ສາລະວັນແມ່ນໜຶ່ງໃນບັນດາແຂວງພາກໃຕ້ຂອງລາວທີ່ໄດ້ໃຫ້ ຄວາມສຳຄັນຕໍ່ວຽກງານການສຳຫຼວດພົນລະເມືອງ ແລະ ທີ່ຢູ່ອາໄສສຳລັບຄັ້ງທີ 4 ນີ້ ແຂວງໄດ້ຈັດກຳລັງພັນກວ່າຄົນລົງເດີນສຳຫຼວດຢູ່ບັນດາບ້ານ ໃນນັ້ນ ພະນັກງານຄູ ກວມອັດຕາສ່ວນຫຼາຍກວ່າໝູ່ ໂດຍທັງນີ້ຄະນະຮັບຜິດຊອບຂັ້ນແຂວງຢືນຢັນວ່າ ການຈັດຕັ້ງປະຕິບັດວຽກງານຈະບັນລຸຜົນສຳເລັດໄດ້ຕາມເວລາ ທີ່ທາງລັດຖະບານກຳນົດໄວ້.
ເມື່ອວັນທີ 2 ມີນາຜ່ານມາ ທ່ານ ລີຕູ້ ບົວປາວ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກີລາ ທັງເປັນຄະນະຊີ້ນຳການສຳຫຼວດພົນລະເມືອງ ແລະ ທີ່ຢູ່ອາໄສລະດັບຊາດ ພ້ອມດ້ວຍຄະນະໄດ້ລົງໄປຕິດຕາມ ແລະ ຊຸກຍູ້ການສຳຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ 4 ຢູ່ບ້ານນາກົກໂພ, ບ້ານນາຂ້ອຍສາວ ແລະ ບ້ານນາທູນນ້ອຍ ເມືອງສາລະວັນ ແຂວງສາລະວັນ.
ໂອກາດດັ່ງກ່າວ ທ່ານ ໄຊຍະເດດ ວົງສາຣະວັນ ຫົວໜ້າພະແນກແຜນການ ແລະ ການລົງທຶນ ແຂວງສາລະວັນທັງເປັນຄະນະຊີ້ນຳການສຳຫຼວດພົນລະເມືອງ ແລະ ທີ່ຢູ່ອາໄສ ຂັ້ນແຂວງໃຫ້ສຳພາດຕໍ່ສື່ມວນຊົນວ່າ: ແຂວງສາລະວັນ ໄດ້ເລີ່ມລົງມືຈັດຕັ້ງປະຕິບັດການສຳຫຼວດພົນລະເມືອງນັບແຕ່ ເວລາ 8:00 ໂມງຂອງວັນທີ 1 ມີນາເປັນຕົ້ນມາ ຢູ່ 5 ຮ້ອຍກວ່າບ້ານຂອງ 8 ເມືອງທີ່ຂຶ້ນກັບແຂວງ ໂດຍເຫັນວ່າການສຳຫຼວດແມ່ນເປັນໄປຕາມເປົ້າໝາຍທີ່ທາງຄະນະວາງໄວ້ ຫຼື ປະມານ 80-85% ຊຶ່ງຄາດໝາຍນັກເດີນສຳຫຼວດຄົນໜຶ່ງຕ້ອງໄດ້ 10 ຄອບຄົວ ແຕ່ສາມາດເຮັດຕົວຈິງ ໄດ້ 7-8 ຄອບຄົວໃນໜຶ່ງມື້.
