ຫລາຍທ່ານຈະຍັງບໍ່ເຄີຍກິນ”ໝາກບົວ”ແລະ ອາດຄາດບໍ່ເຖິງ ວ່າ ແກ່ນໝາກບົວນ້ອຍນີ້ຈະມີສັບພະຄຸນທາງຢາສາມາດຊ່ວຍບຳລຸງເລືອດ ແຕ່ເຊື່ອໂລດວ່າ ເປັນເຊັ່ນນັ້ນແທ້ໆ ຫລາຍທ່ານທີ່ມັກມີອາການເຈັບຫົວໜ້າມືດ ຫລື ມີອາການແໜ້ນໜ້າເອິກ ເພາະບັນຫາເລືອດໜ້ອຍ ຂໍແນະນຳສະໝຸນໄພພື້ນບ້ານ ທີ່ກິນງ່າຍ ລາຄາບໍ່ແພງ ທີ່ສຳຄັນມີຢູ່ໃນເຮືອນເຮົາ ເຊັ່ນໝາກບົວ ມີສັບພະຄຸນທາງການບຳລຸງເລືອດທີ່ດີ
ສັບພະຄຸນຂອງໝາກບົວນັ້ນ ອຸດົມໄປດ້ວຍວິຕາມິນເອ ວິຕາມິນຊີ ວິຕາມິນອີ ມີໂປຕີນເປັນສ່ວນປະກອບຢູ່ປະມານ 23 ເປີເຊັນ ແລະ ມີເກືອແຮ່ ຟອດຟໍລັດ ນອກຈາກນີ້ ໂຕໝາກບົວຍັງມີສັບພະຄຸນ ບຳລຸງສະຫມອງ ບຳລຸງປະສາດ ບຳລຸງຫມາກໄຂ່ຫລັງ ຊ່ວຍປິ່ນປົວອາການຖອກທ້ອງ ແລະ ບິດຊຳເຮື້ອ ແລະ ສັບພະຄຸນພື້ນບ້ານທີ່ໃຊ້ກັນເປັນຢາບຳລຸງເລືອດ ຫລື ເພີ່ມເລືອດ
“ການກິນໝາກບົວ ເພື່ອການບຳລຸງເລືອດ ມີເງື່ອນໄຂວ່າ ຕ້ອງເປັນການກິນໝາກບົວສົດເທົ່ານັ້ນ” ໝາກບົວທີ່ຜ່ານການແປຮູບມາແລ້ວ ຫລື ການນຳມາຕົ້ມໃຫ້ສຸກຈະໃຊ້ບໍ່ໄດ້ ໝາກບົວເຊື່ອມທີ່ໃສ່ກະແລ້ມກໍໃຊ້ບໍ່ໄດ້
ໂດຍຫາຊື້ໝາກບົວສົດທີ່ມີຂາຍຕາມຕະຫລາດ ຊຶ່ງໜຶ່ງຫົວຈະມີແກ່ນບົວຢູ່ໃນຫົວ 7-10 ແກ່ນ ແລ້ວແຕ່ຄວາມຕຸ້ຍຂອງຫົວ ດັ່ງນັ້ນເວລາກິນຕ້ອງແກະອອກຈາກຫົວ ແລ້ວນຳມາແກະເປືອກອອກຈາກແກ່ນ ເພື່ອຈະກິນໝາກບົວສີຂາວເຫລືອງທີ່ຢູ່ໃນເປືອກ ເມື່ອໄດ້ ໝາກບົວທີ່ແກະເປືອກອອກແລ້ວ ໃຫ້ກິນເຂົ້າໄປທັງແກ່ນ ໂດຍບໍ່ເອົາຕົ້ນອ່ອນພາຍໃນແກ່ນ ຫລື ທີ່ເຮົາເຫັນເປັນເສັ້ນຂຽວໆ ຢູ່ກາງເມັດອອກ ເວົ້າງ່າຍໆ ຄືກິນເຂົ້າໄປໝົດ ລົດຊາດກໍຈະມີຂົມຝາດໜ້ອຍໜຶ່ງໃໝ່ໆ ອາດຈະບໍ່ຄຸ້ນເຄີຍລິ້ນ ແຕ່ເມື່ອກິນໄປ ໄລຍະໜຶ່ງກໍຈະເລິ້ງເຄີຍ
ທີ່ສຳຄັນຕົ້ນອ່ອນໃນແກ່ນບົວ ທີ່ຫລາຍຄົນມັກຈັບອອກນັ້ນ ຄືຕົ້ນອ່ອນສີຂຽວຂົມໆ ສັບພະຄຸນທາງຢາຂອງຈີນ ກ່າວວ່າ ຖ້າກິນເຂົ້າໄປແລ້ວກໍຈະຊ່ວຍບຳລຸງຖົງນ້ຳບີ ຊ່ວຍເພີ່ມແຮງບີບຂອງຫົວໃຈ ແລະ ບຳລຸງຫລອດເລືອດຫົວໃຈນໍາອີກ
ຂໍ້ສຳຄັນ ພະຍາຍາມເລືອກຫົວທີ່ແກ່ ຈະໄດ້ແກ່ນບົວທີ່ໃຫຍ່ເຕັມທີ່ ກິນມື້ລະບໍ່ຕໍ່າກວ່າ 20 ແກ່ນ ຈະກິນຫລາຍກວ່າກໍບໍ່ຫ້າມ ເພາະແກ່ນບົວປົກກະຕິເປັນຂອງກິນຫລິ້ນພື້ນບ້ານເຮົາຢູ່ແລ້ວ