ນັກວິໄຈງຶດຕາມໆກັນ ເມື່ອນຳພະພຸດທະຮູບເຂົ້າເຄື່ອງທີຊີສະແກນ ພົບມີໂຄງກະດູກຢູ່ດ້ານໃນ ແຕ່ບໍ່ມີອະໄວຍະວະ ແລະ ມີເຈ້ຍອັກສອນຈີນບູຮານບັນຈຸຢູ່.
ສຳນັກຂ່າວຕ່າງປະເທດ ລາຍງານໃນວັນທີ 23 ກຸມພານີ້ວ່າ ພະພຸດທະຮູບສີລະປະແບບຈີນອົງນີ້ ຄາດວ່າມີອາຍຸປະມານ 1,000 ປີ ຖືກຈັດສະແດງໄວ້ຢູ່ພາຍໃນພິພິທະພັນເດຣນ ປະເທດໂຮນລັງຕັ້ງແຕ່ປີຜ່ານມາ ກ່ອນທີ່ຈະຖືກນຳໄປສຳຫລວດ ດ້ວຍການນຳເຂົ້າເຄື່ອງທີຊີສະແກນ ຢູ່ໂຮງໝໍມີແອນເດີ ເມືອງອາເມີໂຟດ ເຊິ່ງເຮັດໃຫ້ຜູ້ວິໄຈຕ້ອງຕົກຕະລຶງ ເມື່ອພາບສະແກນໄດ້ເຜີຍໃຫ້ເຫັນ ໂຄງກະດູກມະນຸດແບບຄົບຖ້ວນທັງຮ່າງກາຍ ຢູ່ດ້ານໃນຂອງພະພຸດທະຮູບ ເຊິ່ງຢູ່ໃນທ່ານັ່ງຂັດສະມາທິ ເຊັ່ນດຽວກັນກັບພະພຸດທະຮູບ ໂດຍທີມນັກວິໄຈໄດ້ນຳເອົາກ້ອງຂະໜາດນ້ອຍ ສອດເຂົ້າໄປເພື່ອເກັບຕົວຢ່າງໃນບໍລິເວນໜ້າເອິກ ແລະ ທ້ອງ ແຕ່ບໍ່ພົບຊາກຊິ້ນສ່ວນອະໄວຍະວະພາຍໃນ ໃນນັ້ນໄດ້ພົບເຈ້ຍເກົ່າໆ ເຊິ່ງຂຽນດ້ວຍອັກສອນພາສາຈີນບູຮານແທນ.
ທີມນັກວິໄຈໄດ້ສັນນິຖານວ່າ ຮ່າງໂຄງກະດູກທີ່ຢູ່ພາຍໃນພະພຸດທະຮູບອົງນີ້ ອາດແມ່ນຮ່າງຂອງ ” ຫລິວສວນ ” (Luiquan) ພະນັກບຳເພັນພຽນຊື່ດັງຂອງຈີນ ເຊິ່ງໄດ້ເສຍຊີວິດລົງເມື່ອປະມານ 1 ພັນປີທີ່ແລ້ວ ໂດຍທາງທີມນັກວິໄຈໄດ້ມີຄວາມເຊື່ອວ່າ ຮ່າງໂຄງກະດູກດັ່ງກ່າວ ໄດ້ເປັນຕົວຢ່າງຂອງນັກບວດທີ່ໄດ້ຕັ້ງໃຈບຳເພັນພຽນ ເພື່ອບັນລຸທຳຂັ້ນສູງສຸດ ຫລື ການບຳເພັນພຽນເພື່ອເປັນພະພຸດທະເຈົ້າ ເຊິ່ງພະເຖຣະຄູອາຈານໃນພະພຸດທະສາສະໜາເຊື່ອວ່າ ຖ້າຫາກບັນລຸທຳເຖິງຂັ້ນດັ່ງກ່າວນີ້ ຮ່າງກາຍກໍຈະຍັງບໍ່ທັນເສຍຊີວິດເທື່ອ ພຽງແຕ່ຢູ່ໃນພະວັງຂັ້ນເລິກເທົ່ານັ້ນ.
ປັດຈຸບັນນີ້ ພະພຸດທະຮູບດັ່ງກ່າວ ໄດ້ຖືກນຳໄປວາງສະແດງຢູ່ໃນພິພິທະພັນປະຫວັດທຳມະຊາດຂອງຮົງກາລີ ໂດຍຈະສະແດງໄວ້ຈົນເຖິງເດືອນພຶດສະພາປີນີ້ ສ່ວນຂໍ້ສົງໄສວ່າ ເປັນຫຍັງອະໄວຍະວະພາຍໃນຂອງຮ່າງດັ່ງກ່າວຈິ່ງບໍ່ມີ ແລະ ເສດເຈ້ຍທີ່ຂຽນອັກສອນຈີນບູຮານ ໄດ້ເຂົ້າໄປຢູ່ໃນຮ່າງກາຍໄດ້ແນວໃດນັ້ນ ຍັງຄົງເປັນປິດສະໜາ ທີ່ນັກວິໄຈກໍຍັງງຶດຢູ່ເຊັ່ນກັນ.
