ຫວ່າງແລ້ວນີ້ທີ່ເມືອງພຽງ ແຂວງໄຊຍະບູລີ ໄດ້ຈັດງານບຸນປີໃໝ່ (ນໍ້ເປ້ເຈົາ) ຂອງເຜົ່າມົ້ງ ແລະ ບຸນເກຼີຂອງເຜົ່າກຶມມຸຂຶ້ນ ໂດຍການເປັນກຽດເຂົ້າຮ່ວມຂອງ ທ່ານ ບຸດສະບົງ ຈະເລີນຜົນ ປະທານແນວລາວສ້າງຊາດເມືອງ, ມີທ່ານ ຕູ້ມົວ ບົວຕົງມົວ ຫົວໜ້າພະແນກສຶກສາທິການ ແລະ ກິລາແຂວງໄຊຍະບູລີ, ທ່ານ ສົມສິດ ຮອງຫົວໜ້າກົມຊົນເຜົ່າ ສູນກາງແນວລາວສ້າງຊາດ, ມີການນຳເມືອງ, ແຂກຖືກເຊີນຈາກເມືອງໄຊຍະບູລີ, ນັກທຸລະກິດ, ພໍ່ຄ້າຊາວຄ້າຂາຍ ຕະຫຼອດຮອດພໍ່ແມ່ປະຊາຊົນບັນດາເຜົ່າ ເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານ ທອງສຸກ ເຊັງທໍ່ ປະທານກວດກາພັກ-ລັດ ເມືອງ ທັງເປັນປະທານຈັດງານບຸນ ໄດ້ຂຶ້ນຜ່ານປະຫວັດຄວາມເປັນມາ ຂອງງານບຸນນໍ້ເປ້ເຈົາເຜົ່າມົ້ງ ແລະ ບຸນເກຼີເຜົ່າກຶມມຸ ຊຶ່ງບຸນປະເພນີຂອງ 2 ເຜົ່າດັ່ງກ່າວ ໄດ້ປະຕິບັດສືບທອດຈາກບັນພະບູລຸດເປັນເວລາຍາວນານ. ງານດັ່ງກ່າວໄດ້ເລີ່ມຕົ້ນດ້ວຍ ການເຂົ້າສູ່ພິທີຕາມຮີດຄອງຂອງ 2 ເຜົ່າ ເພື່ອເປັນການປັດເປົ່າສິ່ງຊົ່ວຮ້າຍ ແລະ ສິ່ງທີ່ບໍ່ດີໃຫ້ໄປກັບປີເກົ່າ, ມີການບາສີສູ່ຂວັນ ແລະ ອວຍພອນຊຶ່ງກັນ ແລະ ກັນ ຕາມຮີດຄອງປະເພນີ, ພາຍໃນງານຍັງມີຫຼາຍກິດຈະກຳ ເປັນຕົ້ນແມ່ນງານປະກວດນາງທິດາເຜົ່າມົ້ງ ແລະ ເຜົ່າກຶມມຸ, ປະກວດນັກຮ້ອງສຽງດີ, ການສະແດງສິລະປະວັນນະຄະດີຂອງສອງເຜົ່າມີຄື: ກິດຈະກຳໂຍນໝາກຄອນ ທີ່ເປັນເອກະລັກຂອງເຜົ່າມົ້ງ ຕະຫຼອດເຖິງການແຂ່ງຂັນກິລາມວນຊົນ ປະເພດຕ່າງໆ, ການວາງຂາຍສິນຄ້າ, ອາຫານການກິນ ແລະ ຄົບງັນຕາມຮີດຄອງປະເພນີ ຢ່າງມີບັນຍາກາດຟົດຟື້ນມ່ວນຊື່ນ.
ການຈັດງານບຸນດັ່ງກ່າວນີ້ ກໍເພື່ອເປັນການອະນຸລັກຮັກສາວັດທະນະທຳ ຮີດຄອງປະເພນີອັນດີງາມຂອງຊາດ ກໍຄືຂອງເຜົ່າເວົ້າສະເພາະ ກໍຄືປະຊາຊົນບັນດາເຜົ່າ ທີ່ຢູ່ພາຍໃນເມືອງໄວ້ໃຫ້ຍືນຍົງຕະຫຼອດໄປ ທັງເປັນການເຕົ້ ໂຮມຄວາມສາມັກຄີຂອງປະຊາຊົນບັນດາເຜົ່າໃຫ້ແໜ້ນແຟ້ນ ລະຫວ່າງເພື່ອນມິດສະຫາຍ ຍາດຕິພີ່ນ້ອງ ທັງສົ່ງເສີມການທ່ອງທ່ຽວທາງວັດທະນະທຳຮີດຄອງປະເພນີ ເພື່ອໃຫ້ສົມກັບຍຸດທະສາດຂອງເມືອງ ທີ່ສ້າງເມືອງພຽງເປັນເມືອງຜະລິດສະບຽງ ອາຫານ, ຕິດພັນກັບການປຸງແຕ່ງ, ບໍລິການທາງຜ່ານທ່ອງທ່ຽວທຳມະຊາດ ແລະ ວັດທະນະທຳ.
ແຫລ່ງຂ່າວ: ໜັງສືພິມປະຊາຊົນ