ສຳນັກຂ່າວ CIA ປະເທດໄທລາຍງານໃນວັນທີ 26 ມັງກອນ 2026 ຜ່ານມາ, ເຈົ້າໜ້າທີ່ຕຳຫຼວດ ຈັງຫວັດລົບບູລີ, ປະເທດໄທ. ຮ່ວມກັບຄະນະສະເພາະກິດຕ້ານຢາເສບຕິດ ອອກຖະແຫຼງການຈັບກຸມເຄືອຂ່າຍຢາເສບຕິດຂ້າມຊາດ ພ້ອມຂອງການຢາບ້າລວມກັນເກືອບ 2.5 ລ້ານເມັດ ໂດຍມີຜູ້ຕ້ອງຫາຊື່ວ່າ: ທ້າວ ໄຊ ເປັນປະຊາຊົນແຂວງສະຫວັນນະເຂດ, ປະເທດລາວ, ເຊິ່ງມີໜ້າທີ່ເປັນຜູ້ສັ່ງການ ແລະ ຄວບຄຸມເຄືອຂ່າຍລຳລຽງຢາເສບຕິດຈາກປະເທດເພື່ອນບ້ານເຂົ້າມາໃນພື້ນທີ່ປະເທດໄທ.
ເຈົ້າໜ້າທີ່ເປີດເຜີຍວ່າ: ໄດ້ລົງຕິດຕາມພຶດຕິກຳຂອງກຸ່ມດັ່ງກ່າວຢ່າງຕໍ່ເນື່ອງ ຈົນສາມາດກັກໂຕ ທ້າວ ລັດຕະນະໄຊ ອາຍຸ 33 ປີ, ຂະນະຂັບລົດກະບະສີຂາວ ພ້ອມຜູ້ຮ່ວມຂະບວນການ ກໍຄື ທ້າວ ລິດ ອາຍຸ 25 ປີ, ກຳລັງລຳລຽງຢາເສບຕິດເຂົ້າສູ່ພາກກາງ ແລະ ເຮັດໜ້າທີ່ຂັບລົດສຳຫຼວດເສັ້ນທາງ ໂດຍຖືກຈັບກຸມໄດ້ຢູ່ບໍລິເວນ ອຳເພີໂຄກຈະເລີນ, ຈັງຫວັດລົບບູລີ, ປະເທດໄທ. ໂດຍມີຂອງກາງຢາບ້າຈຳນວນ 6 ເປົາ ຈຳນວນ 2,500,000 ເມັດ.
ເຊິ່ງຢາເສບຕິດຈຳນວນນີ້ເປັນສ່ວນໜຶ່ງຂອງເຄືອຂ່າຍດຽວກັນກັບຄະດີໃຫຍ່ໃນພື້ນທີ່ຈັງຫວັດລົບບູລີ ທີ່ເຄີຍກວດຍຶດໄດ້ກ່ອນໜ້ານີ້ລວມເປັນ 10,000,000 ເມັດ.
ເຈົ້າໜ້າທີ່ໄດ້ລະບຸຕື່ມອີກວ່າ: ເຄືອຂ່າຍດັ່ງກ່າວມີລັກສະນະເປັນຂະບວນການຄ້າ-ຂາຍຢາເສບຕິດ ໂດຍໃຊ້ພື້ນທີ່ແຂວງສະຫວັນນະເຂດ ເປັນຈຸດລວບລວມ ແລະ ພັກຢາ ກ່ອນຈະລຳລຽງຂ້າມແນວຊາຍແດນເຂົ້າສູ່ພາກກາງຂອງປະເທດໄທ.
ຫຼັງຈາກນັ້ນເຈົ້າໜ້າທີ່ຈຶ່ງນຳຕົວຜູ້ຖືກຫາພ້ອມຂອງກາງ ໄປສືບສວນ-ສອບ ສວນ ເພື່ອຂະຫຍາຍຜົນຫາຜູ້ຮ່ວມຂະບວນການ ມາດຳເນີນຕາມກົດໝາຍຕໍ່ໄປ.
ແຫຼ່ງຂໍ້ມູນ: สำนักข่าว CIA ประเทศไทย, สำนักงานประชาสัมพันธ์จังหวัดลพบุรี