ທາງ​ການ​ອີ​ຢິບ​ຢືນ​ຢັນ ພົບ​ຜູ້​ເສຍ​ຊີ​ວິດ​ລາຍ​ລ່າ​ສຸດ ຈາກ​ການ​ຕິດ​ເຊື້ອ​ໄວ​ຣັ​ດ​ໄຂ້​ຫວັດ​ສັດ​ປີກ​ສາຍ​ພັນ H5N1.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 26 ກຸມ​ພາ​ນີ້​ວ່າ ທາງ​ການ​ຂອງ​ປະ​ເທດ​ອີ​ຢິບ ໄດ້​ອອກ​ມາ​ລະ​ບຸ​ວ່າ ຜູ້​ເສຍ​ຊີ​ວິດ​ລາຍ​ລ່າ​ສຸດ​ຈາກ​ການ​ຕິດ​ເຊື້ອ​ໄຂ້​ຫວັດ​ສັດ​ປີກ H5N1 ແມ່ນ​ເປັນ​ຜູ້​ຊາຍ ອາ​ຍຸ 37 ປີ ຄົນ​ໜຶ່ງ ຈາກ​ເຂດ​ຟາ​ຢູມ ທາງ​ພາກ​ເໜືອ​ຂອງ​ປະ​ເທດ ເຊິ່ງ​ຫາ​ກໍ​ຖືກ​ນຳ​ສົ່ງ​ເຂົ້າ​ປິ່ນ​ປົວ​ຢູ່​ໂຮງ​ໝໍ​ບໍ່​ດົນ ກ່ອນ​ທີ່​ຈະ​ເສຍ​ຊີ​ວິດ.

ທັງ​ນີ້ ຂໍ້​ມູນ​ຂອງ​ກະ​ຊວງ​ສາ​ທາ​ລະ​ນະ​ສຸກ​ອີ​ຢິບ​ລະ​ບຸ​ວ່າ ນັບ​ຕັ້ງ​ແຕ່​ເລີ່ມ​ຕົ້ນ​ປີ 2015 ມາ​ນີ້ ມີ​ຜູ້​ເສຍ​ຊີ​ວິດ​ຈາກ​ການ​ຕິດ​ເຊື້ອ​ໄວ​ຣັດ​ໄຂ້​ຫວັດ​ສັດ​ປີກ H5N1 ແລ້ວ ທົ່ວ​ປະ​ເທດ​ຫລາຍ​ສິບ​ຄົນ ເຖິງ​ແມ່ນ​ວ່າ​ຈະ​ຍັງ​ບໍ່​ສາ​ມາດ​ຢືນ​ຢັນ​ ຕົວ​ເລກ​ຜູ້​ເສຍ​ຊີ​ວິດ​ທັງ​ໝົດຢ່າງ​ຊັດ​ເຈນ​ໄດ້ ແຕ່​ກໍ​ເປັນ​ທີ່​ແນ່ນອນ​ແລ້ວ​ວ່າ ຍອດ​ຜູ້​ເສຍ​ຊີ​ວິດ​ຈາກ​ການ​ຕິດ​ເຊື້ອ H5N1 ໃນ​ປີ​ນີ້ ໄດ້​ທຳ​ລາຍ​ສະ​ຖິ​ຕິ​ຜູ້​ເສຍ​ຊີ​ວິດ 11 ຄົນ ຈາກ​ການ​ຕິດ​ເຊື້ອ​ດັ່ງ​ກ່າວ​ໝົດ​ປີ 2014 ຜ່ານ​ມາ​ຢູ່​ໃນ​ອີ​ຢິບ​ໄປ​ແລ້ວ.

ດ້ານ​ອົງ​ການ​ອະ​ນາ​ໄມ​ໂລກ (WHO) ໄດ້​ອອກ​ມາ​ເຕືອນ​ວ່າ ພື້ນ​ທີ່​ແຖບ​ຊົນ​ນະ​ບົດ​ຂອງ​ອີ​ຢິບ ມີ​ຄວາມ​ສ່ຽງ​ສູງ​ທີ່​ຈະ​ປະ​ເຊີນ​ກັບ​ການ​ແຜ່​ລະ​ບາດ ຂອງ​ພະ​ຍາດ​ໄຂ້​ຫວັດ​ສັດ​ປີກ ເນື່ອງ​ຈາກ​ພົບ​ຂໍ້​ມູນ​ການ​ລ້ຽງ, ການ​ຄົວ​ສັດ​ປີກ ແບບ​ບໍ່​ຖືກ​ຕ້ອງ​ຕາມ​ສຸ​ຂະ​ລັກ​ສະ​ນະ​ເປັນ​ຈຳ​ນວນ​ຫລວງ​ຫລາຍ.