ໃນວັນທີ 28 ມັງກອນ 2026, ສະຖານທູດລາວ ໄດ້ຈັດພິທີບາສີສູ່ຂວັນ ແລະ ງານລ້ຽງອາຫານຄໍ່າ ເປັນກຽດໃຫ້ແກ່ ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ ໃນໂອກາດສຳເລັດການສະເດັດຢ້ຽມຢາມ ສປປ ລາວ ຢ່າງເປັນທາງການ ໃນເດືອນພະຈິກ 2025 ຜ່ານມາ, ຊຶ່ງເປັນເຫດການທີ່ມີຄວາມໝາຍສຳຄັນຢ່າງຍິ່ງທາງປະຫວັດສາດໃນໂອກາດສະເຫຼີມສະຫຼອງການສ້າງຕັ້ງສາຍພົວພັນການທູດ ລາວ-ຍີ່ປຸ່ນ ຄົບຮອບ 70 ປີ ແລະ ຄົບຮອບ 60 ປີ ຂອງການສົ່ງອາສາສະໝັກຍີ່ປຸ່ນໄປປະຕິບັດໜ້າທີ່ຢູ່ ສປປ ລາວ. ໃນພິທີ, ທ່ານທູດ ອຳໄພ ກິນດາວົງ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວບັນດາເຜົ່າ ກ່າວສະແດງຄວາມຂອບໃຈຢ່າງຈິງໃຈຕໍ່ການສະເດັດຢ້ຽມຢາມຂອງພະອົງ, ຊຶ່ງບໍ່ພຽງແຕ່ເປັນການນຳເອົາໄມຕີຈິດມິດຕະພາບອັນອົບອຸ່ນມາສູ່ປະຊາຊົນລາວເທົ່ານັ້ນ, ແຕ່ຍັງເປັນການຮັດແໜ້ນສາຍພົວພັນຄູ່ຮ່ວມຍຸດທະສາດຮອບດ້ານ ແລະ ສົ່ງເສີມການແລກປ່ຽນວັດທະນະທຳລະຫວ່າງສອງຊາດໃຫ້ແໜ້ນແຟ້ນຍິ່ງຂຶ້ນ. ພ້ອມດຽວກັນນີ້, ທ່ານທູດຍັງໄດ້ຖືໂອກາດອັນເປັນສິຣິມຸງຄຸນນີ້ກ່າວອວຍພອນໄຊອັນປະເສີດແດ່ ສົມເດັດ ເຈົ້າຍິງ ໄອໂກະ ເນື່ອງໃນໂອກາດປີໃໝ່ 2026 ໃຫ້ມີພະລານາໄມສົມບູນ ແລະ ປະສົບຄວາມສິຣິມຸງຄຸນຕະຫຼອດໄປ.
ໃນໂອກາດອັນສະ ຫງ່າລາສີນີ້, ສົມເດັດ ເຈົ້າຍິງ ໄອໂກະ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສົມກຽດຈາກລັດຖະບານ ແລະ ປະຊາຊົນລາວ ໃນໄລຍະສະເດັດຢ້ຽມຢາມລາວ ແລະ ກ່າວວ່າການສະເດັດຢ້ຽມຢາມລາວໃນຄັ້ງນີ້ແມ່ນເຕັມໄປດ້ວຍຄວາມຊົງຈຳອັນດີງາມ ແລະ ຄວາມປະທັບໃຈຢ່າງຍິ່ງ ພ້ອມທັງມີຄວາມປິຕິຊົມຊື່ນທີ່ການສະເດັດຢ້ຽມຢາມ ສປປ ລາວ ໄດ້ເປັນການປະກອບສ່ວນໃນການພັດທະນາ ແລະ ຮັດແໜ້ນການແລກປ່ຽນລະຫວ່າງສອງປະເທດໃຫ້ມີຄວາມເລິກເຊິ່ງ ແລະ ແໜ້ນແຟ້ນຍິ່ງໆຂຶ້ນກວ່າເກົ່າ. ງານດັ່ງກ່າວໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະ ຮັດແໜ້ນການພົວພັນຮ່ວມມື ລະຫວ່າງ ລາວ – ຍີ່ປຸ່ນ ທີ່ພວມເບັ່ງບານ ແລະ ແຕກດອກອອກຜົນຢ່າງງົດງາມ.
ແຫຼ່ງຂໍ້ມູນ: The Embassy of the Lao PDR to Japan