ອາຫານຫວ່າງ 6 ຄູ່ຕໍ່ໄປນີ້ຈະຊ່ວຍໃຫ້ເຮົານອນຫລັບໄດ້ງ່າຍຂຶ້ນ(ແຕ່ກິນໃຫ້ພໍດີ)
ຊີລຽວ+ນົມ
ນີ້ຄືອາຫານເຊົ້າແລ້ວຈະຊ່ວຍໃຫ້ຫລັບໄດ້ບໍ່ຂໍບອກວ່າໄດ້ເພາະຊີລຽວມີຄາລໂບໄຮເດດ ເມື່ອມາປະສົມກັບນົມຂາດມັນເນີຍ(Skim Milk)ທີ່ເຕັມໄປດ້ວຍໂປຕີນຈະເຮັດໃຫ້ຮ່າງກາຍດູດຊຶມກົດອະມິໂນຊິບໂຕເຟນຫລາຍຂຶ້ນຊຶ່ງຊິບໂຕເຟນນີ້ຄືໂຕການສຳຄັນທີ່ຊ່ວຍໃຫ້ຮ່າງກາຍສ້າງສານເຊໂລໂທນິນອອກມາຄວບຄຸມການນອນຫລັບນອກຈາກນີ້ນົມກໍຍັງມີແຄຊຽມແລະແມກນີຊຽມສູງທີ່ຈະຊ່ວຍຜະລິດສານເມລາໂທນິນຊຶ່ງມີຜົນຕໍ່ອາລົມແລະການນອນຫລັບນໍາອີກເອີ້ນວ່າຊີລຽວ+ນົມສອງແຮງແຂງຂັນຊ່ວຍເຮັດໃຫ້ເຮົານອນຫລັບໄດ້ແນ່ນອນ
ປະລິມານທີ່ແນະນຳ:ຊີລຽວ1ຖ້ວຍ(ເລືອກຊະນິດທີ່ມີນ້ຳຕານບໍ່ກາຍ6ກຣາມຕໍ່1ຫນ່ວຍບໍລິໂພກ)+ນົມຂາດມັນເນີຍເຄິ່ງຖ້ວຍ
ໂຢເກີດ+ຫມາກໄມ້ມີນໍ້າຫລາຍ
ການທີ່ຮ່າງກາຍສູນເສຍນ້ຳຫລືມີນ້ຳໃນຮ່າງກາຍໜ້ອຍເກີນໄປກໍກະທົບຕໍ່ການນອນຂອງເຮົາໄດ້ຄືກັນດັ່ງນັ້ນຄວນເລືອກກິນຫມາກໄມ້ທີ່ມີນ້ຳຫລາຍໆກໍ່ຄືໝາກໂມ,ແອັບເປິ້ນ, ໝາກກ້ຽງແລະອື່ນໆເພື່ອທົດແທນການເສຍນ້ຳໃນໄລຍະລະຫວ່າງມື້ແລະຖ້າຢາກນອນຫລັບໃຫ້ສະບາຍຊອຍຫມາກໄມ້ເຫລົ່ານັ້ນກິນກັບໂຢເກີດໄຂມັນຕ່ຳຕົວຢ່າງເຊັ່ນກີນ ໂຢເກີດເຄິ່ງຖ້ວຍທີ່ມີໂປຕີນສູງຈະເລັ່ງໃຫ້ຫລັບໄດ້ໄວຂຶ້ນ
ຖົ່ວພິດຕາຊິໂອ+ເຊີລີ
ຖົ່ວພິດຕາຊິໂອຄືອີກໜຶ່ງໂຕຊ່ວຍຂອງຄົນນອນຫລັບຍາກເພາະມີໂປຕີນ,ວິຕາມິນບີ 6 ແລະແມັກນີຊຽມສູງຊ່ວຍໃນເລື່ອງການນອນຫລັບຖ້າຍິ່ງຈັບຄູ່ກັບຫມາກໄມ້ລົດສົ້ມອົມຫວານກໍ່ຄື”ເຊີລີ”ຈະເພີ່ມພະລັງຄູນສອງເລີຍເພາະມີງານວິໄຈພົບວ່າເຊີລີມີສ່ວນຊ່ວຍເພີ່ມປະສິດທິພາບໃນກະບວນການຜະລິດເມລາໂທນິນທີ່ຄວບຄຸມວົງຈອນການຫລັບແລະຕື່ນ
