ເພື່ອ​ແກ້​ໄຂ​ບັນເທົາ​ທຸກ-ໃຫ້ພໍ່​ແມ່​ປະຊາຊົນ ເມືອງ​ຫາດ​ຊາຍຟອງ ນະຄອນຫຼວງ​ວຽງ​ຈັນ ໂດຍສະເພາະ ຜູ້​ທີ່​ໄດ້​ຮັບ​ຜົນ​ກະທົບຈາກ​ລົມ​ພະຍຸ​ພັດ​ໃນ​ຄັ້ງ​ວັນ​ທີ 18 ກຸມພາ 2015 ທີ່​ຜ່ານ​ມາ.

ວັນ​ທີ 18 ມີນາ 2015 ຢູ່​ທີ່ສຳນັກງານ​ອົງການ​ປົກຄອງເມືອງ​ຫາດ​ຊາຍ​ຟອງ​ກະຊວງ ແຮງ​ງານ ແລະ ສະຫວັດດີ​ການ-ສັງຄົມ ຮ່ວມ​ກັບ​ພະ​ແນກ​ແຮງ​ງານ ແລະ ສະຫວັດດີ​ການ-ສັງຄົມ​ ນະຄອນຫຼວງ​ວຽງ​ຈັນ ນຳໂດຍ​ທ່ານ ຄຳ​ຂານ ພິນ​ສະຫວັນ ຫົວໜ້າ​ຫ້ອງການ ກະຊວງ​ແຮງງານ ແລະ ສະຫວັດດີ​ການ-ສັງຄົມ ແລະ ທ່ານ​ນາງ ດຳ​ດວນ ຈັນທະ​ວົງ ຫົວໜ້າ​ພະ​ແນກ​ແຮງງານ ແລະ ສະຫວັດດີ​ການ-ສັງຄົມ ນະຄອນຫຼວງ​ວຽງ​ຈັນ ໄດ້ມອບ​ເຄື່ອງ​ຊ່ວຍເຫຼືອ​ຜູ້​ປະສົບເຄາະ​ຮ້າຍ ​ຈາກ​ໄພພິບັດ​ຈາກ​ທຳມະ​ຊາດ ເຊິ່ງ​ເຄື່ອງ​ທີ່​ນຳ​ມາ​ມອບໃນ​ຄັ້ງ​ນີ້ ມີ​ສັງກະສີ ຈຳນວນ 3.470 ແຜ່ນ ແລະ ເຫຼັກ​ຕະປູ ຈຳນວນ 995 ກິ​ໂລ ລວມ​ມູນຄ່າ​ທັງ​ໝົດ 125 ລ້ານ​ກີບ ໃຫ້ກຽດ​ຮັບ​ຂອງ​ທ່ານ ຄຳ​ແຖ່ງ ດວງພະຈັນ ຮອງ​ເຈົ້າເມືອງ​ຫາດ​ຊາຍຟອງ ມີ​ພະນັກງານ​ອ້ອມ​ຂ້າງ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ແຫລ່ງ​ຂ່າວ: ວຽງ​ຈັນ​ໃໝ່