ຄືດັ່ງທີ່ຮູ້ກັນແລ້ວວ່າ ວຽກງານປັບປຸງຄຸນນະພາບການສຶກສາໃນສົກປີຜ່ານມາ, ແມ່ນໄດ້ຮັບການ ເອົາໃຈໃສ່ ຫລາຍສົມຄວນ, ເຊິ່ງກະຊວງສຶກສາທິການ ແລະ ກິລາ ລວມທັງຄູ່ຮ່ວມພັດທະນາໄດ້ລົງທຶນຢ່າງຫລວງຫລາຍເຂົ້າໃນການປັບປຸງຫລັກສູດ, ຈັດພິມປຶ້ມແບບຮຽນ ແລະ ຄູ່ມືຄູເປັນຕົ້ນສຳເລັດການສ້າງໂຄງຮ່າງຫລັກສູດ ແລະ ສື່ການຮຽນ – ການສອນເສີມສຳລັບນັກຮຽນຊົນເຜົ່າຂັ້ນ ປະຖົມປີທີ 1 ແລະ 2, ພ້ອມນັ້ນ ຍັງໄດ້ກວດແກ້ຕົ້ນສະບັບປຶ້ມແບບຮຽນ ແລະ ຄູ່ມືຄູວິຊາພາສາລາວ, ຄະນິດສາດ, ຄຸນສົມບັດ ແລະ ໂລກອ້ອມຕົວສຳລັບຊັ້ນ ປ1 ແລະ ປ2 ເພື່ອຈັດພິມ ແລະ ແຈກຢາຍໃຫ້ໂຮງຮຽນປະຖົມສຶກສາໃນທົ່ວປະເທດ. ພ້ອມທັງໄດ້ສະໜອງອຸປະກອນ ທົດລອງໃຫ້ແກ່ສະຖາບັນສ້າງຄູ ແລະ ໂຮງຮຽນມັດທະຍົມສົມບູນຈຳນວນໜຶ່ງ ໃນຂອບເຂດທົ່ວປະເທດ.
ແນວໃດກໍຕາມໃນສົກປີນີ້ ກະຊວງສຶກສາທິການ ແລະ ກິລາ ຈະສຸມໃສ່ສ້າງມາດຕະຖານຄຸນນະພາບ ແລະ ຄູ່ມືການນຳໃຊ້ສຳລັບການສຶກສາເດັກກ່ອນໄວຮຽນ, ຊັ້ນອະນຸບານ ແລະ ການສຶກສານອກ ໂຮງຮຽນ; ສ້າງເຄື່ອງມື ແລະ ຄູ່ມືການຕິດຕາມປະເມີນຄຸນນະພາບພາຍໃນໃຫ້ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງ, ຜູ້ອຳນວຍການໂຮງຮຽນປະຖົມ ແລະ ມັດທະຍົມສຶກສາ; ດຳເນີນການປະ ເມີນຄຸນນະພາບການສຶກສາຊັ້ນປະຖົມ ແລະ ມັດທະຍົມ ບ່ອນທີ່ໄດ້ຮັບການຝຶກອົບຮົມແລ້ວ; ສືບຕໍ່ຝຶກອົບຮົມການນຳໃຊ້ມາດຕະຖານຄຸນນະພາບການສຶກສາຊັ້ນປະຖົມ, ມັດທະຍົມໃຫ້ຄູຝຶກຂັ້ນແຂວງ, ເມືອງ, ຜູ້ອຳນວຍການໂຮງຮຽນ ແລະ ໃຫ້ສາຍອາຊີວະສຶກສາ ແລະ ພາກສ່ວນການສຶກສາທີ່ຍັງເຫລືອ; ພັດທະນາກົນໄກການປະເມີນພາຍນອກ ສຳລັບການສຶກສາໃນສາຍອາຊີວະສຶກສາ ແລະ ການສຶກສາຊັ້ນສູງ; ຝຶກອົບຮົມໃຫ້ຜູ້ປະເມີນພາຍນອກ ເພື່ອລົງປະເມີນໃນສາຍອາຊີວະ ແລະ ການສຶກສາຊັ້ນສູງ. ນອກຈາກນີ້ ຍັງຈະສົ່ງເສີມການແຂ່ງຂັນນັກຮຽນເກັ່ງດ້ານໄອທີ ແລະ ພາສາອັງກິດຂັ້ນພື້ນຖານເພື່ອໃຫ້ເທົ່າທຽມກັບສາກົນ ແລະ ພາກພື້ນນຳອີກ.
ກະຊວງສຶກສາໃຫ້ຮູ້ວ່າ: ໃນສົກປີຜ່ານມາ ຍັງມີບັນຫາທີ່ຈະຕ້ອງແກ້ໄຂເຊັ່ນ: ບັນຫາຄຸນນະພາບ ການຮຽນ-ການສອນ ໃນຊັ້ນປະຖົມສຶກສາຍັງຕ່ຳ, ຈຳນວນນັກຮຽນປະລະ ແລະ ອອກຮຽນກາງປີມີຫລາຍ, ໂດຍສະເພາະ ໃນຂັ້ນ ປ1 ແລະ ປ2. ການຕິດຕາມ ແລະ ບໍລິຫານຄຸ້ມຄອງໂຮງຮຽນຍັງບໍ່ເປັນລະບົບຕໍ່ເນື່ອງ, ການປະລະຂອງນັກຮຽນມັດທະຍົມຍັງສູງ, ການສ້າງສີມືແຮງງານຍັງບໍ່ທັນສອດຄ່ອງ ກັບຄວາມຕ້ອງການຂອງຕະຫລາດແຮງງານ ທີ່ກຳນົດໄວ້ໃນແຜນພັດທະນາເສດຖະກິດ-ສັງ ຄົມແຫ່ງຊາດ 5 ປີ ຄັ້ງທີ VII, ການຮັບນັກຮຽນເຂົ້າ ຮຽນຢູ່ສະຖາບັນອາຊີວະສຶກສາ ແລະ ມະຫາວິທະຍາໄລ ຍັງບໍ່ໄດ້ຕາມແຜນການ. ກົງກັນຂ້າມສະຖາບັນສ້າງຄູ ພັດມີຜູ້ສະໝັກເຂົ້າຮຽນລື່ນແຜນການທີ່ກຳນົດ. ສະພາບການບັນຈຸ ແລະ ນຳໃຊ້ຄູຍັງບໍ່ທັນມີປະສິດທິພາບເຫັນວ່າ ຍັງມີສະພາບຄູເຫລືອບໍ່ພໍຢູ່ໃນລະບົບເປັນຈຳນວນບໍ່ໜ້ອຍ.
ແຫລ່ງຂ່າວ: ລາວພັດທະນາ