ຄຳມ່ວນອູ່ເຂົ້າອູ່ປາໜຶ່ງໃນແຂວງເປົ້າໝາຍການຜະລິດສະບຽງ ອາຫານຂອງລັດຖະບານ ປີນີ້ມີເນື້ອທີ່ການຜະລິດລະດູແລ້ງທັງໝົດ 8,22 ພັນ ກວ່າເຮັກຕາ ບັນລຸພຽງ 66% ຂອງ ແຜນການປີ ທັງນີ້ ແມ່ນເນື່ອງມາຈາກຊາວນາໄດ້ຫັນປ່ຽນໄປປູກພືດອຸດສາຫະກຳຫຼາຍ, ຄອງຊົນລະປະທານມີການເປ່ເພ, ຈັກສູບນ້ຳບາງເຄື່ອງມີອາຍຸໃຊ້ງານຫຼາຍປີເຮັດວຽກບໍ່ປົກກະຕິ ແລະ ບໍລິເວນຕັ້ງເຄື່ອງຈັກເກີດເປັນຫາດຊາຍຕື້ນເຂີນຈິ່ງບໍ່ສາມາດສູບ ນ້ຳໄດ້.
ເມື່ອວັນທີ 11 ມີນາຜ່ານມາ ທ່ານ ວິໄລວັນ ພົມເຂ ລັດຖະມົນຕີວ່າການກະຊວງກະສິກຳ ແລະປ່າໄມ້ ພ້ອມຄະນະໄດ້ລົງຕິດຕາມ ແລະ ຊຸກຍູ້ການຜະລິດລະດູແລ້ງ ພ້ອມວາງແຜນການກະກຽມລະດູຝົນທີ່ແຂວງຄຳມ່ວນ ໂດຍໄດ້ຮັບຟັງການລາຍງານການປະຕິບັດແຜນການຜະລິດລະດູ ແລ້ງ, ການຟື້ນຟູສ້ອມແປງຊົນລະປະທານສົກ 2014-2015 ແລະ ແຜນການ ຈັດຕັ້ງປະຕິບັດລະດູຝົນ 2015-2016 ຈາກທ່ານ ຄຳສອນ ອ້ວນທະວີ ຫົວໜ້າພະແນກກະສິກຳ ແລະ ປ່າໄມ້ແຂວງຄຳມ່ວນ.
ທ່ານຫົວໜ້າພະແນກກ່າວວ່າ: ການຜະລິດເຂົ້າຢູ່ແຂວງຄຳມ່ວນ ໃນສົກປີ 2013-2014 ຜ່ານມາ ປະຕິບັດໄດ້ 328.620 ໂຕນ ເທົ່າກັບ 82,19% ຂອງແຜນການ (ສະເລ່ຍຕໍ່ຫົວຄົນໄດ້ 830 ກິໂລຕໍ່ຄົນຕໍ່ປີ), ການປູກພືດສຳຮອງກໍຢູ່ໃນລະດັບຄົງທີ່ເປັນຕົ້ນແມ່ນຢາສູບ, ມັນຕົ້ນ, ອ້ອຍ, ສາລີ ແລະ ພືດພັກຕ່າງໆ.
ແຕ່ຄຽງຄູ່ກັນການລ້ຽງສັດບາງປະເພດຢູ່ແຂວງກໍ່ຫຼຸດລົງ ແລະ ບາງປະເພດກໍ່ເພີ່ມຂຶ້ນເຊັ່ນການລ້ຽງຄວາຍໄດ້ຫຼຸດລົງ 0,65%, ໝູຫຼຸດລົງ 0,6% ສ່ວນງົວການລ້ຽງເພີ່ມຂຶ້ນ 9,3%, ສັດປີກ ແລະ ປາກໍເພີ່ມຂຶ້ນເຊັ່ນດຽວກັນ ໂດຍການຜະລິດຊີ້ນ ແລະ ປາຍັງບັນລຸຕາມແຜນການທີ່ຜະລິດໄດ້ 17.038 ໂຕນ ດ້ວຍອັດຕາການບໍລິໂພກສະເລ່ຍ 47 ກິໂລຕໍ່ຄົນຕໍ່ປີໃນປີ 2014 ໂດຍລວມແລ້ວການຜະລິດ ແລະ ຕອບສະໜອງທາງດ້ານສະບຽງອາຫານໃນທົ່ວແຂວງແມ່ນກຸ້ມກິນ ພ້ອມນັ້ນການຜະລິດເປັນສິນຄ້າກໍ່ຍັງດຳເນີນຢ່າງຕໍ່ເນື່ອງຕາມ ຈັງຫວະການເໜັງຕີງຂອງທ້ອງຕະຫຼາດ.
