ປະກາດໃນວັນທີ 17 ກັນຍາ ຜ່ານມາວ່າ, ທ່ານ ຮຸນ ມາເນດ ນາຍົກລັດຖະມົນຕີ ກຳປູເຈຍ ໄດ້ກຳນົດຄ່າແຮງງານຂັ້ນຕ່ຳຕໍ່ເດືອນໃໝ່ໃຫ້ແກ່ອຸດສາຫະກຳຕັດຫຍິບ, ເກີບ ແລະ ສິນຄ້າສຳລັບການເດີນທາງ ເປັນ 210 ໂດລາ, ເລີ່ມແຕ່ວັນທີ 1 ມັງກອນ 2026.
ທ່ານ ຮຸນ ມາເນດ ໄດ້ຂຽນລົງໃນສື່ສັງຄົມອອນລາຍວ່າ: ຊົມເຊີຍ ຄ່າແຮງງານຂັ້ນຕ່ຳປະຈຳປີ 2026 ໄດ້ເພີ່ມຂຶ້ນຈາກ 208 ໂດລາ ເປັນ 210 ໂດລາ ໃຫ້ແກ່ຄົນງານໃນຂະແໜງຕໍ່າແຜ່ນ, ເຄື່ອງນຸ່ງຫົ່ມ, ເກີບ, ສິນຄ້າສຳລັບການເດີນທາງ ແລະ ກະເປົາ.
ນອກເໜືອຈາກການເພີ່ມຄ່າແຮງງານຂັ້ນຕ່ຳຕໍ່ເດືອນແລ້ວ, ແຮງງານໃນກຳປູເຈຍຍັງຈະໄດ້ຮັບສະຫວັດດີການປະຈໍາເດືອນຕື່ມອີກເຊັ່ນ: ເງິນໂບນັດ 10 ໂດລາຕໍ່ເດືອນ, ສຳລັບການມາເຮັດວຽກເປັນປົກກະຕິ, ເງິນຊ່ວຍເຫຼືອຄ່າເດີນທາງ ແລະ ຄ່າເຊົ່າບ່ອນຢູ່ອາໄສ 7 ໂດລາຕໍ່ເດືອນ ແລະ ເງິນອຸດໜູນຕາມອາຍຸການ 2-11 ໂດລາຕໍ່ເດືອນ.
ກະຊວງແຮງງານ ແລະ ການຝຶກອົບຮົມວິຊາຊີບຂອງກຳປູເຈຍ ລະບຸວ່າ: ອຸດສາຫະກຳຕັດຫຍິບ, ເກີບ, ສິນຄ້າສຳລັບການເດີນທາງ ມີໂຮງງານທັງໝົດ 1,500 ກວ່າແຫ່ງ ແລະ ມີກຳມະກອນປະມານ 900,000 ຄົນ, ຖືເປັນແຫຼ່ງລາຍຮັບເງິນຕາຕ່າງປະເທດໃຫຍ່ທີ່ສຸດຂອງປະເທດ.
ກົມພາສີ ແລະ ອາກອນຂອງກຳປູເຈຍໃຫ້ຮູ້ວ່າ: ກຳປູເຈຍສົ່ງອອກສິນຄ້າໃນຂະແໜງນີ້ ມູນຄ່າ 7.62 ຕື້ໂດລາ, ແຕ່ເດືອນມັງກອນ ຫາ ເດືອນມິຖຸນາປີ 2025, ເພີ່ມຂຶ້ນ 22% ຈາກ 6.24 ຕື້ໂດລາ ໃນໄລຍະດຽວກັນຂອງປີກາຍ.
ແຫຼ່ງຂໍ້ມູນ: ປະເທດລາວ