ໃນເວລາ 10:00 ໂມງ ຂອງວັນທີ 27 ສິງຫາ 2026 ເຈົ້າໜ້າທີ່ໜ່ວຍສະເພາະກິດກະຊວງປ້ອງກັນຄວາມສະຫງົບ ໄດ້ສົມທົບກັບກອງບັນຊາການປ້ອງກັນເຄື່ອນທີ່, ກົມໃຫຍ່ສັນຕິບານ ແລະ ກອງບັນຊາການປ້ອງກັນທີຕັ້ງ ໄດ້ເຂົ້າ ມ້າງກຸ່ມແກ້ງອາຊະຍາກໍາທາງອິນເຕີເນັດ, ການພະນັນ ຢູ່ຈຸດໂຮງແຮມໂກນຟຸກ, ເຂດເສດຖະກິດພິເສດລອງແທງ ບ້ານດົງໂພສີ ແລະ ໂຮງແຮມປານີ ບ້ານ ດົງຄໍາຊ້າງ ທັງສອງຈຸດຂຶ້ນກັບເມືອງຫາດຊາຍຟອງ ນະຄອນຫຼວງວຽງຈັນ.

ຜ່ານການປະຕິບັດໜ້າທີ່ຕົວຈິງ ຈຸດທີ 1 ໂຮງແຮມໂກນຟຸກ ເຂດເສດຖະກິດພິເສດລອງແທງ: ສາມາດກັກຕົວຜູ້ກະທໍາຜິດໄດ້ ຈໍານວນ 62 ຄົນ ຍິງ 10 ຄົນ ລວມມີ 3 ສັນຊາດ ຄື: ສັນຊາດຈີນ ມີ 44 ຄົນ, ສັນຊາດຫວຽດນາມ ມີ 12 ຄົນ ຍິງ 7 ຄົນ; ສັນຊາດໄທ ມີ 6 ຄົນ ຍິງ 3 ຄົນ; ສາມາດຢຶດເຄື່ອງຂອງກາງ ມີຄອມພິວເຕີຕັ້ງໂຕະ ຈໍານວນ 98 ເຄື່ອງ, ຄອມພິວເຕີໂນດບຸກ ຈໍານວນ 24 ເຄື່ອງ, ໂທລະສັບມືຖື ຈໍານວນ 322 ເຄື່ອງ, ໄອແພັດ ຈໍານວນ 45 ເຄື່ອງ, ຊິມໂທລະສັບ ຈໍານວນ 60 ຊິມ.

ຈຸດທີ 2 ໂຮງແຮມປານີ: ສາມາດກັກຕົວຜູ້ກະທຳຜິດໄດ້ ຈໍານວນ 6 ຄົນ, ມີ 2 ສັນຊາດ ຄື: ສັນຊາດຈີນ ມີ 5 ຄົນ, ສັນຊາດໄທ ມີ 1 ຄົນ; ສາມາດຍຶດເຄື່ອງຂອງກາງ ມີຄອມພິວເຕີໂນດບຸກ ຈໍານວນ 1 ເຄື່ອງ, ໂທລະສັບມືຖື ຈໍານວນ 18 ເຄື່ອງ.

ປັດຈຸບັນ ເຈົ້າໜ້າທີ່ກໍາລັງດໍາເນີນການສືບສວນ-ສອບສວນຜູ້ຖືກຫາ ເພື່ອຂະຫຍາຍຜົນຊອກຫາປົວໂປ່ໂຕກາສ ແລະ ພັກພວກກຸ່ມແກ້ງມາດໍາເນີນຄະດີຕາມລະບຽບກົດໝາຍ.

ໂອກາດນີ້, ຂໍສະແດງຄວາມຂອບໃຈຕໍ່ພໍ່ແມ່ປະຊາຊົນ ພົນລະເມືອງດີ ທີ່ໄດ້ແຈ້ງຂໍ້ມູນທີ່ເປັນປະໂຫຍດໃຫ້ເຈົ້າໜ້າທີ່ ຈົນນຳໄປສູ່ການບຸກມ້າງຂະບວນການດັ່ງກ່າວ ແລະ ຫວັງຢ່າງຍິ່ງວ່າພໍ່-ແມ່ປະຊາຊົນທຸກທົ່ວໜ້າຈະຊ່ວຍເປັນຫູເປັນຕາຊ່ວຍເຈົ້າໜ້າທີ່, ຫາກທ່ານພົບເຫັນບຸກຄົນ, ກຸ່ມຄົນ ແລະ ສະຖານທີ່ ທີ່ສົງໄສເຄື່ອນໄຫວກະຜິດຕໍ່ກົດໝາຍ ໃຫ້ຮີບຮ້ອນແຈ້ງຕໍ່ເຈົ້າໜ້າທີ່ໂດຍດ່ວນ, ແຈ້ງເຂົ້າມາທາງເພຈຂອງພວກເຮົາ ຫຼື ເພຈກົມຕຳຫຼວດເສດຖະກິດ ຫຼື ແຈ້ງເຂົ້າສາຍດ່ວນ 1533 ໄດ້ຕະຫຼອດເວລາ.

ອ້າງອີງຈາກ: ຄວາມສະຫງົບ