ວິຕາມິນບີລວມ ຫລື ວິຕາມິນ ບີ ຄອມເພັກ ທີ່ຄົນໄວເຮັດວຽກນອນເດິກຕື່ນເຊົ້າມັກຈະຫາຊື້ມາບຳລຸງຮ່າງກາຍໃນຮູບຂອງອາຫານເສີມ ເພາະເຊື່ອວ່າ ໃນອາຫານເສີມມີຄຸນຄ່າຄົບຖ້ວນກວ່າວິຕາມິນທີ່ຢູ່ໃນອາຫານທີ່ເຮົາກິນທຸກມື້ ແຕ່ຈະເປັນເລື່ອງແທ້ຫລາຍປານໃດ ກໍລອງມາໄຂຂໍ້ຂ້ອງໃຈກັນເບິ່ງເລີຍ!
ວິຕາມິນບີລວມ ຫລື ວິຕາມິນບີຄອມເພັກ ຂຶ້ນຊື່ເລີຍວ່າ ເປັນວິຕາມິນທີ່ຈັດເຕັມເລື່ອງຄຸນຄ່າທາງໂພສະນາການແບບຄົບຖ້ວນເຮັດໃຫ້ໜຸ່ມສາວຫ້ອງການແບບເຮົາໆ ມີເຫື່ອແຮງເຫລືອລົ້ນ ພ້ອມຮັບກັບວຽກ ແຕ່ ! ວິຕາມິນກຸ່ມນີ້ຈະມີຢູ່ໃນອາຫານທີ່ເຮົາກິນທຸກມື້ບໍ ຈາກຂໍ້ມູນໃນເວັບໄຊ Dailyburn. com ກໍອອກມາຢືນຢັນແລ້ວວ່າ ວິຕາມິນບີລວມ ຢູ່ໃກ້ໂຕເຮົາຫລາຍ ຖ້າໃຜເປັນຄົນບໍ່ເລືອກກິນກໍໝັ້ນໃຈໄດ້ເລີຍວ່າ ໄດ້ຮັບສານອາຫານຈາກວິຕາມິນກຸ່ມນີ້ໄປເຕັມໆ ບໍ່ເຊື່ອກໍລອງອ່ານເບິ່ງ ເພື່ອຈະຄິດອອກວ່າໃນແຕ່ລະມື້ເຮົາກິນວິຕາມິນໂຕໃດຫລາຍທີ່ສຸດ ແລະ ໂຕໃດຮ່າງກາຍມັກຂາດຢູ່ເລື້ອຍໆ
ວິຕາມິນບີ 1 (ໄທອາມີນ) ຊ່ວຍເພີ່ມພະລັງກາຍໃຫ້ພ້ອມທຸກມື້
ວິຕາມິນບີ 1 ຫລື ຖ້າໃຜຢາກຈື່ງ່າຍໆ ກໍເອີ້ນວ່າ ວິຕາມິນຫລຸດຄຽດກໍໄດ້ ເປັນວິຕາມິນທີ່ຊ່ວຍດຶງສານອາຫານໝູ່ ຄາໂບໄຮເດດ ໄປເຜົາຜານໃຫ້ເປັນພະລັງງານຂອງຮ່າງກາຍໃນການຈັດການສິ່ງຕ່າງໆ ໃນແຕ່ລະມື້ ແລະ ຍັງຊ່ວຍເສີມສ້າງລະບົບພູມຄຸ້ມກັນຂອງເຮົາໃຫ້ເຮັດວຽກເປັນປົກກະຕິນໍາອີກ ດັ່ງນັ້ນ ມະນຸດເງີນເດືອນທັງຫລາຍຈຶ່ງບໍ່ຄວນປ່ອຍໃຫ້ຕົນເອງອຶດຫິວໃນຕອນເຊົ້າໆ ເປັນອັນຂາດ ເພາະຮ່າງກາຍຈະບໍ່ຢາກເຮັດວຽກນັ້ນເອງ ເຊິ່ງອາຫານອຸດົມໄປດ້ວຍວິຕາມິນໂຕນີ້ກໍຄື ອາຫານໝູ່ ຄາລໂບໄຮເດດລວມທັງຊີ້ນໝູ ໂຮມເກນ ໄຂ່ໄກ່ ຕັບ ຂະໜົມປັງ ໂຢເກີດ ແລະ ນົມ