ແນວໃດກໍຕາມ ການຜະລິດລະດູແລ້ງປະຕິບັດໄດ້ພຽງ 8.223 ເຮັກຕາ ເທົ່າກັບ 66% ຂອງແຜນການປີທີ່ວາງ ໄວ້ 12.470 ເຮັກຕາ ສາເຫດແມ່ນຍ້ອນບາງໂຄງການຊາວນາຫັນປ່ຽນອາຊີບຈາກເຄີຍຜະລິດ ກະສິກຳຫັນປ່ຽນໄປປູກພືດອຸດສາຫະກຳຫຼາຍ, ໂຄງການລະບົບຄອງຊົນລະປະທານມີການເປ່ເພ, ຈັກສູບນ້ຳມີອາຍຸການໃຊ້ງານຫຼາຍປີເຮັດໃຫ້ການໃຊ້ງານບໍ່ ປົກກະຕິ, ບໍລິເວນຕັ້ງຈັກສູບນ້ຳເກີດເປັນຫາດຕື້ນເຂີນບໍ່ສາມາດສູບນ້ຳໄດ້ ຂະນະທີ່ພືດລະດູແລ້ງແຜນການ 9.985 ເຮັກຕາ ແຕ່ປະຕິບັດໄດ້ 8.609 ເຮັກຕາ ເທົ່າກັບ 86%.
ສຳລັບແຜນການຜະລິດລະດູຝົນປີ 2015-2016 ໄດ້ວາງຄາດໝາຍເນື້ອທີ່ປູກໃນທົ່ວແຂວງ 82.220 ເຮັກຕາ, ຄາດຄະເນຜົນຜະລິດ 312.200 ເຮັກຕາ ສະເລ່ຍສະມັດຖະພາບຜົນຜະລິດ 3,80 ໂຕນຕໍ່ເຮັກຕາ, ການປູກພືດລະດູແລ້ງ 4.772 ເຮັກຕາ, ໃຫ້ໄດ້ຜົນຜະລິດ 15.914 ໂຕນ.
ຈາກນັ້ນທ່ານລັດຖະມົນກໍໄດ້ຮຽກຮ້ອງໃຫ້ພະແນກການ, ຫ້ອງການກະສິກຳ ແລະ ປ່າໄມ້ເມືອງກໍ່ຄືວິຊາການທີ່ ກ່ຽວຂ້ອງຈົ່ງໄດ້ເປັນເຈົ້າການໃນການປະຕິບັດວຽກງານຂອງຕົນດ້ວຍ ຄວາມຮັບຜິດຊອບສູງ, ຊຸກຍູ້ປະຊາຊົນໃນການ ບົວລະບັດຮັກສາ ແລະ ຍົກສະມັດຖະພາບຂອງການຜະລິດໃຫ້ສູງຂຶ້ນ ເພື່ອໃຫ້ຜະລິດຕະພັນມີຄຸນນະພາບສູງຮອງ ຮັບຕະຫຼາດທັງພາຍໃນ ແລະ ພາກພື້ນ, ຊຸກຍູ້ກະກຽມການຜະລິດລະດູຝົນຂອງປະຊາຊົນເປັນຕົ້ນປັດໄຈການ ຜະລິດ, ແນວພັນ ເຂົ້າ, ຝຸ່ນ, ປຸ໋ຍໃຫ້ມີຄວາມພ້ອມ ເພື່ອເຮັດໃຫ້ແຜນການສູ້ຊົນໄດ້ບັນລຸຕາມແຜນການທີ່ວາງໄວ້.
ແຫລ່ງຂ່າວ: ເສດຖະກິດ – ສັງຄົມ