ພາຍຫຼັງຄວາມວຸ່ນວາຍຂອງເຫດການປະທ້ວງໃນປະເທດເນປານ ເຮັດໃຫ້ອະດີດນາຍຍົກລັດຖະມົນຕີໄດ້ລາອອກ ພ້ອມທັງເດີນທາງອອກນອກປະເທດ ນຳພາໃຫ້ເນປານບໍ່ມີຄົນດຳລົງຕໍາເເໜ່ງນາຍົກລັດຖະມົນຕີໃນໄລຍະໜຶ່ງ.
ເຊິ່ງໃນວັນທີ 12 ກັນຍາ 2025 ທີ່ຜ່ານມາ, ໄດ້ມີການປະກາດແຕ່ງຕັ້ງ ທ່ານ ນາງ ສຸຊີລາ ກາກີ ຂຶ້ນຮັບຕໍາແໜ່ງຮັກສາການນາຍົກລັດຖະມົນຕີ ແຫ່ງ ປະເທດເນປານ ແລະ ເປັນຜູ້ຍິງຄົນທຳອິດທີ່ໄດ້ຂຶ້ນມາຮັບຕໍາແໜ່ງນີ້, ເຊິ່ງກ່ອນໜ້ານັ້ນ ທ່ານ ນາງ ສຸຊີລາ ກາກີ ມີຕໍາແໜ່ງເປັນປະທານສານສູງສຸດໃນເນປານ.
ໃນວັນທີ 14 ກັນຍາ 2025 ຮັກສາການນາຍຍົກລັດຖະມົນຕີ ແຫ່ງ ປະເທດເນປານໄດ້ຂຶ້ນກ່າວວ່າ: ຕົນ ແລະ ຄະນະລັດຖະມົນຕີຊຸດໃໝ່ ບໍ່ໄດ້ສົນໃຈໃນອໍານາດ,ພວກເຮົາສົນໃຈໃນການເຮັດວຽກຮັບໃຊ້ປະເທດຫຼາຍກວ່າ ໂດຍຈະປະຕິບັດໜ້າທີ່ເປັນຮັກສາການນາຍົກລັດຖະມົນຕີ ເປັນເວລາ 6 ເດືອນເທົ່ານັ້ນ. ຫຼັງຈາກນັ້ນ, ຈະໄດ້ສົ່ງມອບອໍານາດການບໍລິຫານໃຫ້ແກ່ນາຍຍົກລັດຖະມົນຕີຄົນໃໝ່ທີ່ໄດ້ຈາກການເລືອກຕັ້ງ ແລະ ພ້ອມມອບເງິນຊ່ວຍເຫຼືອໃຫ້ກັບຄອບຄົວຜູ້ເສຍຊີວິດໃນເຫດການປະທ້ວງໃນວັນທີ 08-09 ກັນຍາ 2025.
ທາງກະຊວງສາທາລະນະສຸກ ໄດ້ອອກຖະແຫຼງຍອດຜູ້ເສຍຊີວິດຈາກເຫດການປະທ້ວງທີ່ຜ່ານມາຕອນນີ້ເພີ່ມຂຶ້ນເປັນ 72 ຄົນ, ເຊິ່ງຕອນນີ້ທາງໜ່ວຍກູ້ໄພກໍຍັງພະຍາຍາມຕິດຕາມຄົ້ນຫາເກັບກູ້ຜູ້ເສຍຊີວິດຢູ່ໃນຫ້າງ ແລະ ອາຄານອື່ນໆ.
ແຫຼ່ງຂໍ້ມູນ: TNN