ຄອນແທກເລນທີ່ກາຍເປັນໜຶ່ງໃນແຟຊັນຂອງສາວໆບໍ່ວ່າຈະເປັນສາວໆທີ່ມີບັນຫາທາງສາຍຕາຫລືບໍ່ກໍຕາມເພາະນອກຈາກຈະສາມາດໃຊ້ແທນແວ່ນສາຍຕາໄດ້ແລ້ວດຽວນີ້ກໍຍັງມີທັງສີສັນແລະລາຍໃຫ້ເລືອກຫລາຍແຖມຍັງຊ່ວຍໃຫ້ຕາເບິ່ງໃຫຍ່ໜ້າຮັກຄືສາວເກົາຫລີນໍາອີກຊຶ່ງບາງຄົົນທີ່ຮູ້ຈັກວິທີການໃຊ້ແລະເຮັດຄວາມສະອາດຄອນແທກເລນກໍຄົງຈະບໍ່ຄ່ອຍປະສົບບັນຫາຫຍັງເທົ່າໃດແຕ່ກໍຍັງມີອີກສ່ວນຫນຶ່ງທີ່ໃຊ້ຄອນແທກເລນກັນແບບບໍ່ລະມັດລະວັງເຊັ່ນສາວຊາວໄຕ້ຫວັນຄົນນີ້ທີ່ເວັບໄຊMedical Dailyຈັບມາເປັນອຸທາຫອນສອນໃຈຄົົນທີ່ໃຊ້ຄອນແທກເລນເປັນປະຈຳກັນໃຜທີ່ບໍ່ມັກຖອດຄອນແທກເລນຫລືໃສ່ຄອນແທກເລນຕອນນອນຫລັບໃນເວລາກາງຄືນເຫັນແລ້ວຈະຕ້ອງຮີບປ່ຽນໃຈ
ສາວຊາວໄຕ້ຫວັນນີ້ມີນາມວ່າLian Kaoນັກສຶກສາໃນລະດັບມະຫາວິທະຍາໄລອາຍຸ 23ປີທີ່ຖືກແພດກວດພົບວ່າດວງຕາຂອງນາງກຳລັງຕິດເຊື້ອຢ່າງຮຸນແຮງຊຶ່ງເກີດຈາກການທີ່ນາງບໍ່ຍອມຖອດຄອນແທກເລນເປັນເວລາເຖິງ6ເດືອນໂດຍເຊື້ອທີ່ກຳລັງກັດກິນແກ້ວຕາຂອງນາງເປັນເຊື້ອອະມີບາສາຍພັນອະຄັນທາມີບາ(Acanthamoeba)ທີ່ຖືເປັນເຊື້ອໂປໂຕຊົວຊະນິດໜຶ່ງທີ່ສາມາດເຮັດໃຫ້ເກີດການຕິດເຊື້ອຢ່າງຮຸນແຮງໃນດວງຕາ ຜິວໜັງຫລືລະບົບປະສາດສ່ວນກາງໄດ້ປົກກະຕິແລ້ວເຊື້ອເຫລົ່ານີ້ຈະອາໄສຢູ່ໃນດິນ,ຝຸ່ນ ບົວອາບນ້ຳຫລືແມ່ນແຕ່ໃນສະລອຍນ້ຳ
ໂດຍແພດໄດ້ເປີດເຜີຍວ່າການຕິດເຊື້ອອະມີບາຊະນິດນີ້ເປັນເລື່ອງທີ່ເກີດຂື້ນໄດ້ຍາກ ແລະເກືອບຈະກວດບໍ່ພົບຈົນກວ່າເຊື້ອອະມີບາຊະນິດດັ່ງກ່າວຈະສົ່ງຜົນໃຫ້ເກີດອາການແບບຮຸນແຣງຊຶ່ງຖ້າມີການປິ່ນປົວທັນທີກໍສາມາດຫາຍໄດ້ແຕ່ໂດຍສ່ວນໃຫຍ່ກວ່າຈະກວດພົບອາການກໍເຮັດໃຫ້ການປິ່ນປົວຊ້າຈົນສາຍເກີນໄປ
ສຳຫລັບກໍລະນີຂອງນັກສຶກສາສາວຄົນນີ້ວາລະສານທາງແພດThe Journal of Optometryໄດ້ເປີດເຜີຍວ່າການຕິດເຊື້ອດັ່ງກ່າວເປັນພາວະແຊກຊ້ອນທີ່ອາດເຮັດໃຫ້ເກີດການຕາບອດໄດ້ໂດຍສາເຫດເກີດມາຈາກທີ່ຍິງສາວຄົນນີ້ໄດ້ສວມໃສ່ຄອນແທກເລນຕະຫລອດເວລາແມ່ນແຕ່ໃນຂະນະທີ່ລອຍນໍ້າຕິດຕໍ່ກັນເປັນເວລາ6ເດືອນໂດຍບໍ່ໄດ້ຖອດອອກມາເຮັດຄວາມສະອາດເລີຍຊຶ່ງຄວາມປະມາດໃນເທື່ອນີ້ເຮັດໃຫ້ນາງອາດຈະຕ້ອງຕາບອດໄປຕະຫລອດຊີວິດ
ທັງນີ້ Wu Jian Liangຜູ້ອຳນວຍການແພດກ່າວວ່າຜູ້ທີ່ໃສ່ຄອນແທກເລນເປັນກຸ່ມທີ່ມີຄວາມສ່ຽງພະຍາດທີ່ກ່ຽວຂ້ອງກັບດວງຕາໄດ້ສູງບໍ່ວ່າຈະເປັນພາວະດວງຕາຂາດອອກຊິເຈນຈົນເຮັດໄປທຳລາຍພື້ນຜິວຂອງດວງຕາຫລືບາດແຜນ້ອຍໆເຍື່ອບຫຸ້ມຕາທີ່ອາຈະເຮັດໃຫ້ເກີດການຕິດເຊື້ອໄດ້ງ່າຍດັ່ງນັ້ນເພື່ອຄວາມປອດໄພຈຶ່ງບໍ່ຄວນໃຊ້ຄອນແທກເລນຄູ່ເກົ່າເກີນກວ່າ1ເດືອນເພື່ອປ້ອງກັນອັນຕະລາຍຈາກການຕິດເຊື້ອທີ່ອາດທຳລາຍແກ້ວຕາໄດ້
