ບາງຄົນມັກໃສ່ຄີມທຽມເພື່ອເພີ່ມຄວາມເຂັ້ມຂຸ້ນ ຫອມ ມັນ ແຕ່ເຈົ້າຮູ້ບໍວ່າຄີມທຽມເປັນໄຂມັນຊະນິດໜຶ່ງຮຽກວ່າໄຂມັນທຣານສ໌
ປະຕິເສດບໍ່ໄດ້ວ່າປະຈຸບັນກາເຟເປັນເຄື່ອງດື່ມຍອດຮິດຂອງຄົນໄວເຮັດວຽກ ຊຶ່ງລົດຊາດທີ່ມັກກໍແຕກຕ່າງກັນໄປ ບາງຄົນມັກໃສ່ນ້ຳຕານເພື່ອເພີ່ມຄວາມຫວານ ບາງຄົນມັກໃສ່ຄີມທຽມເພື່ອເພີ່ມຄວາມເຂັ້ມຂຸ້ນ ຫອມ ມັນ ແຕ່ເຈົ້າຮູ້ບໍວ່າຄີມທຽມເປັນໄຂມັນຊະນິດໜຶ່ງຮຽກວ່າໄຂມັນທຣານສ໌ (trans fat) ໄດ້ຈາກການນຳໄຂມັນບໍ່ອິ່ມຕົວ ເຊັ່ນ ນ້ຳມັນຖົ່ວເຫລືອງ ມາອັດໄຮໂດນເຈນເພື່ອເຮັດໃຫ້ແຂງເປັນໄຂ ແລະເຮັດໃຫ້ເປັນຜົງຕໍ່ໄປ ຊຶ່ງການບໍລິໂພກອາຫານທີ່ມີກົດໄຂມັນທຣານສ໌ຫລາຍໆ ຈະເປັນການເພີ່ມລະດັບ LDL (Low Density Lipoprotein) ຊຶ່ງເປັນຄໍເລດເຕີລໍຊະນິດຮ້າຍໃນເລືອດ ແລະລຸດລະດັບ HDL (High Density Lipoprotein) ຊຶ່ງເປັນຄໍເລດເຕີລໍຊະນິດດີໃນເລືອດ
ເນື່ອງຈາກໄຂມັນທຣານສ໌ເປັນໄຂມັນ ທີ່ເກີດຈາກການແປຮູບ ຊຶ່ງຍ່ອຍສະລາຍໄດ້ຍາກກວ່າໄຂມັນຊະນິດອື່ນ ເຮັດໃຫ້ຕັບຕ້ອງສະລາຍໄຂມັນທຣານສ໌ດ້ວຍວິທີການທີ່ແຕກຕ່າງໄປຈາກການຍ່ອຍສະລາຍໄຂມັນຕົວ ອື່ນຈຶ່ງອາດກໍ່ໃຫ້ເກີດສະພາວະທີ່ຜິດປົກກະຕິກັບຮ່າງກາຍຄື ມີຄວາມສ່ຽງສູງທີ່ຈະເປັນພະຍາດເບົາຫວານ ພະຍາດຄວາມດັນເລືອດສູງ ພະຍາດຫົວໃຈຂາດເລືອດ ພະຍາດຫລອດເລືອດຫົວໃຈຕີບ ພະຍາດໄຂມັນອຸດຕັນໃນເສັ້ນເລືອດ ມີພາວະການເຮັດວຽກງານຂອງຕັບທີ່ຜິດປົກກະຕິ ນ້ຳໜັກແລະໄຂມັນສ່ວນເກີນເພີ່ມຫລາຍຂຶ້ນ
ນອກຈາກນີ້ ພິດໄພຂອງໄຂມັນທຣານສ໌ໄດ້ຮັບການພິສູດໂດຍງານວິໄຈຂອງຮາລ໌ວາດ ຊຶ່ງຕິດຕາມຜົນ ສຳລວດຂອງປະຊາຊົນລາວແປດໝື່ນຄົນເປັນເວລາດົນ 12 ປີ ໂດຍຈຳແນກອອກເປັນກຸ່ມໆ ຕາມຊະນິດທີ່ມາຂອງພະລັງງານທີ່ເພີ່ມເຂົ້າມາລະຫວ່າງການວິໄຈ ແລ້ວປຽບທຽບກັນວ່າກາບໍລິໂພກແຫລ່ງພະລັງງານແບບໃດຈະເປັນພະຍາດຫລອດເລືອດຫົວໃຈ ຫລາຍກວ່າກັນ ໂດຍໃຊ້ກຸ່ມທີ່ໄດ້ພະລັງງານເພີ່ມມາຈາກຄາລ໌ໂບໄຮເດຣ ເປັນຕົວຕັ້ງ ຈາກງານວິໄຈນີ້ພົບວ່າພວກທີ່ໄດ້ ພະລັງງານຈາກໄຂມັນທຣານປ່ວຍເປັນພະຍາດຫລອດເລືອດຫົວໃຈຫລາຍກວ່າພວກທີ່ໄດ້ພະລັງງານຈາກຄາລ໌ໂບໄຮເດຣຕເຖິງ 93 % ສ່ວນພວກທີ່ໄດ້ພະລັງງານຈາກໄຂມັນອິ່ມຕົວເປັນພະຍາດຫລອດເລືອດຫົວໃຈຫລາຍກວ່າພວກທີ່ໄດ້ ພະລັງງານຈາກຄາລ໌ໂບໄຮເດຣຕ 17% ແລະພວກທີ່ໄດ້ພະລັງງານເພີ່ມມາຈາກໄຂມັນບໍ່ອິ່ມຕົວນັ້ນເປັນພະຍາດນ້ອຍກວ່າພວກທີ່ໄດ້ ພະລັງງານເພີ່ມຈາກຄາລ໌ໂບໄຮເດຣຕ ງານວິໄຈນີ້ເປັນຫລັກຖານຢືນຢັນວ່າໄຂມັນທຣານສ໌ຮ້າຍທີ່ສຸດ
ຮູ້ແບບນີ້ແລ້ວກາເຟຈອກຕໍ່ໄປໃນມືເຈົ້າກໍບໍ່ຄວນມີຄີມທຽມເປັນສ່ວນປະສົມເພື່ອສຸຂະພາບທີ່ດີຂໍແນະນຳໃຫ້ຫັນມາດື່ມນົມແທນດີກວ່າ ແຕ່ຖ້າຍັງຢຸດບໍ່ໄດ້ກໍຄວນດື່ມກາເຟໃນປະລິມານທີ່ພໍເໝາະ