ການສຳຫຼວດພົນລະເມືອງ ແລະ ທີ່ຢູ່ອາໄສ ຄັ້ງນີ້ໄດ້ນຳໃຊ້ບຸກຄະລາກອນເຂົ້າໃນການສຳຫຼວດທັງໝົດ 1.200 ຄົນທີ່ໄດ້ມາດຕະຖານໂດຍ ໃນນັ້ນ ແມ່ນມາຈາກຂະແໜງສຶກສາທີ່ເປັນຄູສອນກວມເກືອບ 70% ຂອງນັກເດີນສຳຫຼວດທັງໝົດ ຮອງລົງແມ່ນນາຍບ້ານ ແລະ ພະນັກງານຈາກພະແນກການຫ້ອງການຕ່າງໆ ໃຫ້ການປະກອບສ່ວນ ໂດຍງົບປະມານແຂວງແມ່ນໄດ້ປະກອບສົມທົບທັງໝົດ 1 ຕື້ກີບ ໃຊ້ໃນການການຝຶກອົບຮົມການກະກຽມເບື້ອງຕົ້ນໃນຂັ້ນແຂວງ ເມືອງສ່ວນງົບການເດີນສຳຫຼວດຕົວຈິງແມ່ນສູນກາງເປັນຜູ້ຮັບຜິດຊອບ ຊຶ່ງຄາດວ່າໃນໄລຍະເວລາ 7 ວັນຂອງການສຳຫຼວດຈະບັນລຸໄດ້ຕາມລະດັບຄາດໝາຍ, ທ່ານ ໄຊຍະເດດ ວົງສາຣະວັນ ກ່າວ.
ແນວໃດກໍດີ ການສຳຫຼວດພົນລະເມືອງ ແລະ ທີ່ຢູ່ອາໄສນີ້ ທ່ານ ລີຕູ້ ບົວປາວ ກ່າວວ່າ: ແມ່ນເປັນການເກັບກຳຂໍ້ມູນສະຖິຕິພື້ນຖານກ່ຽວກັບຈຳນວນປະຊາກອນ, ໂຄງປະກອບ ແລະ ການເໜັງຕີງຂອງພົນລະເມືອງ, ສະພາບກ່ຽວກັບລະດັບການສຶກສາ, ການເຂົ້າເຖິງການບໍລິການດ້ານສຸຂະພາບ, ກຳລັງແຮງງານ, ສະພາບການມີວຽກເຮັດ ງານທຳ ແລະ ການວ່າງງານ, ສະພາບການເຄື່ອນຍ້າຍຂອງປະຊາກອນ ແລະ ລັກສະນະຂອງທີ່ຢູ່ອາໄສອັນເປັນພື້ນຖານກ່ຽວກັບການດຳລົງຊີວິດ ຂອງພົນລະເມືອງລາວໃນໄລຍະ 10 ປີຜ່ານມາ.
ທັງນີ້ ຜົນຂອງການສຳຫຼວດຄັ້ງນີ້ ຈະເປັນແຫຼ່ງຂໍ້ມູນທີ່ສຳຄັນເພື່ອສະໜອງສຳລັບການຕີລາຄາ ແລະ ປະເມີນຜົນສຳເລັດຂອງການຈັດຕັ້ງປະຕິບັດແຜນພັດທະນາເສດຖະກິດ- ສັງຄົມແຫ່ງຊາດຄັ້ງທີ 7 ແລະ ການປະເມີນຜົນການຈັດຕັ້ງປະຕິບັດບັນດາເປົ້າໝາຍສະຫັດສະວັດດ້ານ ການພັດທະນາໃນປີ 2015 ພ້ອມດຽວກັນນັ້ນ ຍັງເປັນແຫຼ່ງຂໍ້ມູນຂ່າວສານສະຖິຕິທີ່ຈຳເປັນໃຫ້ແກ່ການກະກຽມ ກອງປະຊຸມໃຫຍ່ຄັ້ງທີ X ຂອງພັກ ແລະ ກະກຽມການສ້າງແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ VII (2016-2020) ກໍຄືການຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020 ແລະ ຍຸດທະສາດພັດທະນາ 2030.
ສ່ວນໃນມື້ນີ້ວັນທີ 3 ມີນາ 2015 ທ່ານ ລີຕູ້ ບົວປາວ ຈະລົງຕິດຕາມຊຸກຍູ້ການສຳຫຼວດພົນລະເມືອງ ແລະ ທີ່ຢູ່ເມືອງນະຄອນເພັງ ແຂວງສາລະວັນຕື່ມອີກ.
ແຫລ່ງຂ່າວ: ເສດຖະກິດ – ສັງຄົມ