ໃນທ້າຍອາທິດຜ່ານມາ ເຈົ້າໜ້າທີ່ໜ່ວຍສະເພາະກິດກະຊວງປ້ອງກັນຄວາມສະຫງົບ ໄດ້ເຂົ້າມ້າງກຸ່ມແກ້ງອາຊະຍາກໍາທາງອິນເຕີເນັດ, ເວບພະນັນທາງອອນລາຍ ຢູ່ 2 ຈຸດຄື: ໂຮງແຮມ ແມັງ ໂກຣຟ ແລະ ອາພາດເມັ້ນ ກໍລໍລີ່ ຕັ້ງຢູ່ບ້ານຝາຍ ເມືອງ ໄຊເສດຖາ ນະຄອນຫຼວງວຽງຈັນ ສາມາດກັກຕົວຜູ້ຖືກຫາໄດ້ທັງໝົດ 139 ຄົນ ຍິງ 54 ຄົນ ລວມມີ 4 ສັນຊາດ.
ສະເພາະ ໂຮງແຮມ ແມ້ງໂກຮຟ: ສາມາດກັກຕົວຜູ້ກະທຳຜິດໄດ້ ຈໍານວນ 114 ຄົນ ຍິງ 50 ຄົນ, ມີ 4 ສັນຊາດ ຄື: ສັນຊາດ ໄທ ມີ 105 ຄົນ ຍິງ 48 ຄົນ, ສັນຊາດ ຈີນ 7 ຄົນ ຍິງ 1 ຄົນ, ສັນຊາດ ຈີນ-ໄຕ້ຫວັນ 1 ຄົນ, ສັນຊາດ ກຳປູເຈຍ 1 ຄົນ; ຢຶດເຄື່ອງຂອງກາງ ທີ່ນໍາໃຊ້ເຂົ້າໃນການທະທໍາຜິດ ມີຄອມພິວເຕີໂນດບຸກ ຈໍານວນ 17 ໜ່ວຍ, ໂທລະສັບມືຖື ຈໍານວນ 321 ໜ່ວຍ, ໄອແພັດ ຈໍານວນ 11 ໜ່ວຍ, ແທັບເລັດ ຈໍານວນ 10 ໜ່ວຍ, ຈໍແຊ ຄອມພິວເຕີ້ ຈໍານວນ 2 ໜ່ວຍ, ຫົວນໍ້າຢາ ຢາສູບໄຟຟ້າ ຈໍານວນ 24 ອັນ, ຢາສູບໄຟຟ້າ ຈໍານວນ 5 ອັນ, ນໍ້າຢາປະສົມ ນໍ້າກະທ້ອມ ຈໍານວນ 4 ແກ້ວ ແລະ ໃບກະທ້ອມ ບັນຈຸໃນຖົງອີກ 1 ຖົງ.
ແລະ ຈຸດທີ 2 ແມ່ນອາພາດເມັ້ນ ກໍລໍລີ່: ສາມາດກັກຕົວຜູ້ກະທໍາຜິດໄດ້ ຈໍານວນ 25 ຄົນ, ຍິງ 4 ຄົນ ລວມມີ 3 ສັນຊາດ ຄື: ສັນຊາດ ໄທ ມີ 12 ຄົນ ຍິງ 4 ຄົນ, ສັນຊາດຈີນ ມີ 7 ຄົນ ແລະ ສັນຊາດ ຈີນ-ໄຕ້ຫວັນ 6 ຄົນ; ຢຶດເຄື່ອງຂອງກາງ ໄດ້ມີຄອມພິວເຕີຕັ້ງໂຕະ ຈໍານວນ 8 ໜ່ວຍ, ຄອມພິວເຕີໂນດບຸກ ຈໍານວນ 9 ໜ່ວຍ, ໂທລະສັບມືຖື ຈໍານວນ 119 ໜ່ວຍ, ໄອແພັດ ຈໍານວນ 3 ໜ່ວຍ, ເມັດຂາວຄ້າຍຄື ສານເສບຕິດຈໍານວນ 2 ຖົງນ້ອຍ (ຍັງບໍ່ທັນພິສູດ ແລະ ສັ່ງນໍ້າໜັກ), ກັບໄຟ ຈໍານວນ 39 ແກັດ.
ປັດຈຸບັນເຈົ້າໜ້າທີ່ກໍາລັງດໍາເນີນການສືບສວນ-ສອບສວນຜູ້ຖືກຫາ ເພື່ອຂະຫຍາຍຜົນຊອກຫາປົວໂປ່ໂຕການ ແລະ ກຸ່ມແກ້ງມາດໍາເນີນຄະດີຕາມລະບຽບກົດໝາຍ.
ໂອກາດນີ້, ຂໍສະແດງຄວາມຂອບໃຈຕໍ່ພໍ່ແມ່ປະຊາຊົນ ພົນລະເມືອງດີ ທີ່ໄດ້ແຈ້ງຂໍ້ມູນທີ່ເປັນປະໂຫຍດໃຫ້ເຈົ້າໜ້າທີ່ ຈົນນຳໄປສູ່ການບຸກມ້າງຂະບວນການດັ່ງກ່າວ ແລະ ຫວັງຢ່າງຍິ່ງວ່າພໍ່ແມ່ປະຊາຊົນທຸກທົ່ວໜ້າຈະຊ່ວຍເປັນຫູເປັນຕາຊ່ວຍເຈົ້າໜ້າທີ່, ຫາກທ່ານພົບເຫັນບຸກຄົນ, ກຸ່ມຄົນ ແລະ ສະຖານທີ່ ທີ່ສົງໄສເຄື່ອນໄຫວກະຜິດຕໍ່ກົດໝາຍ ໃຫ້ຮີບຮ້ອນແຈ້ງຕໍ່ເຈົ້າໜ້າທີ່ໂດຍດ່ວນ, ແຈ້ງເຂົ້າມາທາງເພຈຂອງພວກເຮົາ ຫຼື ເພຈກົມຕຳຫຼວດເສດຖະກິດ ຫຼື ແຈ້ງເຂົ້າສາຍດ່ວນ 1533 ໄດ້ຕະຫຼອດເວລາ
ອ້າງອີງຈາກ: ຄວາມສະຫງົບ Lao Security News