ກາຍເປັນປະເດັນທີ່ຖົກຖຽງກັນຢ່າງໜາຫູພໍສົມຄວນ ເມື່ອມີຮູບພາບເຈົ້າໜ້າທີ່ການບິນຂອງໄທ ພົບເສດຊາກຂອງໂຄມ
ລອຍ ທີ່ພາກັນຈູດບູຊາອະທິຖານໃນມື້ຂຶ້ນປີໃໝ່ ໄດ້ເຂົ້າໄປຕິດຄ້າງຢູ່ໃນໃບພັດຂອງເຮືອບິນ ຈົນຕ້ອງໄດ້ຍົກເລີກຖ້ຽວບິນ
ທັນທີ ໂດຍສັງຄົມໄທໄດ້ຕັ້ງຄຳຖາມຂຶ້ນວ່າ ຖ້າຫາກເຮືອບິນເກີດບິນຂຶ້ນ ແລ້ວປະສົບອຸບັດເຫດ ຍ້ອນໂຄມລອຍດັ່ງກ່າວນີ້
ແມ່ນຜູ້ໃດຈະເປັນຜູ້ຮັບຜິດຊອບ.
ຮູບພາບດັ່ງກ່າວ ເປັນພາບຂອງໃບພັດເຮືອບິນທີ່ມີຊາກໂຄມລອຍ ທີ່ນັກທ່ອງທ່ຽວພາກັນຈູດປ່ອຍຂຶ້ນຟ້າ ໃນຊ່ວງເທດ
ສະການປີໃໝ່ ໂດຍເສດຊາກໄດ້ຕິດຢູ່ທາງດ້ານໃນ ເຊິ່ງແຫລ່ງຂ່າວໄດ້ລະບຸວ່າ ຮູບພາບດັ່ງກ່າວຖ່າຍໃນຄືນວັນທີ 1 ມັງກອນ
ຜ່ານມານີ້ ທີ່ສະໜາມບິນຊຽງໃໝ່ ປະເທດໄທ ເຊິ່ງເປັນເຮືອບິນ A320 ໂດຍເຈົ້າໜ້າທີ່ທີ່ກວດພົບ ກໍຕ້ອງຕົກໃຈ ແລະ ສັ່ງ
ໃຫ້ມີການຍົກເລີກຖ້ຽວບິນໃນທັນທີ ເພື່ອຄວາມປອດໄພ.
ເຫັນຮູບພາບດັ່ງກ່າວນີ້ ແລະ ຫວນຄືນມາເບິ່ງການຈູດໂຄມລອຍ ເພື່ອບູຊາໃນງານເທດສະການໄຫລເຮືອໄຟ ໃນມື້ອອກ
ພັນສາປະວໍລະນາ ທີ່ທ່າວັດຈັນ ນະຄອນຫລວງວຽງຈັນ ໃນໄລຍະບໍ່ພໍເທົ່າໃດປີມານີ້ ກໍສັງເກດເຫັນວ່າ ມວນຊົນຕ່າງກໍພາ
ກັນນິຍົມປ່ອຍກັນຫລາຍຂຶ້ນໃນແຕ່ລະປີ ແລະ ເຖິງແມ່ນເຈົ້າໜ້າທີ່ ຈະມີການຫ້າມບໍ່ໃຫ້ມີການຈຳໜ່າຍ ຫລື ຈູດໂຄມ
ລອຍດັ່ງກ່າວແລ້ວກໍຕາມ ແຕ່ກໍຍັງປະກົດເຫັນຢູ່ບາງຈຳນວນ ເຊິ່ງເຫດການທີ່ເກີດຂຶ້ນຢູ່ໃນປະເທດເພື່ອນບ້ານດັ່ງກ່າວ
ນີ້ ກໍຫວັງວ່າຈະເປັນອຸທາຫອນ ສຳລັບຜູ້ທີ່ຈະປ່ອຍໂຄມລອຍໃນອານາຄົດ ຄວນທີ່ຈະຄິດຄຳນຶງເຖິງບັນຫາທີ່ອາດຈະຕາມ
ມາ ເຊິ່ງກະທົບເຖິງຄວາມປອດໄພທາງຊີວິດ ແລະ ຊັບສິນຂອງສັງຄົມໂດຍລວມ.