ວິຕາມິນບີ 2 (ໄລໂບເຟນວິນ) ປ້ອງກັນອາການເຈັບຫົວຈາກການຄິດວຽກຕະຫລອດໝົດມື້
ໃຜທີ່ໃຊ້ພະລັງສະຫມອງຄິດວຽກຫລາຍໄປຈົນເຮັດໃຫ້ອາການເຈັບຫົວຖາມຫາຢູ່ເລື້ອຍໆ ໂດຍສະເພາະອາການປວດ ໄມເກນ ລອງບຳລຸງຮ່າງກາຍດ້ວຍວິຕາມິນບີ 2 ທີ່ມີຄຸນສົມບັດຄ້າຍຄຶງກັບສານຕ້ານໍນຸມູນອິດສະຫລະ ປ້ອງກັນເຊນລ໌ຕ່າງ ໆ ໃນຮ່າງກາຍບໍ່ໃຫ້ຖືກເຮັດຮ້າຍ ແລະຊ່ວຍກະຕຸ້ນລະບົບໄຫລວຽນເລືອດເປັນປົກກະຕິ ທີ່ສຳຄັນຄືຖ້າເຮົາບໍ່ຂາດວິຕາມິນຊະນິດນີ້ກໍຈະເຮັດໃຫ້ເຮົາເບິ່ງອ່ອນກວ່າໄວ ແລະ ຫ່າງໄກຈາກພະຍາດຫົວໃຈນໍາອີກ ດັ່ງນັ້ນ ໃນທຸກໆ ເຊົ້າກໍບໍ່ຄວນພາດອາຫານທີ່ອຸດົມດ້ວຍວິຕາມິນບີ 2 ແບບເນັ້ນໆ ເຊັ່ນ ຜະລິດຕະພັນນົມ ຜັກໃບຂຽວ ກ້ວຍ ຂະໜົມປັງ ແລະຊີລຽວ
ວິຕາມິນບີ 3 (ໄນອາຊິນ) ຊ່ວຍໃຫ້ສິວບໍ່ຂຶ້ນຈາກການອົດຫລັບອົດນອນ
ຖ້າຫາກການອົດຫລັບອົດນອນຫລາຍຄືນຕິດຕໍ່ກັນ ເຮັດໃຫ້ສິວຂຶ້ນເທິງໜ້າລາວກັບດອກເຫັດ ແຕ່ກໍບໍ່ຕ້ອງຕົກໃຈໄປ ລອງບຳລຸງຮ່າງກາຍດ້ວຍວິຕາມິນບີ 3 ທີ່ມີຄຸນສົມບັດທາງການແພດຊ່ວຍກະຕຸ້ນໄຂມັນຊະນິດດີໃນເລືອດ (HDL) ເຮັດໃຫ້ລະບົບໄຫລວຽນເລືອດເປັນປົກກະຕິດີ ດັ່ງນັ້ນ ຖ້າຮູ້ໂຕຕ້ອງນອນເດິກຈາກມໍລະສຸມງານຕ້ອງບຳລຸງອາຫານທີ່ມີວິຕາມິນບີ 3 ຫລາຍໆ ເຊັ່ນ ປາ ຊີ້ນໄກ່ ຊີ້ນເປັດ ຜັກຄະ ຜັກອີ່ເລີດ ເຫັດ ແລະ ອາໂວຄາໂດ
