ເປັນການພັດທະນາທາງດ້ານເຕັກໂຕໂລຊີເລືອດທຽມຂອງປະເທດຍີ່ປຸ່ນທີ່ຈະມາແກ້ໄຂບັນຫາຂາດແຄນເລືອດໃນໂລກ
ການພັດທະນາທາງດ້ານການແພດຂອງປະເທດຍີ່ປຸ່ນ ໄດ້ແນ່ໃສ່ຄວາມສຳຄັນໃນການຈັດສັນຫາເລືອດ ດ້ວຍການພັດທະນາເຕັກໂນໂລຊີ ເລືອດທຽມ ທີ່ສາມາດໃຊ້ໄດ້ກັບຄົນເຈັບທຸກກຸບເລືອດ ແລະ ສາມາດເກັບຮັກສາໄດ້ດົນ 2 ປີ.
ໃນການວິໄຈຂອງມະຫາວິທະຍາໄລການແພດນາລາ ຂອງປະເທດຍີ່ປຸ່ນ ທີ່ໄດ້ພັດທະນາສານທີ່ເອີ້ນວ່າ hemoglobin vesicles ເປັນຫຼັກການດຶງເອົາ ຮີໂມໂກບິນ ອອກມາຈາກເລືອດທີ່ໝົດອາຍຸແລ້ວ ແລະ ນໍາມາບັນຈຸລົງເປືອກໄຂມັນ ເພື່ອສ້າງໜ່ວຍທີ່ເຮັດໜ້າທີ່ຄ້າຍຄືກັບເມັດເລືອດແດງ ໂດຍຍັງບໍ່ໄດ້ມີການກຳນົດກຸບເລືອດ ຈຶ່ງສາມາດໃຊ້ໄດ້ກັບທຸກໝວດເລືອດ ໂດຍບໍ່ຈຳເປັນຕ້ອງກວດຫາຄວາມເຂົ້າກັນຂອງເລືອດ ແລະ ພິເສດໄປກວ່ານັ້ນເລືອດທຽມຍັງສາມາດເກັບຮັກສາໃນອຸນຫະພູມປົກກະຕິໄປເຖິງ 2 ປີ ແລະ ຫາກເກັບໄວ້ຢູ່ບ່ອນທີ່ມີອຸນຫະພູມຕໍ່າແມ່ນຢູ່ໄດ້ 5 ປີ, ເຊິ່ງເລືອດແທ້ສາມາດເກັບໄວ້ໃນຫ້ອງເຍັນພຽງແຕ່ 42 ມື້.
ໃນເດືອນມີນາ ປີ 2025 ທີ່ຜ່ານມາ, ໄດ້ມີການທົດລອງໃສ່ເລືອດທຽມໃຫ້ກັບອາສາສະໝັກທັງ 16 ຄົນ, ໂດຍປະລິມານທີ່ໃຊ້ຈະຢູ່ລະຫວ່າງ 100-400 ມິນລີລິດ ເພື່ອກວດສອບຄວາມປອດໄພເບື້ອງຕົ້ນ ແລະ ຖ້າບໍ່ມີຜົນຂ້າງຄຽງຮ້າຍແຮງ ກໍຈະໄດ້ກ້າວເຂົ້າສູ່ການພັດທະນາໃນຂັ້ນຕອນຕໍ່ໄປ.
ສຳລັບເລືອດທຽມມີເປົ້າໝາຍການພັດທະນາເພື່ອໃຫ້ນໍາໃຊ້ໄດ້ແທ້ໃນປີ 2030 ເຊິ່ງເລືອດທຽມຈະຊ່ວຍແກ້ໄຂການຂາດແຄນເລືອດໃນພາວະສຸກເສີນ ແລະ ຫຼຸດຄວາມສ່ຽງໃນການຕິດເຊື້ອ ຫຼື ການໂອນຖ່າຍເລືອດທີ່ບໍ່ສາມາດເຂົ້າກັນໄດ້.
ແຫຼ່ງຂໍ້ມູນ: TNN heath