ກາເຟກາຍເປັນໜຶ່ງໃນຄ່ານິຍົມຂອງຄົນທົ່ວໄປແລ້ວ ທີ່ບໍ່ວ່າຈະເດີນທາງໄປບ່ອນໃດ ຕ້ອງແວ່ພັກເຕີມພະລັງດ້ວຍກາເຟ ໂດຍສະເພາະຢ່າງຍິ່ງກາເຟເຢັນທີ່ໃຫ້ພະລັງງານພ້ອມຄວາມແຊບທີ່ໃຜຫລາຍຄົນຄິດບໍ່ເຖິງວ່າ ທໍາຮ້າຍສຸຂະພາບຂອງເຮົາຫລາຍກວ່າທີ່ຄິດໄວ້
ເຄີຍສົງໄສກັນບໍວ່າ ເປັນຫຍັງກາເຟເຢັນຈຶ່ງກິນແລ້ວຕຸ້ຍ ທັງທີ່ເຮົາກໍສັ່ງແບບບໍ່ຫວານ ຫລຸດນົມຂຸ້ນ ບໍ່ໃສ່ນ້ຳຕານແລ້ວກໍຕາມ ແຕ່ກໍຍັງເຮັດໃຫ້ຮູ້ສຶກຕຸ້ຍຂຶ້ນ ມີນ້ຳໜັກໂຕເພີ່ມຂຶ້ນຢູ່ຄືເກົ່າ ເຊິ່ງໃຜທີ່ກຳລັງມີບັນຫາແບບນີ້ຢູ່ ຂໍໃຫ້ລອງອ່ານຂໍ້ມູນທີ່ນຳມາຝາກນີ້ເບິ່ງ ເພື່ອວ່າ ຈະໄດ້ຕັດໃຈຈາກກາເຟເຢັນໄດ້ຫລາຍຂຶ້ນ
ໃນກາເຟເຢັນ 1 ຈອກມີຫຍັງເຊື່ອງຢູ່ແນ່ ?
ລົດຊາດທີ່ແທ້ຈິງຂອງກາເຟຄວນຈະມີລົດຊາດຂົມນຳ ແຕ່ຖ້າເມື່ອໃດທີ່ດື່ມເຂົ້າໄປທໍາອິດແລ້ວພົບວ່າ ລົດຊາດ ຫອມ ຫວານ ມັນ ຊື່ນໃຈ ຂໍໃຫ້ຮູ້ວ່າ ທ່ານບໍ່ໄດ້ກຳລັງດື່ມພຽງແຕ່ກາເຟພຽງຢ່າງດຽວແລ້ວ ຈາກຜົນການສຳຫລວດຂອງ ສຳນັກໂພສະນາການ ພົບວ່າ ສິ່ງທີ່ເຊື່ອງຢູ່ໃນກາເຟເຢັນ 1 ຈອກນັ້ນມີຫລາຍກວ່າ ແຕ່ສານຄາເຟອີນ ເພາະກາເຟເຢັນຂະໜາດຈອກ 20 ອອນ ຫລື 600 ມິລິລີດ ມີສ່ວນປະກອບຂອງໄຂມັນ 22.1 ກຣາມ ໂປຕີນ 10.9 ກຣາມ ແລະ ຄາລໂບໄຮເດດ 49.4 ກຣາມ ເຊິ່ງໃຫ້ພະລັງງານຕໍ່ຮ່າງກາຍສູງກວ່າ 200 ກິໂລແຄລໍລີ ໂດຍພະລັງງານທີ່ຮ່າງກາຍໄດ້ຮັບສ່ວນໃຫຍ່ກໍມາຈາກນ້ຳຕານທີ່ມາຈາກນົມຂຸ້ນ ຄີມທຽມ ຫລື ໄຊລັບ ແຕ່ງລົດຊາດໃນປະລິມານທີ່ຫລາຍເຖິງ 38 ກຣາມ ຫລື ປະມານ 10 ບ່ວງ ດັ່ງນັ້ນ ລອງຄິດຫລິ້ນໆ ເບິ່ງວ່າ ຖ້າຫາກເຮົາກິນກາເຟເຢັນສະເລ່ຍມື້ລະ 2 ຈອກ ນັ້ນໝາຍເຖິງ ຮ່າງກາຍຈະໄດ້ຮັບປະລິມານນ້ຳຕານເພີ່ມຂຶ້ນອີກເປັນເທົ່າໂຕ!