ວິຕາມິນບີ 5 (ກົດແພນໂທເທນິກ) ຊ່ວຍໃຫ້ຮ່າງກາຍຜ່ອນຄາຍຄວາມເຄັ່ງຄຽດ
ໃຜທີ່ຮູ້ສຶກວ່ານອນພັກຜ່ອນແລ້ວຍັງບໍ່ເຊົາຄຽດຈາກງານ ກໍລອງຫັນມາບຳລຸງຮ່າງກາຍດ້ວຍອາຫານທີ່ມີວິຕາມິນບີ 5 ເບິ່ງ ເພາະວິຕາມິນບີ 5 ຊ່ວຍກະຕຸ້ນໃຫ້ຕ່ອມໝວດຫມາກໄຂ່ຫລັງຜະລິດຮໍໂມນຫລຸດຄຽດອອກມາໃຫ້ເຮົາຮູ້ສຶກຜ່ອນຄາຍຫລາຍຂຶ້ນ ນອກຈາກນີ້ ຍັງຊ່ວຍໃຫ້ຮ່າງກາຍຜະລິດຮໍໂມນ ເທດໂທດເຕີໂລນ ທີ່ມີຜົນຕໍ່ການສ້າງເມັດເລືອດແດງໃນກະແສເລືອດນໍາອີກ
ປະໂຫຍດຂອງວິຕາມິນໂຕນີ້ຍັງບໍ່ໝົດພຽງເທົ່ານີ້ ບາງຜົນການວິໄຈບອກວ່າ ວິຕາມິນບີ 5 ຊ່ວຍຫລຸດສັນຍານຄວາມລ່ວງໂຮຍແຫ່ງໄວໄດ້ນໍາອີກ ເຊັ່ນ ຮິວຮອຍຫ່ຽວແຫ່ງ ຮອຍຕີນກາ ຝ້າ ແລະ ຈຸດດ່າງດຳ ເປັນຕົ້ນ ດັ່ງນັ້ນ ຖ້າບໍ່ຢາກໃຫ້ວຽກດຶງຄວາມອ່ອນໄວຂອງເຮົາໄປຟຣີໆ ກໍຮີບບຳລຸງຕົນເອງດ້ວຍອາຫານຕໍ່ໄປນີ້ໂດຍດ່ວນເລີຍ ໄດ້ແກ່ ສາລີ ໄຂ່ແດງ ແກ່ນໝາກມ່ວງຫີນມະພານ ແລະ ຖົ່ວເຫລືອງ
ວິຕາມິນບີ 6 (ໄພລິດອກຊີນ) ຊ່ວຍໃຫ້ບໍ່ໃຈຮ້າຍກ່ອນປະຈຳເດືອນມາ
ສາວໆ ຄົນໃດທີ່ຮູ້ໂຕວ່າ ມັກຈະມີອາການນອນບໍ່ຫລັບໃນຕອນກາງຄືນ ແລະ ມີອາລົມປັ່ນປ່ວນເຂົ້າມາແວະວຽນກ່ອນເຖິງມື້ນັ້ນຂອງເດືອນສະເໝີ ຂໍແນະນຳເລີຍວ່າໃຫ້ບຳລຸງຮ່າງກາຍດ້ວຍວິຕາມິນບີ 6 ຫລາຍໆ ຈະໄດ້ບໍ່ຫລຸດໃຈຮ້າຍໃສ່ໝູ່ຮ່ວມງານ ວິຕາມິນຕົວນີ້ ຈະຊ່ວຍປັບສົມດຸນຮໍໂມນໃຫ້ເປັນປົກກະຕິຈາກການກະຕຸ້ນສະຫມອງໃຫ້ຫລັ່ງສານຜ່ອນຄາຍທີ່ສຳຄັນ ເຊັ່ນ ສານເຊໂລໂທນິນ ເມລາໂທນິນ ແລະ ນອລເອພິເນຟຣິນ ທີ່ສາມາດຫລຸດຄວາມປັ່ນປ່ວນຂອງອາລົມເຮົາບໍ່ໃຫ້ຫລາຍເກີນໄປນັ້ນເອງ ເຊິ່ງອາຫານທີ່ສາວໆ ຄວນເນັ້ນບຳລຸງຮ່າງກາຍໃນໄລຍະກ່ອນປະຈຳເດືອນມາ ໄດ້ແກ່ ໄກ່ ປາທູນາ ປາແຊວມອນ ກ້ວຍ ໝາກໂມງ ແກ່ນຕາເວັນ ຊີດ ເຂົ້າກ້ອງ ແລະ ກາລົດ
