ທ່ານນາງ ການຈະນາ ສຸກພົມ ຜູ້ຈັດການຝ່າຍປະຊາສຳພັນຂອງບໍລິສັດ ໄຟຟ້າຫົງສາ ຈຳກັດ ໄດ້ແຈ້ງໃຫ້ຊາບວ່າ:
ໂຄງການໄຟຟ້າພະລັງງານຄວາມຮ້ອນຈາກຖ່ານຫີນ ທີ່ເມືອງຫົງສາ ແຂວງໄຊຍະບູລີ ເປັນໂຄງການຮ່ວມມືລະ
ຫວ່າງ ສປປ ລາວ ແລະ ປະເທດໄທ ເຊິ່ງໄດ້ຮັບອະນຸມັດສຳປະທານໂຄງການໃຫ້ກັບບໍລິສັດ ໄຟຟ້າຫົງສາ ຈຳກັດ
ແລະ ໄດ້ຈົດທະບຽນ ຈັດຕັ້ງເປັນນິຕິບຸກຄົນຕາມກົດໝາຍແຫ່ງ ສປປ ລາວ ໃນວັນທີ 15 ກໍລະກົດ 2009 ໂດຍມີ
ຜູ້ຖືຮຸ້ນ 3 ບໍລິສັດຄື: ລັດວິສາຫະກິດຖືຮຸ້ນລາວ 20% ບໍລິສັດ ບ້ານປູພາວເວີ້ ຈຳກັດ 40% ແລະ ບໍລິສັດ ລາຊບູລີ
ຜະລິດໄຟຟ້າ ຈຳກັດມະຫາຊົນ 40% ດ້ວຍມູນຄ່າທັງໝົດ 30.710 ລ້ານໂດລາສະຫະລັດ.
ກຳລັງການຜະລິດຈຳນວນ 3 ເຄື່ອງ ລວມ 1.878 ເມກາວັດ ການຜະລິດໄຟຟ້າແມ່ນຈຳໜ່າຍ ໃຫ້ກັບລັດວິສາຫະ
ກິດໄຟຟ້າລາວ 100 ເມກາວັດ ແລະ ການໄຟຟ້າຝ່າຍການຜະລິດແຫ່ງປະເທດໄທ 1.473 ເມກາວັດ ສ່ວນທີ່ເຫຼືອ
ແມ່ນນຳໃຊ້ໃນຫົງສາ ແລະ ພາຍໃນໂຄງການເອງເປັນເວລາ 25 ປີ (2016-2041) ໂຄງການດັ່ງກ່າວ ໄດ້ດຳເນີນ
ການກໍ່ສ້າງມາແຕ່ 2010 ໂດຍບໍລິສັດ CNEEC (China National Electric Equipment Corporation) ເປັນຜູ້
ຮັບເໝົາທີ່ມີຄວາມຊ່ຽວຊານໃນການກໍ່ສ້າງໂຮງງານໄຟຟ້າ ແລະ ມີເຕັກໂນໂລຊີທີ່ທັນສະໄໝ ເປັນທີ່ຍອມຮັບ
ໃນລະດັບສາກົນ.
ມາຮອດປັດຈຸບັນນີ້ ການກໍ່ສ້າງໂຮງໄຟຟ້າ ແລະ ອົງປະກອບຕ່າງໆໂດຍລວມສຳເລັດ 92,9% ສ່ວນໜ້າວຽກສຳ
ຄັນ ທີ່ພວມດຳເນີນແມ່ນວຽກງານກໍ່ສ້າງໂຮງໄຟຟ້າສຳເລັດ 93,6% ເຊິ່ງວຽກທີ່ພົ້ນເດັ່ນປະກອບມີ: ການອະນາ
ໄມສິ່ງເສດເຫຼືອອອກຈາກລະບົບໝໍ້ຕົ້ມນ້ຳຂອງເຄື່ອງຜະລິດໄຟຟ້າ ວຽກການເປີດໜ້າດິນ ຕິດຕັ້ງອຸປະກອນ
ສຳລັບຂຸດຄົ້ນບໍ່ແຮ່ ວຽກກຽມລະບົບຈັດການຂີ້ເທົ່າ ລວມທັງວຽກສຳຄັນອື່ນໆຖືວ່າສຳເລັດເປັນສ່ວນໃຫຍ່ ແລະ
ຈະສາມາດທົດລອງຜະລິດໄຟຟ້າໜ່ວຍທີ 1 ທົດລອງເດີນເຄື່ອງລະບົບຈັດການຂີ້ເທົ່າລອຍ ແລະ ລະບົບຈັດທາດ
ອາຍມາດ ໃນເດືອນມັງກອນ 2015 ທີ່ຈະມາເຖິງ ສ່ວນເດືອນມີນາ ການອະນາໄມສິ່ງເສດເຫຼືອອອກຈາກລະບົບ
ໂຮງໄຟຟ້າໜ່ວຍທີ 2 ເດືອນມິຖຸນາ ຜະລິດ ແລະ ຂາຍໄຟຟ້າໜ່ວຍທີ 1 ແລະ ເດືອນພະຈິກ 2015 ຜະລິດ ແລະ
ຂາຍໄຟຟ້າໜ່ວຍທີ 2 ແລະ ດຳເນີນການຕາມລຳດັບຂັ້ນຕອນຂອງໂຄງການທີ່ວາງໄວ້.
ແຫລ່ງຂ່າວ: ວຽງຈັນໃໝ່