ໄທຕັດໄຟຟ້າ ອິນເຕີເນັດ ແລະ ນ້ຳມັນ 5 ຈຸດໃນຊາຍແດນມຽນມາ ເພື່ອແກ້ໄຂບັນຫາແກ້ງຄໍເຊັນເຕີສຳນັກຂ່າວຕ່າງປະເທດລາຍງານໃຫ້ຮູ້ວ່າ: ໃນວັນທີ 5 ກຸມພາ 2025, ເຈົ້າໜ້າທີ່ການໄຟຟ້າສ່ວນພູມມິພາກ ປະເທດໄທ ປຶກສາຫາລື ຕັດການຈ່າຍໄຟຟ້າໃຫ້ຊາຍແດນມຽນມາ ຫຼັງມີຂໍ້ມູນວ່າໄຟຟ້າດັ່ງກ່າວແມ່ນນຳໄປໃຫ້ກັບກຸ່ມແກ້ງຄໍເຊັນເຕີ ແລະ ອາດຊະຍາກຳຂ້າມຊາດ.
ພາຍຫຼັງຈົບກອງປະຊຸມດັ່ງກ່າວ, ທ່ານ ພູມທຳ ເວດຊາຍະໄຊ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງພາຍໃນ ປະເທດໄທ ເປີດເຜີຍວ່າ: ຫຼັງຈາກມີການປຶກສາຫາລືກັບພາກສ່ວນກ່ຽວຂ້ອງ ເຊິ່ງເຫັນວ່າ ມີຜົນກະທົບຕໍ່ຄວາມໝັ້ນຄົງຂອງປະຊາຊົນຊາວໄທ ເຊິ່ງມີຜູ້ໄດ້ຮັບຜົນກະທົບ 550,000 ຄະດີລວມມູນຄ່າຄວາມເສຍຫາຍກວ່າ 86,000 ລ້ານບາດ, ສະເລ່ຍສູນເສຍເງິນກວ່າ 80 ລ້ານບາດຕໍ່ມື້ ຈຶ່ງຖືໄດ້ວ່າເປັນຜົນກະທົບທີ່ຮຸນແຮງຕໍ່ປະຊາຊົນ.ດັ່ງນັ້ນ, ລັດຖະບານໄທ ຈຶ່ງໄດ້ມີມະຕິເຫັນດີທຳການຕັດໄຟຟ້າ, ອິນເຕີເນັດ ແລະ ນ້ຳມັນ 5 ຈຸດຫຼັກ ບໍລິເວນຊາຍແດນ ໄທ-ມຽນມາ ເຊິ່ງເລີ່ມຕັ້ງແຕ່ 9:00 ເຊົ້າຂອງມື້ນີ້ເປັນຕົ້ນໄປ, ໂດຍຈະແຈ້ງໃຫ້ທຸກໜ່ວຍງານທີ່ກ່ຽວຂ້ອງ ແລະ ໂຮງໝໍໃນເຂດນັ້ນທີ່ອາດຈະໄດ້ຮັບຜົນກະທົບ.
ສຳລັບ 5 ຈຸດທີ່ໄດ້ມີການຕັດໄຟຟ້າປະກອບມີ:
-ຈຸດຊື້ຂາຍໄຟຟ້າບໍລິເວນບ້ານພະເຈດີສາມອົງ – ເມືອງພະຍາຕອງຊູ ລັດມອນ
-ຈຸດຊື້ຂາຍໄຟຟ້າບໍລິເວນບ້ານເມືອງແດງ – ເມືອງທ່າຂີ້ເຫຼັກ ລັດຊານ
-ຈຸດຊື້ຂາຍໄຟຟ້າບໍລິເວນຂົວມິດຕະພາບ ໄທ – ມຽນມາ – ເມືອງທ່າຂີ້ເຫຼັກ ລັດຊານ
-ຈຸດຊື້ຂາຍໄຟຟ້າບໍລິເວນຂົວມິດຕະພາບ ໄທ – ມຽນມາ ແຫ່ງທີ 2 ເມືອງມຽວດີ
-ຈຸດຊື້ຂາຍໄຟຟ້າບໍລິເວນບ້ານຫ້ວຍມ່ວງ-ເມືອງມຽວດີ
ອີງຕາມສຳນັກຂ່າວ “Tachileik News Agency” ຂອງມຽນມາໄດ້ແຈ້ງໃຫ້ຮູ້ວ່າ ຈາກກໍລະນີປະເທດໄທກຽມຕັດໄຟຟ້າເຂດທ່າຂີ້ເຫຼັກ ແລະ ມຽວດີ, ເຈົ້າໜ້າທີ່ຈາກສຳນັກງານຄະນະກຳມະການກຳກັບດູແລໄຟຟ້າປະຈຳເມືອງແມ່ນມີແຜນກຽມຈ່າຍໄຟຟ້າຈາກລາວ ໃນກໍລະນີທີ່ເກີດໄຟຟ້າດັບ.
ແຫຼ່ງຂ່າວຈາກ: TO DAY