ລັດຖະບານເປີດເຜີຍ ເຖິງຕົ້ນບັນຫາການເບີກຈ່າຍເງິນເດືອນພະນັກງານລັດຖະກອນຫຼ້າຊ້າ ແມ່ນຄາຢູ່ຂອດປະສານ
ງານລະຫວ່າງແຂວງກັບເມືອງ ອັນມີສາຍເຫດມາຈາກ ຂັ້ນຕອນການດຳເນີນດ້ານເອກະສານການຈ່າຍ ແລະ ການຂໍ
ຖອນ ຂະນະທີ່ເງິນເດືອນງວດທຳອິດຂອງສົກນີ້ ກະຊວງການເງິນໄດ້ໂອນໃຫ້ທ້ອງຖິ່ນໝົດເປັນທີ່ຮຽບຮ້ອຍແລ້ວ.
ຕະຫຼອດໄລຍະຜ່ານມາ ເຖິງແມ່ນລັດຖະບານ ກໍຄືກະຊວງການເງິນໄດ້ມີຄວາມພະຍາຍາມຢ່າງຈິງຈັງກໍຕາມ ຕໍ່ກັບການ
ເບີກຈ່າຍເງິນເດືອນພະນັກງານລັດໃຫ້ທັນກັບເວລາ ໂດຍຖືເປັນວຽກບຸລິມະສິດທີໜຶ່ງ ແຕ່ຂະນະນີ້ບັນຫາດັ່ງກ່າວ ກໍຍັງ
ມີຄວາມຫຍຸ້ງຍາກ ແລະ ຫຼ້າຊ້າຢູ່ ອັນມີຜົນກະທົບຢ່າງຕໍ່ເນື່ອງຕໍ່ຖັນແຖວພະນັກງານ, ທະຫານ, ຕຳຫຼວດ ໃນຂອບເຂດ
ທົ່ວປະເທດທີ່ມີລາຍຮັບທາງດຽວ ຄືເງິນເດືອນເພື່ອລ້ຽງຊີບ ແລະ ຄອບຄົວ.
ແນວໃດກໍດີ ທີ່ສະພາແຫ່ງຊາດວັນທີ 25 ທັນວານີ້ ທ່ານ ບຸນຊຸ່ມ ສີສະຫວັດ ຫົວໜ້າຫ້ອງການກະຊວງການເງິນໄດ້ຊີ້ແຈງ
ຕໍ່ຂໍ້ຊັກຖາມຂອງປະຊາຊົນ ທີ່ໂທຜ່ານສາຍດ່ວນສະພາກ່ຽວກັບບັນຫານີ້ວ່າ: ສຳລັບການເບີກຈ່າຍເງິນເດືອນທີ່ຫຼ້າຊ້ານັ້ນ
ແມ່ນຈະເກີດຂຶ້ນຢູ່ ໃນລະຫວ່າງການປະສານງານຂອງແຂວງກັບເມືອງ ຊຶ່ງມີສາເຫດມາຈາກຂັ້ນຕອນການດຳເນີນເອ
ກະສານການເບີກຈ່າຍ ແລະ ຂອດການຂໍຖອນ.
ສຳລັບກະຊວງການເງິນ ທ່ານ ບຸນຊຸ່ມ ສີສະຫວັດ ລະບຸວ່າ: ໃນເດືອນ 11 ໄດ້ອອກແຈ້ງການກ່ຽວກັບມາດຕະການແກ້ໄຂ
ເງິນເດືອນ ແລະ ຍົກສູງຄວາມຮັບຜິດຊອບຈາກອົງການປົກຄອງທ້ອງຖິ່ນເປັນຜູ້ຕິດຕາມຊຸກຍູ້ ຊຶ່ງປະຕິບັດແຈ້ງ ການ
ດັ່ງກ່າວກະຊວງກໍໄດ້ມີການແຕ່ງຕັ້ງຄະນະລົງໄປຊຸກຍູ້ ຕິດຕາມໂດຍແມ່ນຫົວໜ້າຫ້ອງການກະຊວງການເງິນເປັນຫົວ
ໜ້າຄະນະດັ່ງກ່າວ.
ພ້ອມດຽວກັນນັ້ນ ກະຊວງການເງິນກໍໄດ້ຖືເອົາວຽກງານເງິນເດືອນເປັນບຸລິມະສິດອັນດັບໜຶ່ງ ຊຶ່ງສະແດງອອກໃນງວດ
ທີ 1 (ເດືອນ 10, 11, 12) ຂອງສົກງົບປະມານ 2014-2015 ນີ້ແມ່ນໄດ້ໂອນຮ່ວງເງິນເດືອນໃຫ້ບັນດາທ້ອງຖິ່ນໄປໝົດແລ້ວ
ຈາກສິ່ງດັ່ງກ່າວ ກະຊວງການເງິນຈະສືບຕໍ່ເພີ່ມທະວີຄວາມເອົາໃຈໃສ່ກັບທ້ອງຖິ່ນຂຶ້ນຕື່ມ ເພື່ອເຮັດໃຫ້ການເບີກຈ່າຍ
ເງິນເດືອນຢູ່ບັນດາຂັ້ນດັ່ງກ່າວໃຫ້ທ່ວງທັນກັບຄວາມຕ້ອງການຂອງພະນັກງານລັດຖະກອນ.
ແຫລ່ງຂ່າວ: ເສດຖະກິດ – ສັງຄົມ