ພັທ ສຸລິວັນ ແກ້ວມະນີວົງ ຫົວໜ້າກອງບັນຊາການ ປກສ ເມືອງສີສັດຕະນາກ ນະຄອນຫຼວງວຽງຈັນ ໄດ້ໃຫ້ສຳພາດໃນວັນທີ 19 ກຸມພາ 2026 ກ່ຽວກັບການກະກຽມຄວາມພ້ອມ ໃນການເຮັດວຽກງານປ້ອງກັນຄວາມສະຫງົບ ບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນນະຄອນຫຼວງວຽງຈັນ ຊຸດທີ V ຢູ່ເຂດເມືອງສີສັດຕະນາກ ໂດຍຈະມີການວາງກຳລັງປ້ອງກັນຫຼາຍຮ້ອຍສະຫາຍເຂົ້າໃສ່ແຕ່ລະຈຸດໃນຂົງເຂດຄວາມຮັບຜິດຊອບ ເພື່ອຮັບປະກັນໃຫ້ການເລືອກຕັ້ງ ໄດ້ດໍາເນີນໄປຢ່າງເປັນລະບຽບຮຽບຮ້ອຍ ແລະ ມີຄວາມສະຫງົບປອດໄພຮອບດ້ານ (ໃນນັ້ນ, ມີກຳລັງ ປກສ ເມືອງ ແລະ ພະນັກງານກໍ່ສ້າງຮາກຖານ ແລະ ກຳລັງ ປກສ ບ້ານ) ປະສານສົມທົບກັນໃນການເຮັດໜ້າທີ່ປ້ອງກັນດ້ວຍຄວາມຮັບຜິດຊອບສູງ ຕາມທີ່ຂັ້ນເທິງມອບໝາຍໃຫ້.
ທາງກອງບັນຊາການ ປກສ ເມືອງສີສັດຕະນາກ ໄດ້ມີການກຳນົດເຂດຈຸດສຸມ ແລະ ແບ່ງຄວາມຮັບຜິດຊອບໃນການປ້ອງກັນຢູ່ແຕ່ລະໜ່ວຍເລືອກຕັ້ງ, ໄດ້ມີການຈັດວາງກໍາລັງປ້ອງກັນ ໂດຍສຸມໃສ່ປະຕິບັດໜ້າທີ່ໃນການກວດກາຄວາມປອດໄພຮອບດ້ານ ຂອງສະຖານທີ່ປ່ອນບັດເລືອກຕັ້ງ ກ່ອນເປີດໃຫ້ປະຊາຊົນເຂົ້າໄປໃຊ້ສິດ ຮັບປະກັນໃຫ້ການປ່ອນບັດ ດໍາເນີນໄປຕາມວາລະ ແລະ ສຳເລັດຕາມຄາດໝາຍ ທີ່ຂັ້ນເທິງກຳນົດໄວ້.
ນອກນັ້ນ, ຍັງຈະຈັດແບ່ງກໍາລັງວິຊາສະເພາະ ອອກກວດກາລາດຕະເວນຕາມຈຸດຫຼໍ່ແຫຼມ, ບ່ອນທີ່ມີຄວາມສ່ຽງທີ່ອາດຈະກໍ່ໃຫ້ເກີດຄວາມບໍ່ສະຫງົບ ເພື່ອສະກັດກັ້ນ ແລະ ແກ້ໄຂໃຫ້ທັນເວລາ. ຄຽງຄູ່ກັນນີ້ຍັງໄດ້ວາງມາດຕະການໃນການປ້ອງກັນ, ການວາງກໍາລັງ ເພື່ອອໍານວຍຄວາມສະດວກດ້ານການ ສັນຈອນຂອງພາຫະນະ ແລະ ຈັດສັນຄວາມເປັນລະບຽບຮຽບຮ້ອຍ ຢູ່ບໍລິເວນທາງເຂົ້າ-ອອກສະຖານທີ່ໜ່ວຍປ່ອນບັດເລືອກຕັ້ງ ໂດຍຈະຈັດຕັ້ງກໍາລັງກອງຮ້ອຍຈະລາຈອນ ເຂົ້າໃສ່ຈຸດສໍາຄັນຕ່າງໆ ເພື່ອເຮັດໜ້າທີ່ລະບາຍການສັນຈອນ ບ່ອນທີ່ມີການສັນຈອນແອອັດ ຫຼື ບ່ອນທີ່ມີປະຊາຊົນເຂົ້າໄປໃຊ້ສິດຈໍານວນຫຼາຍ ເພື່ອສະດວກໃນການເຂົ້າ-ອອກ ຂອງຜູ້ມາໃຊ້ສິດ ໃນມື້ປ່ອນບັດເລືອກຕັ້ງ.
ໂອກາດນີ້, ພັທ ສຸລິວັນ ແກ້ວມະນີວົງ ຕາງໜ້າໃຫ້ຄະນະພັກ-ຄະນະກອງບັນຊາການ ປກສ ເມືອງສີສັດຕະນາກ ກ່າວຕື່ມວ່າ: ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນນະຄອນຫຼວງວຽງຈັນ ຊຸດທີ V ເຊິ່ງເປັນປາງບຸນໃຫຍ່, ເປັນປາງບຸນທີ່ສໍາຄັນຂອງປະເທດຊາດ. ສະນັ້ນ, ເພື່ອເຮັດໃຫ້ວຽກງານປ້ອງກັນຊາດ-ປ້ອງກັນຄວາມສະຫງົບ ກາຍເປັນໜ້າທີ່, ກາຍເປັນພັນທະ, ກາຍເປັນຄວາມຮັບຜິດຊອບຂອງທົ່ວປວງຊົນ ຂ້າພະເຈົ້າຮຽກຮ້ອງໃຫ້ທຸກທ່ານ ຊ່ວຍເປັນຫູ-ເປັນຕາ, ເປັນກະບອກສຽງ ຖ້າພົບເຫັນປະກົດການທີ່ບໍ່ດີ ທີ່ບຸກຄົນ ຫຼື ກຸ່ມຄົນກໍ່ເຫດຮ້າຍຂຶ້ນ ກໍໃຫ້ແຈ້ງເຈົ້າໜ້າທີ່ ເພື່ອເຂົ້າສະກັດກັ້ນ-ແກ້ໄຂໃຫ້ທັນເວລາ ແລະ ຮຽກຮ້ອງມາຍັງພົນລະເມືອງ ລາວທຸກທ່ານ ທີ່ມີສິດ ໃຫ້ເຂົ້າຮ່ວມໃຊ້ສິດປະຊາທິປະໄຕຂອງຕົນ ເພື່ອເລືອກເອົາສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນນະຄອນຫຼວງວຽງຈັນ ຊຸດທີ V ໃຫ້ຮັບປະກັນຕາມຈຸດປະສົງ ແລະ ລະດັບຄາດໝາຍ.
ແຫຼ່ງຂໍ້ມູນ: ຄວາມສະຫງົບ Lao Security News