ອີງຕາມແຈ້ງການຂອງຫ້ອງວ່າການເມືອງເມືອງທ່າແຂກ, ແຂວງຄໍາມ່ວນ ເລກທີ 03/ຫວມ ທ່າແຂກ, ລົງວັນທີ 13 ມັງກອນ 2026
ຮຽນ: ບັນດາພໍ່ແມ່ປະຊາຊົນ, ພະນັກງານ, ທະຫານ, ຕໍາຫຼວດ, ພໍ່ຄ້າຊາວຂາຍ, ນັກທຸລະກິດ ແລະ ຜູ້ປະກອບການຂົນສົ່ງຕ່າງໆ ທົ່ວເມືອງທ່າແຂກ ແຂວງຄໍາມ່ວນ.
ເລື່ອງ: ການປິດ ການສັນຈອນຊົ່ວຄາວ ຜ່ານເສັ້ນທາງຫຼວງແຫ່ງຊາດ ເລກ 11 ຊ່ວງ, ແຕ່ສີ່ແຍກ ບ້ານເລົ່າໂພໄຊ ຫາ ແຍກທາງເຂົ້າທາດເມືອງເກົ່າ ເບື້ອງທິດໃຕ້ (ໂດຍສະເພາະ ລົດໂດຍສານ ແລະ ລົດຂົນສົ່ງ ສິນຄ້າ ທີ່ມີນໍ້າໜັກລວມ 12 ໂຕນ ຂຶ້ນໄປ ຫ້າມຜ່ານເດັດຂາດ).
ຫ້ອງວ່າການເມືອງທ່າແຂກ ຂໍຖືເປັນກຽດແຈ້ງການມາຍັງທ່ານ ເພື່ອຊາບວ່າ:
- ກ່ຽວກັບການ ປິດການສັນຈອນ ຜ່ານເສັ້ນທາງຫຼວງແຫ່ງຊາດ ເລກ 11 ຊ່ວງແຕ່ສີ່ແຍກບ້ານເລົ່າໂພໄຊ ຫາ ສາມແຍກທາງເຂົ້າທາດເມືອງເກົ່າ ເບື້ອງທິດໃຕ້, ເຊິ່ງປະຈຸບັນໂຄງການກໍ່ສ້າງທາງປູເບຕົງດັ່ງກ່າວ ແມ່ນກໍາລັງສຸມໃສ່ວຽກກໍ່ສ້າງໜ້າທາງປູເບຕົງ ເພື່ອໃຫ້ສາມາດດໍາເນີນການຈັດຕັ້ງປະຕິບັດວຽກໄປຕາມແຜນ, ສໍາເລັດຕາມ ການນໍານົດເວລາກົດໝາຍເຕັກນິກທີ່ກໍານົດໄວ້, ຈຶ່ງບໍ່ສາມາດອະນຸຍາດໃຫ້ລົດໂດຍສານ ແລະ ລົດຂົນສົ່ງສິນຄ້າ ທີ່ ມີນໍ້າໜັກລວມ 12 ໂຕນ ຂຶ້ນໄປ ແລ່ນຜ່ານ, ເລີ່ມແຕ່ວັນທີ 13 ມັງກອນ 2026 ຫາ 03 ກຸມພາ 2026 ຢ່າງເດັດຂາດ ແລະ ພາຍຫຼັງອາຍຸໜ້າທາງປູເບຕົງ ໄດ້ 28 ວັນຂຶ້ນໄປ, ຈຶ່ງອະນຸຍາດໃຫ້ລົດແລ່ນຜ່ານໄດ້.
- ເພື່ອຮັບປະກັນດ້ານຄວາມປອດໄພ ແລະ ຫຼີກລ້ຽງຄວາມສ່ຽງໃນການເກີດອຸບັດຕິເຫດ ຕໍ່ຜູ້ສັນຈອນຜ່ານ ເຂດການກໍ່ສ້າງນັ້ນ, ຈຶ່ງແຈ້ງກໍານົດການນໍາໃຊ້ເສັ້ນທາງ ເວັ້ນ ເບື້ອງທິດໃຕ້ ໂຄງການ ແມ່ນໃຫ້ໄປນໍາໃຊ້ເສັ້ນທາງ ເຂົ້າ-ອອກ ແຕ່ທາງຫຼວງແຫ່ງຊາດ ເລກ 11 ທາງແຍກບ້ານມ່ວງສຸມ ຫາ ທາງແຍກທາງຫຼວງແຫ່ງຊາດເລກ 13 ໃຕ້ ບ້ານນາບວບ ແລະ ເບື້ອງເຫນືອຂອງໂຄງການ ແມ່ນໃຫ້ນໍາໃຊ້ເສັ້ນທາງ 5805 ແຕ່ແຍກທາງບ້ານປາກດົງ ຫາ ແຍກ ທາງບ້ານຈອມແຈ້ງ ເຊື່ອມຕໍ່ບ້ານເກົ້າລ້ຽວ ຫາ ທາດເມືອງເກົ່າ.
- ຫ້າມບໍ່ໃຫ້ ລົດໂດຍສານ ແລະ ລົດຂົນສົ່ງສິນຄ້າ ທີ່ມີນໍ້າໜັກລວມ 12 ໂຕນ ຂຶ້ນໄປ ແລ່ນເຂົ້າໄປພາຍ ໃນບໍລິເວນເດີນພຣະທາດເມືອງເກົ່າ ຢ່າງເດັດຂາດ.
- ມອບໃຫ້ການຈັດຕັ້ງບ້ານ, ພໍ່ແມ່ປະຊາຊົນ, ຜູ້ປະກອບການຫົວຫນ່ວຍທຸກລະກິດ, ບໍລິສັດຫ້າງຮ້ານ ແລະ ພາກສ່ວນກ່ຽວຂ້ອງ, ຈົ່ງຮັບຮູ້ ແລະ ປະຕິບັດຕາມແຈ້ງການສະບັບນີ້ດ້ວຍ.
ດັ່ງນັ້ນ, ຈຶ່ງແຈ້ງການມາຍັງທຸກພາກສ່ວນ ເພື່ອຊາບ ແລະ ໃຫ້ຄວາມຮ່ວມມືດ້ວຍ.