ພາຍຫຼັງທີ່ເມືອງປາກຊ່ອງ ແຂວງຈໍາປາສັກ ເກີດສະພາບອາກາດໜາວເຢັນ ແລະ ເກີດນໍ້າໝອກເກືອ (ນໍ້າໝອກກ້າມ), ເຮັດໃຫ້ຕົ້ນກາເຟຂອງຊາວສວນ ໄດ້ຮັບຜົນກະທົບເປັນຈໍານວນຫຼາຍ. ຍ້ອນແນວນັ້ນ, ພະແນກກະສິກຳ ແລະ ສິ່ງແວດລ້ອມແຂວງຈໍາປາສັກ ຈິ່ງໄດ້ເຄື່ອນໄຫວແນະນໍາ ຊາວສວນໃນການປ້ອງກັນເກີດນ້ຳໝອກ (Prevention)
ການຄຸມດິນ (Mulching) ໂດຍນໍາພາປະຕິບັດຕົວຈິງ ໂດຍໃຊ້ເຟືອງ, ຫຍ້າແຫ້ງ ຫຼື ເປືອກກາເຟ ມາປົກຄຸມບໍລິເວນໂຄນຕົ້ນ ເພື່ອຮັກສາຄວາມອົບອຸ່ນ ແລະ ຄວາມຊຸ່ມຊື່ນໃນດິນ. ສຳລັບເບ້ຍກາເຟນ້ອຍ, ກໍແນະນໍາໃຫ້ຊາວສວນ ຫາຜ້າສະແລນ ຫຼື ວັດຖຸມາເຮັດຫຼັງຄາມຸງ ເພື່ອປ້ອງກັນນ້ຳໝອກຕົກໃສ່ໂດຍກົງ. ແນະນໍາໃຫ້ຊາວສວນ ສີດນ້ຳໃສ່ໃບກາເຟ ທັນທີໃນຕອນເຊົ້າ ກ່ອນທີ່ແສງແດດຈະສ່ອງຖືກໃບ, ການໃຊ້ນ້ຳລ້າງເກັດນ້ຳກ້ອນອອກຈະຊ່ວຍຫຼຸດຜ່ອນອາການໃບໄໝ້ຮຸນແຮງ ຈາກການທີ່ແສງແດດເຜົາຜ່ານເກັດນ້ຳກ້ອນ ແລະ ຊ່ວຍລະລາຍນ້ຳໝອກຢ່າງຊ້າໆ.
ນອກນີ້, ຍັງໄດ້ແນະນໍາ ແລະ ນໍາພາຊາວສວນ ສ້າງຄວັນໄຟ ເພື່ອສ້າງຄວາມອົບອຸ່ນ, ເພີ່ມອຸນຫະພູມບໍລິເວນສວນ ແລະ ຫົ່ມຄວັນ ປົກຄຸມສວນກາເຟ ຊ່ວຍກັກເກັບຄວາມຮ້ອນຈາກໜ້າດິນ ບໍ່ໃຫ້ລະເຫີຍຂຶ້ນໄວເກີນໄປ ແລະ ປ້ອງກັນບໍ່ໃຫ້ອຸນຫະພູມຫຼຸດລົງຕໍ່າຈົນຮອດຈຸດແຂງຕົວ. ວັດຖຸທີ່ໃຊ້ (ເນັ້ນວັດຖຸທີ່ໃຫ້ຄວັນຫຼາຍ ແຕ່ໄຟບໍ່ແຮງ) ມີ ແກບເຂົ້າ ຫຼື ແກບກາເຟ ເປັນວັດຖຸທີ່ດີທີ່ສຸດ ເພາະໄໝ້ຊ້າ ແລະ ໃຫ້ຄວັນຫຼາຍ ຖ້າບໍ່ມີ ໃຫ້ໃຊ້ເຟືອງ ຫຼື ຫຍ້າແຫ້ງ ປະສົມກັບຫຍ້າສົດ (ຫຍ້າປຽກ) ຈະຊ່ວຍໃຫ້ເກີດຄວັນສີຂາວໜາແໜ້ນ ແທນໄດ້ເຊັ່ນກັນ. ຕຳແໜ່ງ ໃຫ້ຈຸດກອງໄຟຢູ່ທາງ ທິດເໜືອລົມ (ຕົ້ນລົມ) ຂອງສວນ ເພື່ອໃຫ້ລົມພັດຄວັນໄຟລອຍເຂົ້າໄປ ປົກຄຸມທົ່ວສວນກາເຟ. ໄລຍະຫ່າງ, ຄວນຈຸດເປັນກອງນ້ອຍໆ ຫຼາຍໆຈຸດ ຫ່າງກັນປະມານ 10 – 20 ແມັດ (ບໍ່ຄວນຈຸດກອງໃຫຍ່ກອງດຽວ). ເລີ່ມຈຸດໃນໄລຍະທີ່ອາກາດເຢັນທີ່ສຸດ ຄືປະມານ 3 ໂມງ – 6 ໂມງເຊົ້າ ຈົນກວ່າຕາເວັນຈະຂຶ້ນ. ເມື່ອຈູດໄຟແລ້ວ ກໍເອົາໃຈໃສ່ຕ້ອງເຝົ້າລະວັງບໍ່ໃຫ້ເກີດແປວໄຟລຸກລາມໄປໄໝ້ຕົ້ນກາເຟ ຫຼື ເສດໃບໄມ້ແຫ້ງໃນສວນ.
ຈາກນັ້ນ, ກໍໄດ້ແນະນໍາການຟື້ນຟູຕົ້ນກາເຟ ຫຼັງຖືກນ້ຳໝອກທຳລາຍ (Recovery)
ຫາກຕົ້ນກາເຟຖືກນ້ຳໝອກ ຢ່າຟ້າວຕັດງ່າທັນທີ: ໃຫ້ລໍຖ້າຈົນກວ່າອາກາດຈະກັບມາອຸ່ນ ຫຼື ໝົດໄລຍະໜາວ, ການຕັດແຕ່ງໄວເກີນໄປ ອາດເຮັດໃຫ້ແຜທີ່ຕັດຖືກຄວາມເຢັນທຳລາຍຊ້ຳ ແລະ ລາມເຂົ້າລຳຕົ້ນ. ສັງເກດ ແລະ ຕັດແຕ່ງຕົ້ນກາເຟທີ່ເສຍຫາຍເລັກນ້ອຍ (ໃບໄໝ້ບາງສ່ວນ), ປ່ອຍໃຫ້ໃບຫຼົ່ນເອງ ບໍ່ຈຳເປັນຕ້ອງຕັດ. ຕົ້ນກາເຟທີ່ເສຍຫາຍປານກາງ (ປາຍຍອດຕາຍ) ໃຫ້ຕັດສ່ວນທີ່ຕາຍອອກ ໂດຍຕັດລົງມາຫາສ່ວນທີ່ຍັງຂຽວປະມານ 2-3 ຊັງຕີແມັດ. ຕົ້ນກາເຟທີ່ເສຍຫາຍໜັກ (ຕາຍຮອດຕົ້ນ): ອາດຈຳເປັນຕ້ອງຕັດເຮັດສາວ (ຕັດແຕ່ງ) ເພື່ອໃຫ້ຕົ້ນກາເຟແຕກຍອດໃໝ່. ບຳລຸງຕົ້ນ, ຫຼັງຈາກຕັດແຕ່ງແລ້ວ ໃຫ້ໃສ່ຝຸ່ນຄອກ ຫຼື ຝຸ່ນທີ່ມີທາດໄນໂຕຣເຈນ ເປັນຫຼັກ ເພື່ອເລັ່ງການແຕກໃບໃໝ່ ແລະ ຫົດນ້ຳໃຫ້ພຽງພໍ (ສໍາລັບສວນທີ່ມີເງື່ອນໄຂໃກ້ແຫຼ່ງນໍ້າ) ປ້ອງກັນພະຍາດ, ສີດພົ່ນຢາກັນເຊື້ອລາ (Fungicide) ປະເພດທອງແດງ (Copper) ຕາມຮອຍແຜ ແລະ ໃບທີ່ເສຍຫາຍ ເພື່ອປ້ອງກັນພະຍາດແຊກຊ້ອນ.
ຂໍ້ມູນ: ໜັງສືພິມຈຳປາໃໝ່