ສຳນັກຂ່າວປະເທດຫວຽດນາມລາຍງານ ເມື່ອບໍ່ດົນມານີ້ທີ່ແຂວງກວາງຕີ(Quang Tri), ປະເທດຫວຽດນາມ ເຈົ້າໜ້າທີ່ ຫວຽດນາມ ໄດ້ໃຫ້ການຊ່ວຍເຫຼືອນັກທ່ອງທ່ຽວທີ່ເປັນຄົນລາວທີ່ເຮັດກະເປົາຕົກເຮ່ຍ ເຊິ່ງມີຊັບສິນມູນຄ່າປະມານ 86 ລ້ານດົງ ຫຼື ປະມານ 71 ລ້ານກີບ ພ້ອມທັງເອກະສານສ່ວນຕົວ ໂດຍສາມາດໄດ້ຊອກເຫັນ ແລະ ສົ່ງຄືນ ພາຍໃນ 1 ຊົ່ວໂມງ.
ນັກທ່ອງທ່ຽວຄົນດັ່ງກ່າວ ມີຊື່ວ່າ: ທ້າວ ບຸນນະ ພັນທະວິໄລ ອາຍຸ 39 ປີ ສັນຊາດລາວ ເຊິ່ງໄດ້ເລົ່າເຫດການວ່າ ຕົນໄດ້ເຮັດເງິນ ແລະ ເອກະສານສຳຄັນເຮ່ຍ ໃນລະຫວ່າງການເດີນທາງທ່ອງທ່ຽວປະເທດຫວຽດນາມໃນໄລຍະ ວັນທີ 1-4 ມັງກອນ 2026 ທີ່ຜ່ານມາ.
ເຫດການເກີດຂຶ້ນ ໃນວັນທີ 02 ມັງກອນ 2026 ເວລາປະມານ 18:00 ໂມງ ພາຍຫຼັງທີ່ຮູ້ວ່າຕົນເອງເຮັດກະເປົາເຮ່ຍ ຈຶ່ງໄດ້ເຂົ້າໄປແຈ້ງຄວາມຕໍ່ເຈົ້າໜ້າທີ່ ແລະ ດ້ວຍການຕອບສະໜອງຢ່າງວ່ອງໄວ ຂອງເຈົ້າໜ້າທີ່ຕຳຫຼວດ ເຮັດໃຫ້ສາມາດຊອກຫາ ແລະ ເກັບຄືນເງິນສົດ, ຂອງໃຊ້ສ່ວນຕົວ ແລະ ເອກະສານທັງໝົດ ພາຍໃນກະເປົາ ໄດ້ຄືນພາຍໃນເວລາປະມານ 19:00 ຂອງວັນທີ 02 ມັງກອນ 2026 ພາຍໃນເວລາ 1 ຊົ່ວໂມງ
ເຫດການນີ້ສະແດງໃຫ້ເຫັນເຖິງປະສິດທິພາບຂອງຕຳຫຼວດຫວຽດນາມ ແລະຄວາມມີນ້ຳໃຈໄມຕີ ຕໍ່ນັກທ່ອງທ່ຽວຕ່າງຊາດ ເຊິ່ງເປັນການສ້າງພາບພົດທີ່ດີໃຫ້ແກ່ອຸດສາຫະກຳທ່ອງທ່ຽວຂອງຫວຽດນາມ ໂດຍສະເພາະແມ່ນຕໍ່ນັກທ່ອງທ່ຽວຈາກປະເທດເພື່ອນບ້ານຄືລາວ.
ແຫຼ່ງຂໍ້ມູນ: Tuoitre Vietnam, Lao youth