ແຂວງໄຊສົມບູນ ກວດພົບພະນັກງານ ສໍ້ລາດບັງຫຼວງ 3 ຄົນ ມູນຄ່າເສຍຫາຍເກືອບ 20 ລ້ານກີບ ໃນປີ 2024
ຄະນະກວດກາພັກ,ອົງການກວດກາລັດ ແຂວງໄຊສົມບູນ ຈັດກອງປະຊຸມ ສະຫຼຸບຕີລາຄາວຽກງານກວດກາທົ່ວແຂວງໄຊສົມບູນ ປະຈຳປີ 2024 ແລະ ທິດທາງແຜນການປີ 2025 ຂຶ້ນທີ່ຫ້ອງປະຊຸມຫ້ອງວ່າການແຂວງ ໃນວັນທີ 3 ເມສາ 2025.
ໃນກອງປະຊຸມສະຫາຍ ຕຸ້ຍ ອ່ອນດວງພະຈັນ ຮອງປະທານອົງການກວດກາລັດແຂວງ ໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານຕິດຕາມ, ກວດກາພັກ, ກວດກາລັດ, ສະກັດກັນ ແລະ ຕ້ານການສໍ້ລາດບັງຫຼວງ, ວຽກງານຄົ້ນຄວ້າຄໍາຮ້ອງ-ຄໍາສະເໜີ, ການຕິດຕາມ-ກວດກາການແກ້ໄຂຜົນການກວດກາ ແລະ ປັບປຸງກົງຈັກການຈັດຕັ້ງ ປີ 2024 ແລະ ທິດທາງແຜນການ ປີ 2025 ຊຶ່ງໃນໄລຍະ 1 ປີ.
ພ້ອມດຽວກັນນີ້ ກໍໄດ້ດໍາເນີນການກວດກາໂຄງການລົງທຶນຂອງລັດທີ່ມີມູນຄ່າ 10 ຕື້ກີບລົງມາ ໄດ້ທັງໝົດ 12 ໂຄງການ, ມູນຄ່າ ຕາມສັນຍາ 58.59 ຕື້ກີບ ຜ່ານການຕິດຕາມ, ກວດກາ ພົບເຫັນ ໂຄງການທີ່ຍັງຄ້າງຈົດທະບຽນຊັບສິນ ຈຳນວນ 1 ໂຄງການ, ມູນຄ່າ 1 ລ້ານກີບ, ໂຄງການທີ່ຍັງຄ້າງຊຳລະຄ່າຊັບພະຍາກອນທຳມະຊາດ ຈໍານວນ 6 ໂຄງການ ລວມມູນຄ່າທັງໝົດ 191.93 ລ້ານກີບ, ໂຄງການທີ່ຈະຕ້ອງໄດ້ຫັກລົບມູນຄ່າອອກຈາກສາລະບານງົບປະມານ ມີ 1 ໂຄງການ ມູນຄ່າຫັກລົບ ຈໍານວນ 4 ແສນກີບ.
ນອກຈາກນີ້, ດ້ານວຽກງານສະກັດກັ້ນ, ຕ້ານ ແລະ ສອບສວນການສໍ້ລາດບັງຫຼວງ ໄດ້ພົບເຫັນພະນັກງານ ສໍ້ລາດບັງ ຫຼວງກ່ຽວກັບເງິນກອງທຶນຂອງສະຫະພັນນັກຮົບເກົ່າເມືອງທ່າໂທມ ຈຳນວນ 3 ຄົນ, ຍິງ 1 ຄົນ, ມີຜົນເສຍຫາຍ ຈໍານວນ 19,724,000 ກີບ ແລະ ໄດ້ດຳເນີນການແກ້ໄຂທາງດ້ານບໍລິຫານ ປັດຈຸບັນສາມາດເກັບກູ້ຄືນໄດ້ແລ້ວ ຈໍານວນ 10,000,000 ກີບ.
ແຫຼ່ງຂ່າວ: ວາລະສານກວດກາ