ງານວິໄຈຈາກຕ່າງປະເທດເປີດເຜີຍວ່າ ເດັກນ້ອຍທີ່ໃຊ້ເວລາຢູ່ໜ້າຈໍຫຼາຍກວ່າ 90 ນາທີຕໍ່ມື້ ມີພັດທະນາການດ້ານພາສາ, ການສື່ສານ, ການຂຽນ ແລະການຄິດຄຳນວນ ຕໍ່າກວ່າຄ່າສະເລ່ຍ ລວມເຖິງມີທ່າອ່ຽງເກີດພຶດຕິກຳທີ່ບໍ່ເໝາສົມຫຼາຍຂຶ້ນ ເມື່ອອາຍຸ 4 ຫາ 8 ປີ.
ທີມນັກວິໄຈຈາກມະຫາວິທະຍາໄລແຄນເທີເບີຣີ ປະເທດນິວຊີແລນ ໄດ້ຕິດຕາມພັດທະນາການຂອງເດັກນ້ອຍ 6,000 ຄົນ ຕັ້ງແຕ່ອາຍຸ 2 ຫາ 8 ປີ ເພື່ອທົດສອບຜົນກະທົບຂອງການໃຊ້ໜ້າຈໍເກີນກວ່າຂໍ້ແນະນຳ ລະຫວ່າງອາຍຸ 2 ຫາ 5 ປີ ເຊິ່ງກຳນົດໄວ້ວ່າ ບໍ່ຄວນເກີນ 1 ຊົ່ວໂມງ. ຢ່າງໃດກໍຕາມ, ເດັກນ້ອຍສ່ວນໃຫຍ່ໃນສະຫະຣາຊາອານາຈັກສ່ວນໃຫຍ່ອາຍຸ 2 ປີ ໃຊ້ໜ້າຈໍຫຼາຍກວ່າ 2 ຊົ່ວໂມງຕໍ່ມື້ ໂດຍ 1 ໃນ 5 ຄົນ ມີໂທລະສັບມືຖືເປັນຂອງຕົວເອງ.
ເດັກນ້ອຍທີ່ໃຊ້ເວລາໜ້າຈໍເກີນ 90 ນາທີຕໍ່ມື້ ມີພັດທະນາການລ່າຊ້າໃນດ້ານຕ່າງໆ ເຊັ່ນ: ການເວົ້າ, ການຂຽນ, ຄວາມສາມາດໃນດ້ານຕົວເລກ ແລະການເຂົ້າສັງຄົມ. ໂດຍພວກເຂົາຈະມັກຫຼິ້ນຄົນດຽວ, ບໍ່ໄດ້ຮັບການຍອມຮັບຈາກໝູ່ ແລະມີປັນຫາການແບ່ງປັນ. ນອກຈາກນີ້ ເດັກນ້ອຍທີ່ໃຊ້ເວລາໃນໜ້າຈໍຫຼາຍກວ່າ 2.5 ຊົ່ວໂມງຕໍ່ມື້ ມີປັນຫາເຫຼົ່ານີ້ຮຸນແຮງຍິ່ງຂຶ້ນ.
ໃນທາງກົງກັນຂ້າມ ເດັກນ້ອຍທີ່ໃຊ້ເວລາໜ້າຈໍໜ້ອຍກວ່າ 1 ຊົ່ມໂມງຕໍ່ມື້ ມີທັກສະພາສາ ແລະການເຂົ້າສັງຄົມດີກວ່າຄ່າສະເລ່ຍ, ມີປັນຫາພຶດຕິກຳໜ້ອຍກວ່າ ແລະມີລະດັບການສຶກສາຮຽນຮູ້ສູງກວ່າ. ຜົນກະທົບຂອງການໃຊ້ໜ້າຈໍຫຼາຍເກີນໄປ ປາກົດຊັດເຈນເມື່ອເດັກນ້ອຍອາຍຸ 8 ປີ, ໂດຍເດັກນ້ອຍກຸ່ມນີ້ ມີທ່າອ່ຽງຢູ່ໃນອັນດັບຕ່ຳສຸດຂອງຫ້ອງຮຽນ. ຫາກຫຼຸດການໃຊ້ໜ້າຈໍລົງ ເດັກນ້ອຍອາດຈະຢູ່ໃນລະດັບກາງ ຫຼືສູງກວ່ານີ້ກໍໄດ້.
ນັກວິໄຈຍັງຊີ້ວ່າ ການໃຊ້ໜ້າຈໍຫຼາຍເກີນໄປ ເປັນປັດໄຈສຳຄັນທີ່ເຮັດໃຫ້ຄູສັງເກດເຫັນວ່າ ເດັກນ້ອຍທີ່ເລີ່ມເຂົ້າໂຮງຮຽນໃນປະຈຸບັນ ມີທັກສະພາສາ, ການສຶກສາ ແລະ ືການເຂົ້າສັງຄົມຕ່ຳກວ່າທີ່ຜ່ານມາ.
ນອກຈາກຜົນກະທົບດ້ານການຮຽນຮູ້, ການໃຊ້ເວລາໜ້າຈໍຫຼາຍ ຍັງເພີ່ມຄວາມສ່ຽງຕໍ່ໂລກຕຸ້ຍ, ປັນຫາສຸຂະພາບ ແລະ ຄວາມຖີ່ໃນການພົບແພດ.ອົງການອະນາໄມໂລກ (WHO) ແນະນຳວ່າເດັກອາຍຸຕ່ຳກວ່າ 2 ປີ ບໍ່ຄວນມີເວລາໜ້າຈໍເລີຍ ແລະເດັກອາຍຸ 2-5 ປີ ຄວນໃຊ້ເວລາກັບໜ້າຈໍບໍ່ເກີນ 1 ຊົ່ວໂມງຕໍ່ມື້.
ຢ່າງໃດກໍຕາມ, ງານວິໄຈພົບວ່າ ເດັກນ້ອຍ 80% ຂອງກຸ່ມອາຍຸ 2 ປີ ແລະ 95% ຂອງກຸ່ມອາຍຸ 3 ປີ ໃຊ້ໜ້າຈໍເກີນຂໍ້ແນະນຳນີ້.ເຖິງແມ່ນວ່າສະຫະຣາຊະອານາຈັກຈະມີກົດໝາຍ Online Safety Act ເພື່ອປົກປ້ອງເດັກນ້ອຍ ຈາກເນື້ອຫາອອນລາຍທີ່ເປັນອັນຕະລາຍ, ແຕ່ມາດຕະການ ຍັງບໍ່ຄອບຄຸມການຈຳກັດເວລາການໃຊ້ໜ້າຈໍ.ການຫຼຸດເວລາໃຊ້ໜ້າຈໍ ສາມາດສົ່ງຜົນທາງບວກຕໍ່ພັດທະນາການທາງການສຶກສາ ແລະສຸຂະພາບຂອງເດັກນ້ອຍໄດ້ຢ່າງຊັດເຈນ, ທັງນີ້ ຜູ້ປົກຄອງຄວນໃນການຄວບຄຸມການໃຊ້ໜ້າຈໍຂອງເດັກນ້ອຍ ແລະສະໜັບສະໜຸນກິດຈະກຳທີ່ສົ່ງເສີມພັດທະນາການດ້ານພາສາ ແລະການເຂົ້າສັງຄົມ ແທນການເພິ່ງພາເຕັກໂນໂລຊີຫຼາຍເກີນໄປ.
ທີ່ມາ: Telegraph