ວິຕາມິນບີ 7 (ໄບໂອຕິນ) ຊ່ວຍເຮົາບໍ່ເບິ່ງໂຊມເຖິງແມ່ນຈະເຮັດວຽກໜັກ
ເຖິງແມ່ນວ່າ ຈະເປັນພະນັກງານຫ້ອງການທີ່ມີວຽກຫຍຸ້ງຕະຫລອດ ຈົນຮ່າງກາຍເບິ່ງໂຊມລົງທຸກປີ ແຕ່ຖ້າລອງຫັນມາເນັ້ນບຳລຸງຕົນເອງດ້ວຍວິຕາມິນບີ 7 ກໍຈະຊ່ວຍເຮັດໃຫ້ເຮົາເປັ່ງປັ່ງ ມີນ້ຳມີນວນຂຶ້ນ ເພາະວິຕາມິນຊະນິດນີ້ຈະຊ່ວຍກັກເກັບສານອາຫານປະເພດໂປຕີນໄປຫລໍ່ລ້ຽງຈຸລັງຕ່າງໆ ເຊັ່ນ ເສັ້ນຜົມ ຜິວພັນ ແລະ ເລັບໃຫ້ມີສຸຂະພາບດີ ດັ່ງນັ້ນຖ້າຢາກເປັນໜຸ່ມສາວຫ້ອງການສຸຂະພາບດີແຫ່ງປີກໍຕ້ອງເນັ້ນອາຫານທີ່ອຸດົມດ້ວຍວິຕາມິນບີ 7 ຫລາຍແນ່ ໄດ້ແກ່ ເຂົ້າບາເລ ຊີ້ນສັດ ຊີ້ນປາ ມັນຝຣັ່ງ ກະຫລ່ຳດອກ ໄຂ່ແດງ ແລະ ນົມ
ວິຕາມິນບີ 9 (ໂຟເລດ) ປ້ອງກັນພາວະເລືອດຈາງ
ຫລາຍຄົນສົງໄສວ່າ ວິຕາມິນບີ 9 ໜ້າຈະເໝາະສົມກັບແມ່ທີ່ກໍາລັງມີນ້ອງຫລາຍກວ່າຄົນເຮັດວຽກຫ້ອງການ ເພາະວິຕາມິນບີ 9 ຊ່ວຍປ້ອງກັນອາການໜ້າມືດຈາກພາວະເລືອດຈາງ ຫລຸດອາການຊຶມເສົ້າຈາກການຖືພາ ຊ່ວຍຫລຸດອາການຂີ້ຫລົງ ຂີ້ລືມ ລວມເຖິງຊ່ວຍເສີມສ້າງລະບົບປະສາດ ແລະ ສະຫມອງຂອງລູກນ້ອຍໃນມົດລູກໃຫ້ມີພັດທະນາການທີ່ສົມບູນນໍາອີກ
