ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ອອກແຈ້ງການເລກທີ 869/ຍທຂ.ນວ ລົງວັນທີ 5 ກຸມພາ 2025 ເຖິງບັນດາທ່ານຜູ້ປະກອບການ ບໍລິສັດ ຫ້າງຮ້ານ ບຸກຄົນ ແລະ ນິຕິບຸກຄົນ ທີ່ເປັນເຈົ້າຂອງສິ່ງປຸກສ້າງ ເທີບເງີບ ປ້າຍໂຄສະນາ ກອງວັດສະດຸກໍ່ສ້າງ ແລະ ໂຕະ ລໍ້ຂາຍເຄື່ອງ ທີ່ກວມເອົາເຂດສະຫງວນຂອງທາງໃນຂອບເຂດນະຄອນຫຼວງວຽງຈັນ ໃຫ້ຈັດສັນຄວາມບໍ່ເປັນລະບຽບຮຽບຮ້ອຍ ຮື້ຖອນ ແລະ ຍົກຍ້າຍ ສິ່ງປູກສ້າງເທີບເງີບ ປ້າຍໂຄສະນາ ກອງວັດສະດຸກໍ່ສ້າງ ແລະ ໂຕະ-ລໍ້ຂາຍເຄື່ອງ ທີ່ກວມເອົາເຂດສະຫງວນຂອງທາງຕາມຖະໜົນສາຍຫຼັກໃນຂອບ ເຂດນະຄອນຫຼວງວຽງຈັນ.
ເພື່ອຜັນຂະຫຍາຍແຈ້ງການຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 1184/ຈນວ ລົງວັນທີ 20 ທັນວາ 2017 ເພື່ອແນໃສ່ເຮັດໃຫ້ຕົວເມືອງເປັນລະບຽບຮຽບຮ້ອຍ ແລະ ມີຄວາມສະອາດຈົບງາມ ໂດຍສະເພາະໃນ 32 ເສັ້ນທາງສາຍຫຼັກ ຄື: ຖະໜົນລ້ານຊ້າງ ຖະໜົນໄກສອນພົມວິຫານ ຖະໜົນສຸພານຸວົງ ຖະໜົນຟ້າງຸ່ມ ຖະໜົນເສດຖາທິລາດ ຖະໜົນສາມແສນໄທ ຖະໜົນທ່າເດືອ ຖະໜົນມິດຕະພາບລາວ-ໄທ ຖະໜົນດົງປ່າລານ ຖະໜົນໜອງບອນ ຖະໜົນອາຊຽນ ຖະໜົນດົງປາຍນາ ຖະ ໜົນໂພນສີນວນ ຖະໜົນກໍາແພງເມືອງ ຖະໜົນໂພນພະເນົາ-ໂພນຕ້ອງ-ສະຫວ່າງ ຖະໜົນທົ່ງຂັນຄໍາ-ດອນແດງ-ຕານມີໄຊ ຖະໜົນຄູວຽງ ຖະໜົນສີທອງ ຖະ ໜົນເລກທີ 10 ຖະໜົນເລກທີ 13 ເໜືອ ຖະ ໜົນເລກທີ 13 ໃຕ້ ຖະໜົນເລກທີ 11 ເໜືອ ຖະໜົນໜອງແຕ່ງ ຖະໜົນ 23 ສິງຫາ ຖະໜົນສາຍລົມ ຖະໜົນໂພນຕ້ອງ-ສີວິໄລ-ໄຟແດງດົງໂດກ ຖະໜົນ P3 ສີບຸນເຮືອງ-ຕີນຄ້ອຍໂພນສະຫວ່າງ ຖະໜົນຫົວຂົວ-ນາຄວາຍ ຖະໜົນຄໍາສະຫວາດ-ດົງຄໍາຊ້າງ-ນາໄຫ ຖະໜົນ 450 ປີ ຖະໜົນດົງໂດກ-ສີເກີດ ຖະ ໜົນວົງວຽນຈີ່ນາຍໂມ້-ຖິ່ນເພຍ.
ດັ່ງນັ້ນຈຶ່ງໃຫ້ເຈົ້າຂອງສິ່ງປຸກສ້າງເທີບເງີບ ປ້າຍໂຄສະນາ ກອງວັດສະດຸກໍ່ສ້າງ ແລະ ໂຕະ-ລໍ້ຂາຍເຄື່ອງທີ່ກວມເອົາເຂດສະຫງວນຂອງທາງ ຮື້ຖອນ ແລະ ຍົກຍ້າຍອອກໃຫ້ສໍາເລັດ 15 ວັນ ນັບແຕ່ມື້ອອກແຈ້ງການສະບັບນີ້, ຖ້າຄົບກໍານົດແລ້ວຍັງບໍ່ປະຕິບັດແມ່ນທາງພາກລັດຈະໄດ້ລົງໄປຮື້ຖອນ, ຖ້າຈະຕິດຕັ້ງຕ້ອງໄດ້ຂໍອະນຸຍາດໃຫ້ຖືກຕ້ອງຕາມລະບຽບການ ຕ້ອງໄດ້ຮັບຜິດຊອບຄ່າໃຊ້ຈ່າຍການລົງຮື້ຖອນ ແລະ ຖືກປັບໄໝຕາມລະບຽບການວາງອອກ ພາຍຫຼັງທີ່ລົງຮື້ຖອນຄົບ 15 ວັນ ແລ້ວ ເຈົ້າຂອງບໍ່ມາຕິດຕໍ່ພົວພັນເອົາຄືນ ແມ່ນຖືວ່າສະຫຼະສິດ ແລະ ຈະຖືກຮິບເອົາເປັນຊັບສິນຂອງລັດ ຕາມລະບຽບກົດໝາຍ
ແຫຼ່ງຂ່າວ: ວຽງຈັນໃໝ່