ບໍລິສັດ ແມັກຊິວລອນ ຈຳກັດ ປະເທດໄທ ແລະ ບໍລິສັດ ແມັກຊິວລອນ ຈຳກັດ ປະຈຳລາວ ໃຫ້ການສະໜັບສະໜູນລະຫັດນຳໃຊ້ສື່ການຮຽນພາສາອັງກິດອອນລາຍ ຈຳນວນ 300 ລະຫັດ ລວມມູນຄ່າ 600 ລ້ານກີບ ໃຫ້ແກ່ໂຮງຮຽນວິທະຍາໄລອາຊີວະສຶກສາ ຈຳນວນ 6 ສະຖາບັນ ສຳລັບນຳໃຊ້ໃນໂຄງການທົດລອງໃຊ້ພາສາອັງກິດອອນລາຍ ເພື່ອເພີ່ມສັກກະຍະພາບດ້ານພາສາອັງກິດ ໃຫ້ແກ່ປະຊາຊົນລາວ ຮອງຮັບການເຂົ້າເປັນປະຊາຄົມເສດຖະກິດອາຊຽນ (AEC).
ພິທີມອບ-ຮັບໃຫ້ການສະໜັບສະໜູນດັ່ງກ່າວ ຈັດຂຶ້ນວັນທີ 27 ກຸມພາ 2015 ຜ່ານມາ ທີ່ວິທະຍາໄລເຕັກນິກປາກປ່າສັກ ໂດຍກ່າວມອບຂອງທ່ານ ທີຣະທະວັດ ສີທະວັດ ປະທານບໍລິສັດ ແມັກຊິວລອນ ຈຳກັດ ປະເທດໄທ ແລະ ກ່າວຮັບແມ່ນ 6 ສະຖາບັນການສຶກສາ ຄື: ວ.ລ ເຕັກນິກປາກປ່າສັກ ວ.ລ ສັບພະວິຊາ ວ.ລ ເຕັກນິກວິຊາຊີບມິດຕະພາບວຽງຈັນ-ຮ່າໂນ້ຍ ສະຖາບັນພັດທະນາອາຊີວະສຶກສາ ໂຮງຮຽນເຕັກນິກລາວ-ເຢຍລະມັນ ແລະ ພາກວິຊາສ້າງຄູອາຊີວະສຶກສາ (ຄະນະວິສະວະກຳສາດ) ໂດຍການເຂົ້າຮ່ວມຂອງທ່ານ ນະຣິໂຣດ ເຟື່ອງຣະບິວ ເອກອັກຄະຣາຊະທູດໄທ ປະຈຳລາວ ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກີລາ ພ້ອມດ້ວຍຄະນະອຳນວຍການ ຄູ-ອາຈານ ແລະ ແຂກຖືກເຊີນ.
ທ່ານຫົວໜ້າກົມອາຊີວະສຶກສາ ກ່າວວ່າ: ສຳລັບການໃຊ້ພາສາອັງກິດແບບອອນລາຍນີ້ ເປັນນະວັດຕະກຳໜຶ່ງທີ່ທາງບໍລິສັດດັ່ງກ່າວ ໄດ້ຄົ້ນຄວ້າໂປຣແກມ ຫຼື ເນື້ອຫາຕ່າງໆລົງໃນສື່ອອນລາຍ ເຊິ່ງປັດຈຸບັນນີ້ ສັງຄົມເຮົາແມ່ນນຳໃຊ້ສື່ນີ້ຫຼາຍພໍສົມຄວນ ເພື່ອກ້າວເຂົ້າສູ່ປະຊາຄົມເສດຖະກິດອາຊຽນທ້າຍປີນີ້ ດັ່ງນັ້ນ ພວກເຮົາຈະຕ້ອງໄດ້ຮຽນຮູ້ພາສາອັງກິດນີ້ຫຼາຍຂຶ້ນ ເພື່ອໃຫ້ສາມາດເຊື່ອມໂຍງກັບບັນດາປະເທດຕ່າງໆໃນພາກພື້ນ ແລະ ສາກົນ ທັງນີ້ກໍ່ເພື່ອຊ່ວຍໃຫ້ນັກຮຽນ ນັກສຶກສາຂອງພວກເຮົາ ພາຍຫຼັງທີ່ເຂົາເຈົ້າຮຽນຈົບໄປແລ້ວ ເພື່ອນຳໄປປະກອບອາຊີບຂອງເຂົາເຈົ້າ ພັດທະນາຄອບຄົວ ກໍ່ຄືສັງຄົມໃນອະນາຄົດ.
ແຫລ່ງຂ່າວ: ວຽງຈັນໃໝ່