ອີງຕາມໜັງສືແຈ້ງການຂອງເຈົ້ານະຄອນ ຫຼວງພະບາງ ເລກທີ 004 ຈນ.ຫຼບ ລົງວັນທີ 9 ມັງກອນ 2026
ບໍລິສັດນຳທ່ຽວ, ສະມາຄົມລົດຕູ້ນຳທ່ຽວ, ສະມາຄົມເຮືອນຳທ່ຽວ, ຜູ້ປະກອບການດ້ານການທ່ອງທ່ຽວ,ລວມທັງພະນັກງານນຳທ່ຽວ (ໄກ້ນຳທ່ຽວ) ພາຍໃນນະຄອນ ຫຼວງພະບາງ. ເລື່ອງ: ການຄຸ້ມຄອງຄວາມສະອາດພາຍໃນ ນະຄອນ ຫຼວງພະບາງ
ຂໍຖືເປັນກຽດແຈ້ງການມາຍັງບັນດາບໍລິສັດນຳທ່ຽວ, ສະມາຄົມລົດຕູ້ນຳທ່ຽວ, ສະມາຄົມ ເຮືອນຳທ່ຽວ, ຜູ້ປະກອບການດ້ານການທ່ອງທ່ຽວ, ລວມທັງພະນັກງານນຳທ່ຽວ (ໄກ້ນຳທ່ຽວ) ພາຍໃນນະຄອນ ຫຼວງພະບາງ ໃຫ້ທຸກພາກສ່ວນເປັນເຈົ້າການ ໃນການຮັກສາຄວາມສະອາດ ແລະ ຄວາມເປັນລະບຽບຮຽບຮ້ອຍລາຍລະອຽດ ດັ່ງນີ້:
- ຫ້າມຖິ້ມຂີ້ເຫຍື້ອຊະຊາຍເປັນຕົ້ນ: ຖິ້ມສິ່ງເສດເຫຼືອຕ່າງໆ ຕາມສະຖານທີ່ສາທາລະນະ, ຖີ້ມສິ່ງເສດເຫຼືອອອກຈາກລົດ-ເຮືອ ລົງສູ່ແມ່ນໍ້າ, ຮ່ອງນໍ້າ ແລະ ສະຖານທີ່ຕ່າງໆ ພາຍໃນເທດສະບານ ນະຄອນ ຫຼວງພະບາງ.
-ຖ້າຫາກມີການລະເມີດຄັ້ງທີ 1 ຈະຖືກສຶກສາອົບຮົມ, ເຮັດບົດບັນທຶກ, ປັບໃໝ 300,000 ກີບ, ພ້ອມທັງອານາໄມຄືນ ແລະ ໄຊ້ແທນຄ່າສິ້ນເປືອງຕ່າງໆ ຂອງເຈົ້າໜ້າທີ່ຮັບຜິດຊອບ
-ຖ້າຫາກມີການລະເມີດຄັ້ງທີ 2 ຈະຖືກປັບໃໝ 1,000,000 ກີບ ພ້ອມທັງອານາໄມຄືນ ແລະ ໄຊ້ແທນຄ່າສິ້ນເປືອງຕ່າງໆ ຂອງເຈົ້າໜ້າທີ່ຮັບຜິດຊອບ
-ຖ້າຫາກກະທໍາຜິດຊໍ້າໂດຍເຈດຕະນາ ຫຼື ບໍ່ເຈດຕະນາ ເປັນຄັ້ງທີ່ 3 ຈະຖືກປັບໃໝ 5 ຫຼື 10 ເທົ່າຂອງຄັ້ງທີ 2 ພ້ອມທັງອານາໄມຄືນ ແລະ ໄຊ້ແທນຄ່າສີ້ນເປືອງຕ່າງໆ ຂອງເຈົ້າໜ້າທີ່ຮັບຜິດຊອບ ແລະ ແຈ້ງການກະທໍາຜິດຂອງຜູ້ລະເມີດຕໍ່ກົງສູນ ຫຼື ກົມກອງຜູ້ກ່ຽວ ແລະ ມອບໃຫ້ເຈົ້າໜ້າທີ່ດຳເນີນຕາມລະບຽບກົດໝາຍ
- ຖ້າການກະທໍາຜິດຂອງບຸກຄົນ, ນັກທ່ອງທ່ຽວ, ລູກທົວ ທີ່ຂຶ້ນກັບການຄຸ້ມຄອງຂອງບໍລິສັດນຳທ່ຽວ, ລົດຕູ້ນຳທ່ຽວ, ເຮືອນຳທ່ຽວ, ຜູ້ປະກອບການດ້ານທ່ອງທ່ຽວ ແລະ ພະນັກງານນຳທ່ຽວ (ໄກ້ນຳທ່ຽວ) ຜູ້ໃດພາກສ່ວນດັ່ງກ່າວກໍ່ຈະຖືກປະຕິບັດຕາມລະບຽບການ ແລະ ກົດໝາຍຢ່າງເຂັ້ມງວດ;ກໍລະນີມີການລະເມີດທີ່ຮ້າຍແຮງ ຫຼື ສ້າງຄວາມເສຍຫາຍຫຼາຍແມ່ນຈະຖືກໂຈະ ຫຼື ຖອນໃບດຳເນີນທຸລະກິດຕາມລະບຽບການ.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຕາມເນື້ອໃນໜັງສືແຈ້ງການ ສະບັບນີ້ຢ່າງເຂັ້ມງວດ.
ແຫຼ່ງຂໍ້ມູນ: ໂທລະພາບ ແຂວງຫຼວງພະບາງ