ຍທຂ ຫລວງພະບາງ ໄດ້ຮັບທຶນຊ່ວຍເຫລືອລ້າຈາກ ອົງການ ຮ່ວມມືສາກົນຍີ່ປຸ່ນ 3,000,000 ໂດລາ
ທ່ານ ບຼົ່ງວ່າງ ຫວ່າງເຈຍຊ່າ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຫຼວງພະບາງ ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນມານີ້ວ່າ: ອົງການຮ່ວມມືສາກົນຍີ່ປຸ່ນ (JICA) ໄດ້ໃຫ້ການຊ່ວຍເຫຼືອລ້າແກ່ ແຂວງຫຼວງພະບາງ 3 ລ້ານໂດລາສະຫະລັດ ເພື່ອນໍາໃຊ້ເຂົ້າໃນການປັບປຸງການບໍລິການຂົນສົ່ງສາທາລະນະ ຫຼື ໂຄງການຂົນສົ່ງ ແລະ ຕົວເມືອງຫຼວງພະບາງທີ່ຍືນຍົງ ເຊິ່ງແຜນດັ່ງກ່າວຈະເປັນແຜນແມ່ບົດທີ່ຄວບຄຸມທັງໝົດໃນການສັນຈອນພາຍໃນນະຄອນ ຫຼວງພະບາງ ແຕ່ປີ 2025-2045 ໂດຍຈະມີການທົດລອງບໍລິການລົດສາທາລະນະເຂົ້າເຖິງແຫລ່ງທ່ອງທ່ຽວ ໂດຍບໍ່ເສຍຄ່າ (ຟຣີ) ເລີ່ມແຕ່ວັນທີ 24 ກຸມພາ ຫາ 3 ມີນາ 2025.
ໃນການທົດລອງ ແມ່ນຈັດຕັ້ງປະຕິບັດຢູ່ 3 ເສັ້ນທາງ ຄື:
1). ສະເພາະຢູ່ໃນເຂດ1 ແລະ ເຂດ2 ຂອງມໍລະ ດົກໂລກຫຼວງພະບາງ ຈະເຮັດເປັນຈຸດຈອດ ແລະ ຈອນ (Park and Ride) ໝາຍຄວາມວ່າຄົນທີ່ຈະເຂົ້າໄປໃນ ເຂດ1 ແລະ ເຂດ2 ຂອງມໍລະດົກໂລກ ຕ້ອງເອົາລົດມາຈອດໄວ້ເດີ່ນທາດຫຼວງຂອງແຂວງຫຼວງພະບາງ ທັງໝົດ ຈາກນັ້ນໃຫ້ຂີ່ລົດສາທາລະນະໄປຫາແຄມຄານ-ແຄມຂອງ, ລວມເຖິງ ຈາກເດີ່ນທາດຫຼວງ ຫາ ສາມແຍກປາກຄານ ແລ້ວກັບມາຈອດຢູ່ບ່ອນເກົ່າ, ລົດອອກທຸກ 5-10 ນາທີ ໂດຍນຳໃຊ້ຕຸກໆ 2 ແຖວ ຫຼື ລົດໄຟຟ້າ.
2). ຈາກເດີ່ນທາດຫຼວງ ຫາຕາດກວາງຊີ ອອກທຸກ 1 ຊົ່ວໂມງ ໂດຍນໍາໃຊ້ລົດເມ ແລະ
3). ຈາກເດີ່ນທາດຫຼວງ ຫາ ສາຖານີລົດ ໄຟ ອອກທຸກ 1 ຊົ່ວໂມງ ຊົ່ວໂມງ ໂດຍນໍາໃຊ້ລົດເມ.
ການປັບປຸງແກ້ໄຂສະພາບການສັນຈັນໃນຕົວເມືອງຫຼວງພະບາງ ແມ່ນບັນຫາສໍາຄັນທີ່ຕ້ອງໄດ້ປັບປຸງແກ້ໄຂໃຫ້ດີຂຶ້ນ ເນື່ອງຈາກຈໍານວນນັກທ່ອງທ່ຽວທັງພາຍໃນ ແລະ ຕ່າງປະເທດ ເດີນທາງໄປທ່ຽວນະຄອນຫຼວງພະບາງ ນັບມື້ເພີ່ມຂຶ້ນຢ່າງຕໍ່ເນື່ອງ ເຮັດໃຫ້ການສັນຈອນໄປ-ມາ ໂດຍສະເພາະໃນໄລຍະເວລາໃນງານສໍາຄັນຕ່າງໆ ມີຄວາມແອອັດ ສົມຄວນ.
ແຫຼ່ງຂ່າວ: