ນ້ອງ ອອດສະກ້າ ອາຍຸ 11 ປີ ໜຸ່ມນ້ອຍແຄ່ງລູກເຂົ້າໜຽວ ອອກເດີນທາງຮ່ວມຝຶກຊ້ອມກັບສະໂມສອນ ຄອນເນຢາ ທີ່ປະເທດແອັດສະປາຍ.
ກາຍເປັນອີກຂ່າວດີຂອງວົງການກິລາບານເຕະເຍົາວະຊົນລາວ ອີກໜຶ່ງຜົນງານໃນເວທີສາກົນ ທ້າວ ສີນໄຊ ຫຼວງບຸນເຮືອງ ຫຼື ນ້ອງອ໋ອດສະກ້າ ມີອາຍຸພຽງ 11 ປີ ນັກຮຽນຊັ້ນ ປ.5 ໂຮງຮຽນສີຄຳພັດທະນາ (ເຂດບ້ານພະຂາວ ຫຼັກ5) ໄດ້ອອກເດີນທາງໄປຝຶກຊ້ອມນຳສະໂມສອນ ຄອນເນຢາ ທີ່ບາເຊໂລນາ ປະເທດແອັດສະປາຍ ຫຼື ສະເປນ ຕັ້ງແຕ່ວັນທີ 23/06/2025 ຈົນຮອດປັດຈຸບັນ, ສ່ວນມື້ຄັດເລືອກເຂົ້າທີມແມ່ນຈະຈັດຂຶ້ນໃນວັນທີ 26 ສິງຫາ 2025.
ສະໂມສອນ ຄອນເນຢາ (WOSPAC ແລະ Hospitalale) ເປັນສູນຝຶກໃຫ້ນັກກະລາເຍົາວະຊົນປະເທດແອັດສະປາຍ ເພື່ອຕໍ່ຍອດສູ່ສະໂມສອນໃຫຍ່ທົ່ວໂລກ ໃນນັ້ນກໍມີສະໂມສອນ ຣີລ ມາດຣິດ, ບາເຊໂລນາ, ຣີລເບຕິສ ອາເຊນອລ ແລະ ອື່ນໆ, ສໍາລັບ ອ໋ອດສະກ້າ ເຄີຍໄປ ບາເຊໂລນາ ມາແລ້ວ 2 ຄັ້ງກ່ອນໜ້ານີ້ກໍຄື: ເມື່ອປີ 2024 ໂດຍຕອນນັ້ນໄດ້ຝືກນຳ WOSPAC ແລະ Hospitalale, ສ່ວນຄັ້ງທີ 2 ແມ່ນໄປແຂ່ງຂັນໃນລາຍການ TAR 2025 ຮອບສຸດທ້າຍກັບ ສະໂມສອນເຍົາວະຊົນລາວ ທີ່ມີຊື່ສຽງກໍຄື W.I.G NAGA ຄວ້າອັນດັບທີ 19 ຂອງໂລກ ແລະ ຄວ້າທີ 3 ຂອງດິວິຊັນ 2.
ປັດຈຸບັນ ອ໋ອດສະກ້າ ແມ່ນໄປແອັດສະປາຍ ຄັ້ງທີ 3 ໄປຝຶກຊ້ອມນຳສະໂມສອນ ຄອນເນຢາ ທີ່ບາເຊໂລນາ ໄດ້ຝຶກຊ້ອມຢ່າງໜັກ ແລະ ລົງແຂ່ງຂັນທຸກໆວັນເສົາ ໂດຍຈະຄັດເລືອກ ເຂົ້າຮ່ວມທີມໃນວັນທີ 26 ສິງຫາ 2025.