ແຕ່ກໍເພາະປະໂຫຍດສຳຄັນເຫລົ່ານີ້ ນີ້ແຫລະທີ່ມີຜົນຕໍ່ພະນັກງານຫ້ອງການ ໂດຍສະເພາະຄົນເຮັດວຽກທີ່ຕ້ອງນັ່ງແປະຢູ່ໜ້າຈໍຄອມພິວເຕີເປັນເວລາດົນ ບາງເທື່ອອາດເຮັດໃຫ້ເປັນວິນໄດ້ງ່າຍໆ ເພາະເລືອດໄປລ້ຽງສະຫມອງບໍ່ພຽງພໍ ຫລື ເກີດພາວະເລືອດຈາງ ເຊິ່ງວິຕາມິນບີ 9 ຈະຊ່ວຍກະຕຸ້ນຂະບວນການຜະລິດຈຸລັງເມັດເລືອດແດງ ຊ່ວຍໃຫ້ຮ່າງກາຍບໍ່ເມື່ອຍຈາກການເຮັດວຽກງານນັ້ນເອງ ດັ່ງນັ້ນ ຖ້າຫາກວຽກຫຍຸ້ງຈົນເກືອບບໍ່ໄດ້ລຸກຍ່າງໄປໃສ ກໍຄວນບຳລຸງຕົນເອງດ້ວຍອາຫານທີ່ມີວິຕາມິນໂຕນີ້ໃຫ້ຫລາຍໆ ໄດ້ແກ່ ໝາກອຶ ກາລົດ ຕັບ ຜັກໃບຂຽວ ໜໍ່ໄມ້ຝຣັ່ງ ໄຂ່ແດງ ແລະ ພືດຕະກູນຖົ່ວ
ວິຕາມິນບີ 12 (ໂຄບາລາມິນ) ບຳລຸງຄວາມຈຳບໍ່ໃຫ້ຫລົງລືມ
ຖ້າຕາຕະລາງວຽກໃນມື້ໜຶ່ງໆ ມີຫລາຍສິ່ງຕໍ່ຄິວໃຫ້ຈັດການຍາວໆ ເຈົ້າກໍ່ໝັ້ນໃຈໄດ້ວ່າ ເອົາຢູ່ທຸກຄິວແນ່ນອນ ຖ້າຫາກບຳລຸງຮ່າງກາຍບໍ່ຂາດດ້ວຍວິຕາມິນບີ 12 ເປັນປະຈຳ ໂດຍວິຕາມິນຊະນິດນີ້ຈະເຮັດວຽກຮ່ວມກັບວິຕາມິນບີ 9 ຊ່ວຍບຳລຸງລະບົບປະສາດ ແລະ ສະຫມອງໃຫ້ເຮັດວຽກເປັນປົກກະຕິ ຊ່ວຍກະຕຸ້ນຂະບວນການຜະລິດ ຈຸລັງເມັດເລືອດແດງ ແລະ ຍັງຊ່ວຍຜະລິດທາດເຫລັກໃຫ້ຈຸລັງເມັດເລືອດແດງນໍາອີກດັ່ງນັ້ນ ໃຜທີ່ເປັນຄົນທີ່ຈິງຈັງໂຕແທ້ຕ້ອງບໍ່ລືມບຳລຸງຕົນເອງດ້ວຍວິຕາມິນໂຕນີ້ ໄດ້ແກ່ ຫອຍ ຜະລິດຕະພັນຈາກນົມ ໄຂ່ໄກ່ ຊີ້ນສັດ ເຄື່ອງໃນສັດ ແລະ ເຕົ້າຫູ້
ຢ່າງໃດກໍຕາມ ໃຜທີ່ກິນອາຫານຄົບທັງ 5 ໝູ່ແລ້ວແຕ່ຮ່າງກາຍຍັງຟ້ອງວ່າຂາດວິຕາມິນບາງໂຕຢູ່ ອາດຕ້ອງມາເບິ່ງວ່າ ເຮົາຫລົງລືມເລື່ອງການອອກກຳລັງກາຍໄປຫລືບໍ່ ເພາະບາງເທື່ອການໃສ່ໃຈພຽງແຕ່ດ້ານໂພສະນາການຢ່າງດຽວກໍບໍ່ພໍ ຕ້ອງໝັ່ນບໍລິຫານຮ່າງກາຍຄອບຄູ່ໄປນໍາ ສຸຂະພາບກາຍ ແລະ ໃຈຂອງເຮົາກໍຈະໄດ້ສົມບູນ ແຂງແຮງໄປນໍາ