄລຍະໃໝ່ ອັນພົ້ນເດັ່ນທີ່ສຸດແມ່ນ ນັບແຕ່ປີ 1986 ເປັນຕົ້ນມາ ພັກເຮົາໂດຍແມ່ນປະທານ ໄກສອນ ພົມວິຫານ ທີ່ເຄົາລົບຮັກເປັນຜູ້ນຳໜ້າ ໄດ້ເປັນເຈົ້າການວາງແນວທາງປ່ຽນແປງໃໝ່ຮອບດ້ານ ແລະ ມີຫຼັກການ ໃນນັ້ນອັນພື້ນຖານກວ່າໝູ່ແມ່ນໄດ້ກຳນົດເສັ້ນທາງກ້າວຂຶ້ນຂອງປະເທດ ຊາດຄືນໃໝ່ ໂດຍປ່ຽນຈາກການກ້າວຂຶ້ນສັງຄົມນິຍົມໂດຍກົງ ມາເປັນການສືບຕໍ່ສ້າງ ແລະ ບູລະນະລະບອບປະຊາທິປະໄຕປະຊາຊົນ ສ້າງບັນດາປະຖົມປັດໄຈເພື່ອກ້າວຂຶ້ນສັງຄົມນິຍົມເທື່ອລະກ້າວ ໄດ້ຫັນປ່ຽນຈາກກົນໄກເສດຖະກິດລວມສູນອາດຍາສິດ ບໍລິຫານເກື້ອກູນ ໄປສູ່ກົນໄກເສດຖະກິດຕະຫຼາດທີ່ມີການຄຸ້ມຄອງຂອງລັດ ເຕົ້າໂຮມຄວາມສາມັກຄີທົ່ວປວງຊົນ ເພື່ອປົກປັກຮັກສາ ແລະ ສ້າງສາພັດທະນາລະບອບໃໝ່ ຖືເອົາການສ້າງສາພັດທະນາເສດຖະກິດເປັນໜ້າທີ່ໃຈກາງ ໂດຍເສີມຂະຫຍາຍກຳລັງແຮງຂອງທຸກພາກສ່ວນເສດຖະກິດ ທີ່ມີຄວາມສະເໝີພາບຕໍ່ໜ້າກົດໝາຍ ຕິດພັນກັບການເປີດກວ້າງຮ່ວມມືກັບສາກົນ.
ພຶດຕິກຳໄດ້ພິສູດໃຫ້ເຫັນວ່າ ແນວທາງປ່ຽນແປງໃໝ່ທີ່ພັກເຮົາໄດ້ວາງອອກນັ້ນແມ່ນຖືກຕ້ອງ ແລະ ໄດ້ຮັບການສະໜັບສະໜູນຈາກປວງຊົນທັງຊາດ ກໍ່ຄືເພື່ອນມິດສາກົນ ຍ້ອນແນວນັ້ນ ເຖິງວ່າສະຖານະການຂອງໂລກໄດ້ຜັນແປໄປຢ່າງໄວວາ ແລະ ສັບສົນກໍ່ຕາມ ແຕ່ພາລະກິດປ່ຽນແປງໃໝ່ກໍ່ໄດ້ຮັບໝາກຜົນອັນສຳຄັນ ແລະ ເປັນພື້ນຖານໃນຫຼາຍດ້ານສະຖຽນລະພາບທາງດ້ານການເມືອງມີຄວມໜັກແໜ້ນ ກຳລັງແຮງຂອງຊາດໄດ້ຮັບການເສີມຂະຫຍາຍ ດ້ວຍຂະບວນການສ້າງສາພັດທະນາທີ່ມີຊີວິດຊີວາ ເສດຖະກິດມີການຂະຫຍາຍຕົວດ້ວຍຈັງຫວະຢ່າງຕໍ່ເນື່ອງ ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນຢ່າງຈະແຈ້ງ ການພົວພັນຮ່ວມມືກັບພາຍນອກໄດ້ຮັບການເປີດກວ້າງ ບົດບາດອິດທິພົນຂອງປະເທດເຮົາໃນເວທີສາກົນ ກໍ່ໄດ້ຮັບການປັບປຸງເພີ່ມທະວີສູງຂຶ້ນຢ່າງເດັ່ນຊັດ.
ໝາກຜົນທີ່ພວກເຮົາຍາດມາໄດ້ 60 ປີຜ່ານມາແມ່ນໃຫຍ່ຫຼວງແທ້ໆ ແຕ່ພວກເຮົາກໍ່ຕ້ອງຮັບຮູ້ໃຫ້ຈະແຈ້ງວ່າ ບົນເສັ້ນທາງແຫ່ງການກ້າວຂຶ້ນນັ້ນ ພວກເຮົາຍັງປະສົບກັບສິ່ງທ້າທາຍທົດສອບຕ່າງໆ ສະນັ້ນ ພວກເຮົາຕ້ອງສືບຕໍ່ບຸກບືນກ້າວຂຶ້ນໃຫ້ແຂງແຮງກວ່າເກົ່າ ຕາມແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ ໂດຍຖືເອົາການສ້າງເສດຖະກິດເປັນໜ້າທີ່ໃຈກາງ ຕິດພັນກັບການພັດທະນາສັງຄົມ ແລະ ການປົກປັກຮັກສາສິ່ງແວດລ້ອມຕາມທິດຍືນຍົງ ໃນສະເພາະໜ້ານີ້ ຕ້ອງສຸມໃສ່ແກ້ໄຂບັນຫາຄວາມທຸກຍາກຂອງປະຊາຊົນ ນຳເອົາປະເທດຊາດໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ສ້າງພື້ນຖານອັນໜັກແໜ້ນໃຫ້ການພັດທະນາປະເທດຊາດ ໄປສູ່ຈຸດໝາຍສັງຄົມນິຍົມເທື່ອລະກ້າວ.
ແຫລ່ງຂ່າວ: ວຽງຈັນໃໝ່