ດັ່ງນັ້ນຖ້າໃຜມີບັນຫານອນບໍ່ຫລັບລອງຫາຊື້ຖົ່ວພິດຕາຊິໂອມາກິນ(ປະລິມານບໍ່ກາຍ30 ກຣາມ)ບວກກັບເຊີລີ1ຖ້ວຍນ້ອຍໆຂໍ້ສຳຄັນກໍຄືຢ່າກິນຖົ່ວຫລາຍເກີນໄປເພາະຖົ່ວມີໄຂມັນບໍ່ນ້ອຍຄືກັນກິນຫລາຍໆຈະໄດ້ຮັບແຄລໍລີທີ່ສູງເກີນໄປແລ້ວຈະໃຫ້ຜົນກົງກັນຂ້າມຕາມຫລັງນີ້ຍິ່ງຫລັບຍາກກວ່າເກົ່າອີກ
ແຄກເກີ+ຊີສ
ແຄກເກີ+ຊີສເຮັດມາຈາກນົມຊຶ່ງມີໂປຕີນ,ແຄຊຽມ,ແມກນີຊຽມມີສ່ວນໃນການຜະລິດຊິບໂຕເຟນທີ່ເຮັດໃຫ້ເຮົານອນຫລັບແຕ່ກໍຕ້ອງເລືອກຊີດທີ່ຈະກິນນໍາຄືຕ້ອງເປັນຊີດແຄລໍລີຕ່ຳແລະກິນກັບແຄກເກີໂຮນເກນແຜ່ນນ້ອຍໆບໍ່ກາຍ15ແຜ່ນເພາະຖ້າຫລາຍກວ່ານີ້ອາດຈະໄດ້ໄຂມັນເປັນຂອງແຖມແລ້ວຈະບອກໃຫ້ວ່າການທີ່ຮ່າງກາຍມີໄຂມັນຫລາຍເກີນໄປ ຈະເຮັດໃຫ້ເຮົານອນຫລັບຍາກນໍາອີກ
ເນີຍຖົ່ວອາວມອນ+ກ້ວຍ
ເນີຍຖົ່ວອາວມອນແລະກ້ວຍເປັນຂອງຫວ່າງຄູ່ທີ່ມີວິຕາມິນບີ6ແລະແມກນີຊຽມສູງຊຶ່ງຈະຊ່ວຍໃຫ້ເຮົານອນຫລັບຝັນດີແນ່ນອນວ່າຕ້ອງບໍ່ກິນຫລາຍເກີນໄປເຊັ່ນກັນເພາະເປັນອາຫານຫວ່າງທີ່ມີແຄລໍລີສູງກິນເນີຍຖົ່ວບໍ່ກາຍ1ບ່ວງກໍ່ພຽງພໍ
ຊາຄາໂມມາຍ+ແກມແຄກເກີ (Graham Cracker)
ບາງເທື່ອການນອນບໍ່ຫລັບເລື້ອຍໆອາດເປັນເພາະທ້ອງໄສ້ບໍ່ຄ່ອຍດີກໍໄດ້ຊຶ່ງຊາຄາໂມມາຍຊ່ວຍແກ້ບັນຫານີ້ໄດ້ບໍ່ພຽງແຕ່ຊ່ວຍຂັບລົມ,ແກ້ຈຸກສຽດ,ຖອກທ້ອງແຕ່ຍັງມີສານທີ່ຊ່ວຍຄາຍຄຽດ,ມີລິດສະຫງົບປະສາດເຮັດໃຫ້ເຮົາຮູ້ສຶກຜ່ອນຄາຍກ່ອນເຂົ້ານອນຖ້າກິນຄູ່ກັບແກມແຄກເກີ2ແຜ່ນບວກເນີຍຖົ່ວ2ບ່ວງຫລືຊີດແຜ່ນນ້ອຍໆຈັກແຜ່ນກໍໄດ້ຈະຊ່ວຍເພີ່ມໂປຕີນເຮັດໃຫ້ເຮົາຫລັບໄດ້ໄວຂຶ້ນ
6 ເມນູທີ່ນຳສະເໜີນີ້ເປັນຂອງແຊບໆທັງນັ້ນຖ້າກິນແຕ່ພໍດີກໍບໍ່ຕ້ອງຢ້ານວ່າຈະຕຸ້ຍໄປ ແຕ່ຖ້າກິນເພີນເກີນຫ້າມໃຈຈັ່ງໄດກໍຕ້ອງກຽມໂຕກຽມໃຈກັບໜ້າທ້ອງທີ່ຈະຂຶ້ນມາແລະທີ່ສຳຄັນຄືຄວນເຂົ້ານອນກ່ອນ22:00ຈະດີທີ່ສຸດ