ໃນຕອນເຊົ້າຂອງ ວັນທີ 7 ມັງກອນ 2026, ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກ ຮາຊິມິດ ຊອກດານີ ໄດ້ລົງນາມຖະແຫຼງການຮ່ວມ ວ່າດ້ວຍ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກ ຮາຊິມິດ ຊອກດານີ, ທີ່ ນິວຢອກ, ສະຫະລັດອາເມລິກາ.

ການລົງນາມຖະແຫຼງການຮ່ວມໃນຄັ້ງນີ້ ຕາງໜ້າໃຫ້ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແມ່ນ ທ່ານ ທອງຜ່ານ ສະຫວັນເພັດ, ເອກອັກຄະລັດຖະທູດວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອົງການ ສປຊ, ແລະ ຕາງໜ້າໃຫ້ລັດຖະບານ ແຫ່ງຣາຊະອານາຈັກ ຣາຊິມິດ ຊອກດານີ ແມ່ນ ທ່ານ ວາລີດ ຄາລີດ ໂອເບດັດ (H.E. Mr. Walid Khalid Obeidat), ເອກອັກຄະລັດຖະທູດວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ຣາຊະອານາຈັກ ຮາຊິມິດ ຊອກດານີ ປະຈໍາອົງການ ສປຊ ໂດຍມີການເຂົ້າຮ່ວມເປັນສັກຂີພິຍານໂດຍບັນດານັກການທູດທັງສອງຝ່າຍ.

ການລົງນາມໃນຄັ້ງນີ້ ເປັນຂີດໝາຍສຳຄັນໃນການເສີມຂະຫຍາຍການພົວພັນສອງຝ່າຍ ເຊິ່ງທັງສອງປະເທດໄດ້ໃຫ້ຄໍາໝາຍໝັ້ນຮ່ວມກັນໃນການຮັດແໜ້ນການຮ່ວມມືກັນ. ການລົງນາມຖະແຫຼງການສ້າງຕັ້ງສາຍພົວພັນການທູດຮ່ວມກັບ ຣາຊະອານາຈັກ ຮາຊິມິດ ຊອກດານີ ເຮັດໃຫ້ ສປປ ລາວ ມີສາຍພົວພັນການທູດກັບຕ່າງປະເທດ ເພີ່ມຂຶ້ນເປັນ 152 ປະເທດ ໃນທົ່ວໂລກ.

ແຫຼ່ງຂໍ້ມູນ: Permanent Mission of the Lao PDR to the United Nations