ກາເຟເຢັນສູດໃດ ດື່ມແລ້ວທໍາຮ້າຍສຸຂະພາບຫລາຍທີ່ສຸດ
ຄວາມຈິງແລ້ວຂຶ້ນຊື່ວ່າ ກາເຟເຢັນ ກໍລ້ວນແລ້ວແຕ່ທໍາຮ້າຍສຸຂະພາບທັງໝົດ ບໍ່ວ່າຈະເປັນເມນູກາເຟຍອດນິຍົມທີ່ຂາຍກັນ ເຊັ່ນ ລາເຕ້ ມອກຄ່າ ເອດເປດໂຊ່ ແລະ ຄາປູຊິໂນ ໂດຍກາເຟແຕ່ລະສູດນັ້ນມີປະລິມານນ້ຳຕານບໍ່ຕ່າງກັນເທົ່າໃດ ຍົກເວັ້ນເມນູທີ່ມີສ່ວນປະສົມຂອງຊັອກໂກແລດ ແລະ ກາເຟທີ່ດື່ມແລ້ວຈະເຮັດໃຫ້ຕຸ້ຍຫລາຍກວ່າເມນູອື່ນໆ ຕົວຢ່າງເຊັ່ນ ມອກຄ່າເຢັນ ທີ່ບໍ່ໄດ້ໃຫ້ພຽງແຕ່ນ້ຳຕານຢ່າງດຽວ ເຊິ່ງປຽບທຽບປະລິມານນ້ຳຕານໃນກາເຟແຕ່ລະສູດຈະພົບວ່າ
ລາເຕ້ເຢັນໃຫ້ພະລັງງານສູງເຖິງ 288 ກິໂລແຄລໍລີ ມີປະລິມານນ້ຳຕານປະມານ 3-9 ບ່ວງ
ຄາປູຊິໂນເຢັນ ໃຫ້ພະລັງງານສູງເຖິງ 303 ກິໂລແຄລໍລີ ມີປະລິມານນ້ຳຕານປະມານ 6-9 ບ່ວງ
ມອກຄ່າເຢັນ ໃຫ້ພະລັງງານສູງເຖິງ 400 ກິໂລແຄລໍລີ ມີປະລິມານນ້ຳຕານປະມານ 5-9 ບ່ວງ ແຖມຍັງມີປະລິມານນ້ຳຕານທີ່ມາຈາກນ້ຳເຊື່ອມ ແລະ ຜົງຊັອກໂກແລັດ ນໍາອີກ
ແຕ່ສຳຫລັບກາເຟສູດອື່ນທີ່ນອກເໜືອໄປຈາກນີ້ ເຊັ່ນ ເມນູກາເຟກາປູຊິໂນ ທັງແບບມີບີບຄີມ ແລະ ບໍ່ມີບີບຄີມ ນັ້ນຖືວ່າເປັນເມນູກາເຟທີ່ກິນແລ້ວຕຸ້ຍທີ່ສຸດ ເພາະໃຫ້ພະລັງງານສູງເຖິງ 561 ແຄລໍລີ ແລະ 457 ແຄລໍລີ ຕາມລຳດັບ ນ້ຳຕານ ແລະ ຄີມທຽມ ກົນລວງຄວາມແຊບຊ້ອຍທີ່ເຮັດໃຫ້ເຮົາກິນແບບເພີດເພີນ
ນອກຈາກປະລິມານນ້ຳຕານໃນກາເຟເຢັນ ທີ່ເຮັດໃຫ້ເຮົາຕຸ້ຍຂຶ້ນ ສຸຂະພາບຮ້າຍກວ່າເກົ່າແລ້ວ ຍັງມີໂຕການຮ້າຍທີ່ເຮົາຕ້ອງລະວັງໃຫ້ດີກໍຄື ຄີມທຽມ ເພາະຄີມທຽມມີສ່ວນປະກອບຫລັກເປັນໄຂມັນ ໂປຕີນ ແລະ ນ້ຳຕານ ໂດຍສ່ວນໃຫຍ່ກໍສະກັດມາຈາກນ້ຳມັນປາມ ແລະ ນ້ຳມັນໝາກພ້າວ ຈຶ່ງມີປະລິມານກົດໄຂມັນອີ່ມໂຕສູງປະມານຮ້ອຍລະ 20 – 50 ຖືເປັນໄຂມັນຊານທີ່ມີຜົນໃຫ້ຄໍເລດເຕີລໍຊະນິດບໍ່ດີ (LDL) ໃນເລືອດເພີ່ມຂຶ້ນ ສົ່ງຜົນໃຫ້ລະບົບການເຮັດວຽກງານຂອງຕັບຜິດປົກກະຕິ ຖ້າຫາກເຮົາກິນກາເຟດ້ວຍຄີມທຽມ ເທື່ອລະ 2-3 ບ່ວງຂຶ້ນໄປເປັນປະຈຳທຸກມື້ ແນ່ນອນວ່າເຮົາມີຄວາມສ່ຽງສູງທີ່ຈະເປັນພະຍາດເບົາຫວານ ຄວາມດັນເລືອດສູງ ໄຂມັນອຸດຕັນໃນເສັ້ນເລືອດ
