ອາທິດທີ່ຜ່ານມາ, ໃນລະຫວ່າງການປະຕິບັດງານເກັບກູ້ລະເບີດບໍ່ທັນແຕກ (UXO) ຂອງພຣະນັກງານພາກສະໜາມອົງການ MAG ຢູ່ທີ່ບ້ານສ້າງປຸ່ງບອນ ເມືອງຍົມມະລາດ ແຂວງຄຳມ່ວນ, ທີມງານໄດ້ພົບເຫັນ ‘ພຣະພຸດທະຮູບ’ ທີ່ຖືກຝັງຢູ່ໃຕ້ດິນໃນພື້ນທີ່ໄຮ່ນາ!
ພຣະພຸດທະຮູບອົງນີ້ມີຂະໜາດປະມານ 5×9 ຊັງຕີແມັດ ແລະ ຖືກພົບເຫັນຫ່າງຈາກວັດໃນພື້ນທີ່ປະມານ 100 ແມັດ. ຫຼັງຈາກທີມງານນຳເອົາພຣະພຸດທະຮູບອົງດັ່ງກ່າວຂຶ້ນມາໄດ້ຢ່າງປອດໄພ ແມ່ນໄດ້ເອົາໄປເກັບໄວ້ທີ່ວັດເພື່ອຮັບການດູແລຮັກສາຢ່າງເໝາະສົມ.
ຊາວບ້ານໃນລະແວກນັ້ນມີຄວາມຕື່ນເຕັ້ນດີໃຈຫຼາຍ ແລະພຣະສົງໃນພື້ນທີ່ກໍໄດ້ມາເຮັດພິທີອັນເຊີນພຣະພຸດທະຮູບ ແລະ ສວດມົນອວຍພອນໃຫ້ກັບສະຖານທີ່ທີ່ພົບເຫັນ. ການພົບເຫັນທີ່ເກີດຂຶ້ນໄດ້ຍາກນີ້ສະແດງໃຫ້ເຫັນວ່າການກວດກາຢ່າງລະອຽດຮອບຄອບໃນການຄົ້ນຫາວັດຖຸລະເບີດ ແມ່ນມີຄວາມສຳຄັນ, ວັດຖຸຕ້ອງສົງໄສທຸກຊະນິດແມ່ນຈະຖືກກວດສອບໃຫ້ແນ່ໃຈແລະບໍ່ຖືກເບິ່ງຂ້າມ.
ການພົບເຫັນສິ່ງທີ່ເປັນສິລິມຸງຄຸນຄັ້ງນີ້ ຈະນຳມາເຊິ່ງຄວາມປອດໄພ, ຄວາມສະຫງົບສຸກ ແລະ ຄວາມຈະເລີນຮຸ່ງເຮືອງໃຫ້ແກ່ຊາວບ້ານ ແລະ ຜູ້ທີ່ໄດ້ຕິດຕາມວຽກງານຂອງພວກເຮົາທຸກຄົນ.
ພາບ: MAG UXO Visitor Information Centres, Lao PDR