ອາກາດເລີ່ມເຢັນລົງແລ້ວ ລອງມາຊອກຫາເຄື່ອງດື່ມດີໆ ຊ່ວຍບຳລຸງສຸຂະພາບ ແຖມຊ່ວຍຜ່ອນຄາຍຄວາມໜາວເຢັນໃນລະດູໜາວກັນດີກວ່າ ໃຜທີ່ກຽມໄປທ່ຽວພູ ຂຶ້ນຍອດດອຍໃນໄລຍະມື້ພັກຜ່ອນ ກຽມເຄື່ອງດື່ມດີໆ ຕໍ່ໄປນີ້ທີ່ນຳມາບອກກັນໄປນໍາອີກ
ນົມຮ້ອນ
ເປັນເຄື່ອງດື່ມທີ່ດື່ມງ່າຍ ແລະ ຍັງຊ່ວຍເພີ່ມຄຸນຄ່າທາງອາຫານໄດ້ທັງໂປຕີນແລະ ແຄຊຽມໃຫ້ກັບຮ່າງກາຍ ແລະ ນອກຈາກນີ້ຍັງຜ່ອນຄາຍໜາວໄດ້ເປັນຢ່າງດີ ໂດຍການດື່ມນົມອຸ່ນໆ ປະມານ 37 ອົງສາເຊຊຽນ ຫລື ເທົ່າກັບອຸນຫະພູມຮ່າງກາຍຂອງເຮົາເອງ ຈະມີຜົນດີີຫລາຍທີ່ສຸດ ເນື່ອງຈາກໂປຕີນ ແລະ ແຄຊຽມ ຈາກນົມຈະສາມາດແຕກໂຕໄດ້ດີກວ່າການດື່ມນົມເຢັນ ແລະ ຍັງສົ່ງຜົນຊ່ວຍໃນການຂະຫຍາຍຫລອດເລືອດຝອຍ ສົ່ງຜົນໃຫ້ສານອາຫານຕ່າງໆ ທີ່ລຳລຽງຜ່ານຫລອດເລືອດເດີນທາງໄປໄດ້ດີຂຶ້ນ
ໂກໂກຮ້ອນ
ຂອງມັກຂອງໃຜຫລາຍຄົນ ອຸດົມໄປດ້ວຍປະໂຫຍດຫລວງຫລາຍ ທັງສານຕໍ່ ຕ້ານອານຸມູນອິດສະຫລະ ນອກຈາກນີ້ຍັງມີໄຂມັນພຽງແຕ່ປະມານ 0.3 ກຣາມເທົ່ານັ້ນແລະ ເມື່ອດື່ມໄປແລ້ວຈະຊ່ວຍເພີ່ມຄວາມອົບອຸ່ນໃຫ້ແກ່ຮ່າງກາຍຂອງເຮົາໄດ້
ນົມຖົ່ວເຫລືອງ
ເອີ້ນອີກຢ່າງກໍຄື “ນ້ຳເຕົ້າຮູ້” ເຊິ່ງສາມາດໃຫ້ພະລັງງານກັບຮ່າງກາຍເຮົາໄດ້ບໍ່ໜ້ອຍເລີຍ ແຖມຍັງບໍ່ຕຸ້ຍ ເພາະໃນນ້ຳເຕົ້າຮູ້ມີໄຂມັນບໍ່ອີ່ມໂຕຫລາຍເຖິງ 63% ນອກເໜືອຈາກຄຸນຄ່າໃນແງ່ຂອງພະລັງງານແລ້ວ ຍັງມີວິຕາມິນອີ ໃນປະລິມານທີ່ສູງ ໂດຍມີສ່ວນສຳຄັນທີ່ຊ່ວຍຕ້ານສານອານຸມູນອິດສະຫລະ ຊ່ວຍເບິ່ງແຍງເນື້ອເຍື່ອຮ່າງກາຍໃຫ້ເປັນປົກກະຕິ ເຮັດໃຫ້ຜິວພັນສົດໃສ ຊະລໍຄວາມເຖົ້າ ຊ່ວຍປ້ອງການເກີດພະຍາດກະດູກພຸນ ພະຍາດຫົວໃຈລົ້ມເຫລວ ຖອກທ້ອງ ແລະ ຫລຸດຄວາມສ່ຽງຂອງການເກີດມະເຮັງລຳໄສ້ ແລະ ລິດສິດວງໄດ້ນໍາອີກ
ຊາ ແລະ ກາເຟ
ນີ້ເກືອບຈະເອີ້ນວ່າ ນິຍົມທີ່ສຸດໃນບັນດາເຄື່ອງດື່ມຜ່ອນຄາຍໜາວ ນອກຈາກ ຈະຫາດື່ມງ່າຍແລ້ວຍັງມີປະໂຫຍດຕໍ່ຮ່າງກາຍຫລາຍຢ່າງ ເຊັ່ນ ກາເຟ ກໍເປັນໂຕກະຕຸ້ນລະບົບປະສາດສ່ວນກາງເຮັດໃຫ້ບໍ່ຢາກນອນ ສະມາທິໃນການເຮັດວຽກງານດີຂຶ້ນແລະ ຍັງຫລຸດອາການປວດເມື່ອຍເນື່ອງຈາກໄຂ້ຫວັດ ກະຕຸ້ນອະໄວຍະວະຂອງຮ່າງກາຍ ແລະ ເປັນໂຕຫລຸດນ້ຳໜັກໄດ້ນໍາອີກ
ສ່ວນຊາ ກໍຊ່ວຍກະຕຸ້ນການໄຫລວຽນຂອງເລືອດ ຂະຫຍາຍຫລອດເລືອດ ຊ່ວຍໃຫ້ກ້າມຊີ້ນຜ່ອນຄາຍ ປ້ອງກັນພະຍາດຫົວໃຈຕີບ ບັນເທົາອາການເຈັບໜ້າເອິກ ປິ່ນປົວພະຍາດຫວັດ ແລະ ອາການເຈັບຫົວໄດ້ ແລະ ໃນໃບຊາຍັງມີສານໂພລິຟິນອນ ຄາໂບໄຮເດດ ແລະ ກົດອະມິໂນ ເມື່ອສານເຫລົ່ານີ້ເຮັດປະຕິກິລິຍາກັບນ້ຳລາຍ ກໍຈະຊ່ວຍກະຈາຍຄວາມຮ້ອນໃນຮ່າງກາຍອອກໄປພ້ອມໆ ກັບ ຂັບສານພິດໃນຮ່າງກາຍ
ນ້ຳຂີງ
ສະໝຸນໄພທີ່ມີລິດເຜັດຮ້ອນ ສາມາດຊ່ວຍໃຫ້ຄວາມອົບອຸ່ນແກ່ຮ່າງກາຍ ແລະຂັບເຫື່ອໄດ້ເປັນຢ່າງດີ ນອກຈາກນີ້ຍັງຊ່ວຍຍ່ອຍອາຫານ ແກ້ອາການທ້ອງອືດເຟີ ປຸ້ນທ້ອງຮາກ ລວມທັງຍັງຊ່ວຍຂະຫຍາຍຊ່ອງທາງເດີນຂອງເລືອດລົມທົ່ວຮ່າງກາຍ ໄລ່ຫວັດ ຫລຸດອາການອັກເສບ ບວມຕາມຂໍ້ຕ່າງໆ ລວມທັງບັນເທົາອາການປວດເມື່ອຍເນື່ອງຈາກຂໍ້ເສື່ອມນໍາອີກ