ລັດຖະບານ ສປປ ລາວ ບັນລຸຄວາມຄືບໜ້າສຳຄັນໃນວຽກງານປົກປັກຮັກສາຊ້າງດ້ວຍຜົນສຳເລັດການຂຶ້ນທະບຽນ ແລະ ຝັງໄມໂຄຊິບໃຫ້ຊ້າງລ້ຽງ ຈຳນວນ 50 ເຊືອກ ໃນງານມະຫາກຳບຸນຊ້າງ ທີ່ ໄຊຍະບູລີ ປະຈຳປີ 2026. ນີ້ແມ່ນບາດກ້າວສຳຄັນໃນການປະຕິບັດພັນທະສົນທິສັນຍາສາກົນໄຊເຕັດ ເພື່ອສະກັດກັ້ນການຄ້າສັດປ່າທີ່ຜິດກົດໝາຍ.
ການຈັດຕັ້ງປະຕິບັດກິດຈະກຳດັ່ງກ່າວນຳພາໂດຍ ກົມປ່າໄມ້ ໃນນາມໜ່ວຍງານຄຸ້ມຄອງໄຊເຕັດ (CITES-MA) ຮ່ວມກັບ ກົມລ້ຽງສັດ ແລະ ການປະມົງ ແລະ ພະແນກກະສິກຳ ແລະ ສິ່ງແວດລ້ອມ ແຂວງໄຊຍະບູລີ ໂດຍໄດ້ຮັບການສະໜັບສະໜູນດ້ານເຕັກນິກ, ອຸປະກອນ ແລະ ຊ່ຽວຊານຈາກ ມູນນິທິອະນຸລັກຊ້າງ ແລະ ສິ່ງແວດລ້ອມ ປະເທດໄທ (Save Elephant Foundation Thailand).
ວຽກງານດັ່ງກ່າວ ໄດ້ຈັດຕັ້ງປະຕິບັດໃນລະຫວ່າງວັນທີ 10-13 ກຸມພາ 2026 ເພື່ອຕອບສະໜອງ ແຜນປະຕິບັດງານ (Compliance Action Plan) ແລະ ຂໍ້ແນະນຳຂອງ ຄະນະປະຈຳ CITES ຄັ້ງທີ 79 (SC79).
ຄະນະທີມງານ ໄດ້ລົງກວດສຸຂະພາບຊ້າງ ແລະ ຝັງໄມໂຄຊິບ (ມາດຕະຖານ ISO) ໃຫ້ແກ່ຊ້າງ ເພື່ອເກັບກຳຂໍ້ມູນເຂົ້າສູ່ “ລະບົບຂໍ້ມູນຊ້າງແຫ່ງຊາດ” (NEIMS). ການສ້າງຖານຂໍ້ມູນດິຈິຕອນນີ້ ຈະຊ່ວຍລະບຸຕົວຕົນຊ້າງທຸກເຊືອກຢ່າງຊັດເຈນ, ສ້າງຄວາມໂປ່ງໃສ ແລະ ສາມາດກວດສອບແຫຼ່ງທີ່ມາຍ້ອນຫຼັງໄດ້ (Traceability).
ທິດທາງໃນຕໍ່ໜ້າ ພາຍຫຼັງຜົນສຳເລັດທີ່ ແຂວງໄຊຍະບູລີ ຈະຂະຫຍາຍການຂຶ້ນທະບຽນ ແລະ ຝັງໄມໂຄຊິບ ໃຫ້ຊ້າງລ້ຽງທຸກເຊືອກທົ່ວປະເທດ ແລະ ລະບົບ NEIMS ຄາດວ່າຈະເປີດນຳໃຊ້ຢ່າງເຕັມຮູບແບບພາຍໃນວັນທີ 30 ມິຖຸນາ 2026. ສິ່ງນີ້ຈະເປັນຈຸດປ່ຽນສຳຄັນ ໃນການຍົກລະດັບການຄຸ້ມຄອງຊ້າງລາວໃຫ້ຍືນຍົງ ແລະ ຖືກຕ້ອງຕາມມາດຕະຖານສາກົນຢ່າງແທ້ຈິງ.