ນອກຈາກນີ້ຍັງມີກົນລວງຄວາມແຊບຊ້ອຍອີກໜຶ່ງຢ່າງທີ່ເຮົາຕ້ອງຄຳນຶງເຖິງນໍານັ້ນກໍຄື ນ້ຳເຊື່ອມແຕ່ງລົດຊາດຕ່າງໆ ເຊັ່ນ ວານິລາ ຮາເຊນນັດ ມິນ ແລະ ຄາລາເມວ ເຊິ່ງກໍຖືວ່າ ຢູ່ໃນໝວດໝູ່ຂອງນ້ຳຕານໄຊລັບ ເຕີມລົດຊາດ ທີ່ສົ່ງຜົນໃຫ້ແຄລໍລີໃນກາເຟຂອງເຮົາເພີ່ມຂຶ້ນຄືກັນ
ໄພສຸຂະພາບທີ່ແອບແຝງມາກັບກາເຟເຢັນ 1 ຈອກ
ຕາມຫລັກໂພສະນາການທີ່ດີແລ້ວ ຮ່າງກາຍຂອງເຮົາຄວນໄດ້ຮັບພະລັງງານໂດຍສະເລ່ຍຢູ່ທີ່ 2, 000 ແຄລໍລີສຳລັບຜູ້ຍິງ ແລະ 2, 500 ແຄລໍລີສຳຫລັບຜູ້ຊາຍ ເຊິ່ງການດື່ມກາເຟເຢັນແມ່ນພຽງແຕ່ຈອກດຽວ ກໍເຮັດໃຫ້ຮ່າງກາຍເຮົາໄດ້ຮັບແຄລໍລີສູງກວ່າ 1 ໃນ 4 ຂອງແຄລໍລີໃນອາຫານລວມ 3 ຄາບນໍາອີກ ໂດຍສະເພາະຢ່າງຍິ່ງຖ້າເຮົາດື່ມມື້ລະຫລາຍຈອກ ແຕ່ກັບບໍ່ໄດ້ເຄື່ອນໄຫວຮ່າງກາຍເທົ່າໃດ ກໍບໍ່ແປກທີ່ນ້ຳໜັກໂຕຈະເພີ່ມຂຶ້ນ ສ່ວນຫນຶ່ງມາຈາກການທີ່ຮ່າງກາຍໄດ້ຮັບນ້ຳຕານໃນປະລິມານທີ່ສູງຫລາຍທຸກມື້ ຈົນບໍ່ສາມາດເຜົາຜານໃຫ້ໝົດໃນແຕ່ລະມື້ໄດ້ ເກີດການປ່ຽນສະພາບເປັນໄຂມັນ ກາຍເປັນ ເຊວລູໄລ ກ້ອງຊັ້ນຜິວໜັງຕາມອະໄວຍະວະຕ່າງໆ ໃນຮ່າງກາຍເຮົາ ແລະຍິ່ງຖ້າເຮົາດື່ມກາເຟເຢັນເກີນກວ່າ 1 ຈອກຕໍ່ມື້ ຮ່າງກາຍກໍຍິ່ງມີຄວາມສ່ຽງສູງໃນການພະຍາດເສື່ອມຕ່າງໆ ໄດ້ງ່າຍຂຶ້ນ ໄດ້ແກ່ ພະຍາດຕຸ້ຍ ພະຍາດມະເຮັງລຳໄສ້ ພະຍາດຫົວໃຈ ພະຍາດເບົາຫວານ ແລະ ຄວາມດັນເລືອດ ສາເຫດເພາະນ້ຳຕານເປັນໂຕທຳລາຍຄວາມສົມດຸນຂອງລະບົບໄຫລວຽນເລືອດໃນຮ່າງກາຍນັ້ນເອງ
ເຫັນບໍ່ວ່າ ພຽງແຕ່ກາເຟເຢັນພຽງຈອກດຽວກໍມີຜົນຕໍ່ສຸຂະພາບຂອງເຮົາໃຫ້ຮ້າຍກວ່າເກົ່າໄດ້ແລ້ວ ດັ່ງນັ້ນໃຜທີ່ຕິດກາເຟເຢັນຫລາຍ ຂໍແນະນຳ ໃຫ້ລອງປ່ຽນມາເປັນກາເຟຮ້ອນເບິ່ງ ເພາະການກິນແບບຮ້ອນຈະເຮັດໃຫ້ເຮົາຫລຸດປະລິມານນ້ຳຕານ ແລະ ໄຂມັນໄດ້ຫລາຍກວ່າ ອີກທັງຍັງເຮັດໃຫ້ເຮົາຮັບລົດຊາດກາເຟໄດ້ຫລາຍຂຶ້ນກວ່າເກົ່າ